ەلوردادا تاعى ەكى ەلدى مەكەن – كوكتال-2 مەن اگروقالاشىق تۇرعىندارى كوگىلدىر وتىنعا قول جەتكىزدى. ءبىر تەكشە مەتر گاز باعاسى 45 تەڭگەدەن 34,6 تەڭگەگە تومەندەتىلدى. بۇل تۋرالى شاھار باسشىسى التاي كولگىنوۆ ينستاگرام پاراقشاسىندا جاريا ەتتى.
«تاعى ەكى ەلدى مەكەن – كوكتال-2 مەن اگروقالاشىقتىڭ ءبىر بولىگىندەگى ۇيلەرگە گاز قوسىلۋدا. بۇل ەلدى مەكەندەردە گاز ىشكى كۆارتالدى جەلىلەر بويىنشا بەرىلەدى. العاشقى بولىپ قوسىلعان – جەلەزنودوروجنىي ەلدى مەكەنى. بۇگىندە 750-دەن اسا تۇرعىن تەحنيكالىق شارتتارىن بەكىتىپ العان. فرونت-كەڭسەلەردە 5 مىڭنان اسا ادامعا كەڭەس بەرىلدى.
تۇرعىندار گازعا قوسىلۋ ءۇشىن «قازترانسگاز ايماق» اق-عا (رەسپۋبليكا داڭعىلى, 24, «پاراسات» سو) جۇگىنۋى كەرەك. اتالعان ۇيىم گازبەن قامتۋدىڭ ىشكى جەلىلەرىنىڭ قاۋىپسىزدىگىن تەكسەرۋمەن, ونى قوسۋمەن اينالىسادى. بۇعان قوسا ودان ءارى پايدالانۋ بارىسىنا دا جاۋاپتى.
سونداي-اق كوكتال-1, ءوندىرىس, وڭتۇستىك-شىعىس ەلدى مەكەندەرىندە قۇرىلىس-مونتاج جۇمىستارى ءجۇرىپ جاتىر. ەلوردانى گازداندىرۋ – ەلباسىنىڭ تاريحي جوباسى. گاز تارتۋ ەكولوگيانى جاقسارتىپ قانا قويماي, جەكە سەكتور تۇرعاندارىنىڭ ءومىر ءسۇرۋ جاعدايىن ءبىرشاما جەڭىلدەتۋگە مۇمكىندىك بەرەدى.
استانانى گازداندىرۋ پروتسەسى بىرنەشە كەزەڭنەن تۇرادى. ەلدى مەكەندەردىڭ ءبارىن كەزەڭ-كەزەڭمەن قوسامىز. گاز تارتۋ ۇدەرىسى – مەملەكەت باسشىسىنىڭ باقىلاۋىندا. قازىرگى جىلىتۋ ماۋسىمىندا جەو-1 مەن جەو-2-ءنىڭ بىرقاتار سۋ جىلىتقىش قازاندىعىن دا گازعا اۋىستىردىق» دەپ جازدى التاي كولگىنوۆ.
