ەلوردا اكىمى التاي كولگىنوۆ تۇرعىنداردى اپتا سايىن قابىلداپ, 1000-نان اسا تۇرعىننىڭ ءوتىنىشىن تىڭداعان. بۇل تۋرالى قالا باسشىسى ينستاگرام پاراقشاسىندا جاريالادى.
«بيىل 1 مىڭنان اسا تۇرعىننىڭ ماسەلەسىنە قانىق بولدىم. پاندەميا باستالعالى كەزدەسۋلەر ونلاين رەجيمگە اۋىستى. اي سايىنعى قابىلداۋلاردى اپتا سايىنعا اۋىستىرىپ, تۇرعىنداردىڭ ءوتىنىشىن تىڭدادىم. كوبىنە باسپانا, قوسىمشا ءبىلىم الۋ, جۇمىسقا ورنالاسۋ, ەلدى مەكەندەردى دامىتۋ جانە باسقا دا سۇراقتارمەن جۇگىندى. ناتيجەسىندە كەلەلى ىستەر اتقارىلدى. مىسالى, كۇزدە تۇرعىن ءۇي سالاسىندا قىزمەت كورسەتەتىن بىرىڭعاي ورتالىق اشتىق (رەسپۋبليكا داڭعىلى, 32). ول جەردەن باسپاناعا كەزەك ءنومىرىن, كەزەككە قالاي تۇرۋدى, ءتۇرلى تۇرعىن ءۇي باعدارلامالارى مەحانيزمدەرىن بىلۋگە بولادى. سونىمەن قاتار باسپانا باعدارلامالارىنا, تۇرعىن ءۇي سەرتيفيكاتى مولشەرىنە بىرقاتار وزگەرىس ەنگىزدىك.
بىزگە الەۋمەتتىك ماسەلەلەردى شەشۋگە «جانۇيا» وتباسى ينستيتۋتىن قولداۋ ورتالىعى كومەكتەسەدى (بەيبىتشىلىك كوشەسى, 14). تۇرعىندارعا «ءبىر تەرەزە» قاعيداتى بويىنشا 70-تەن اسا مەملەكەتتىك قىزمەت كورسەتىلەدى. اشىلعان ساتتەن, ياعني 2019 جىلدىڭ تامىزىنان باستاپ 41,5 مىڭ ازامات كومەك سۇراپ كەلدى.
بيىل «جۇمىسپەن قامتۋدىڭ جول كارتاسى» باعدارلاماسى بويىنشا 15 مىڭنان اسا ادام جۇمىسقا ورنالاستى. سونداي-اق مەكتەپ بىتىرۋشىلەر ءۇشىن مەملەكەتتىك گرانت سانىن ارتتىرىپ, تۇرعىندارعا جاقىن جەرلەردەن «ءۇي ماڭىنداعى دارىگەر» اتتى 29 نىسان اشتىق. بۇل تاعى 180 مىڭ تۇرعىنعا قول ۇشىن سوزۋعا مۇمكىندىك بەردى.
سونىمەن قاتار بيىل 5 وڭالتۋ ورتالىعى ىسكە قوسىلدى. قالانى ارالاۋ كەزىندە تۇرعىندارمەن تىلدەسىپ, ولاردىڭ مۇڭ-مۇقتاجىمەن تانىستىم. وتىنىشتەرى ەسكەرۋسىز قالمايدى» دەپ جازدى التاي كولگىنوۆ.
