ءۇش كۇننەن سوڭ استانا تورىندەگى بەيبىتشىلىك جانە كەلىسىم سارايىندا ححV مەرەيتويلىق «جاس قانات» رەسپۋبليكالىق بايقاۋى وتەدى. ەلوردا ساحناسىندا باس قوساتىن ۇزدىك ورىنداۋشىلار مامىردىڭ 20-22 ارالىعىندا تارتىستى سايىسقا تۇسپەك.
كەشە بيىلعى جاسقاناتتىقتاردىڭ كوپتەن كۇتكەن كەزدەسۋى بولدى. قازاقستاننىڭ تۇكپىر-تۇكپىرىنەن ىرىكتەلگەن 14 قاتىسۋشى ءبىر-بىرىمەن العاش رەت جۇزدەسىپ, ستيليست, دىبىس رەجيسسەرلەرىمەن, ايتۋلى شارانىڭ باسى-قاسىندا جۇرگەن تەحنيكالىق ماماندارمەن تانىستى. اقتىق كەزەڭگە جولداما العان ونەرپازداردىڭ ىشىندەگى ەڭ جاسى – 15-تەگى ادەمى قوڭىراتباي بولسا, ۇلكەنى – 28-دەگى ايبەك داۋلەتقاليەۆ. ءدۇبىرلى دودانىڭ جۇيرىكتەرى اراسىندا اقجول ساپارالى مەن جالعاس سۇلتانوۆ اتتى ەكى استانالىق ۇمىتكەر بار.
ەل تاۋەلسىزدىگىنىڭ 25 جىلدىعىمەن تۇسپا-تۇس كەلگەن مەرەيلى بايقاۋدىڭ قاتىسۋشىلارى جىلى لەبىزدەرىمەن ءبولىسىپ, جاسقاناتتىق رەتىندە ءبىرىنشى سۇحباتىن بەردى. سولاردىڭ ءبىرى وسكەمەننەن كەلگەن ماليكا احمەتجانوۆا: «جاس قاناتقا» قاتىسۋدىڭ ءوزى – ۇلكەن جەڭىس. بۇعان دەيىن تەك حوببي رەتىندە قاراستىرعان ونەرىمدى كونكۋرستان كەيىن كاسىبي دەڭگەيگە ۇلاستىرسام دەيمىن. ۆوكالدىق شىڭدالۋ, ەسترادا الداعى ءومىرىمنىڭ اجىراماس سەرىگى بولادى دەپ سەنەمىن» دەيدى.
25 جىل ىشىندە «جاس قانات» بايقاۋى تالاي ءانشىنىڭ تالانتىن تانىپ, ءدۇيىم جۇرتقا اتىن شىعاردى. بۇل بايگە مەدەۋ ارىنباەۆ, نۇرلان ابدۋللين, گاۋھار قاسپاقوۆا, ءمادينا سادۋاقاسوۆا, مارجان اراپباەۆا, التىناي جوراباەۆا, «Melomen» سىندى كوپتەگەن ءانشىنىڭ باعىن اشقان بولاتىن.
ايتا كەتەيىك, 1992 جىلدان 1999-عا دەيىن كونكۋرس الماتىداعى رەسپۋبليكا سارايىندا ءوتىپ ءجۇردى. 2001 جىلدان استاناداعى كونگرەسس-حولل ساحناسىنىڭ كوركىن قىزدىردى. ال, «جاس قاناتتىڭ» ۇرانى بەيبىتشىلىك جانە كەلىسىم سارايىندا وسىمەن ءتورتىنشى مارتە شىرقالماق.
ءمادينا جاقىپ
