استانادا جولداردى جوندەۋ جۇمىستارى قارقىندى جۇرگىزىلۋدە. قازىرگى كەزدە 184 مەكەنجاي بويىنشا جول سالۋ, قالپىنا كەلتىرۋ جانە ورتاشا جوندەۋ جۇمىستارى قولعا الىندى. ءۇش كوشەدە جول جوندەۋدىڭ مارشرۋتتىق ءادىسى ەنگىزىلىپ, 9 كوشەدە وي-شۇڭقىرلار تەگىستەلىپ جاتىر, دەپ حابارلايدى استانا قالاسى اكىمىنىڭ ءباسپاسوز قىزمەتى.
– جول جوندەۋ جۇمىستارى باستالعالى 157 نىساندى قالپىنا كەلتىرۋ اياقتالدى, سونىڭ ىشىندە 39-ى مارشرۋتتىق ادىسپەن جۇرگىزىلسە, 118 وي-شۇڭقىر جابىلدى. جالپى, جولداردى قايتا جوندەۋ جۇمىستارىن 1 ماۋسىمعا دەيىن اياقتاۋ كوزدەلگەن. مەكەنجايلار بويىنشا 20 نىساندى جوندەۋ قاجەت, سونىڭ ىشىندە ورىنبور كوشەسى دايىن. بۇگىنگى تاڭدا 8 نىساندا ءتيىستى جۇمىستار جۇرگىزىلىپ جاتىر, – دەدى استانا قالاسىنىڭ اۆتوموبيل جولدارى باسقارماسى جول قۇرىلىسى جانە جوندەۋ ءبولىمىنىڭ باسشىسى اسقار يساقوۆ.
جول جابىنىن ورتاشا جوندەۋ جۇمىستارى 1 شىلدەگە دەيىن اياقتالماق. بۇگىندە استانانىڭ باستى كوشەلەرى جوندەلىپ, كولىك قوزعالىسىنا كەدەرگى كەلتىرەتىن قولايسىزدىقتاردىڭ باسىم بولىگى جويىلدى.
استانا كوشەلەرىندە 29 بريگادا مەن 414 جۇمىسشى ەڭبەك ەتۋدە. سونداي-اق, جول جابىنىنىڭ كەمشىلىكتەرىن جويۋعا جانە ءىرى اسفالت توسەۋ جۇمىستارىنا 160-تان ارتىق ارنايى تەحنيكا جۇمىلدىرىلعان.
ايتا كەتەيىك, جول جوندەۋ جۇمىستارى جوسپارعا سايكەس جۇرگىزىلۋدە – تەز ءارى كولىك قوزعالىسىنا ەشقانداي قولايسىزدىقتار كەلتىرىلمەيدى. مىسالى, 8 مىڭ شارشى مەتر جول جابىنىنا اسفالت توسەۋ ءۇشىن ءبىر اۋىسىمداعى جۇمىس ۋاقىتى جۇمسالادى. دەمالىس كۇنى كراۆتسوۆ كوشەسى تولىقتاي جوندەلىپ ءبىتتى.
جالپى, قالا بويىنشا, بيىل 25,36 كم جول سالۋ, جوندەۋ جانە قالپىنا كەلتىرۋ جوسپارلانعان. سونىڭ ىشىندە, 15,8 كم جول سالىنادى, 1,4 كم قالپىنا كەلتىرىلەدى جانە 8,16 كم ورتاشا جوندەۋ جۇمىستارى جۇرگىزىلەدى.
