قاسىم-جومارت توقاەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن, وزبەكستان رەسپۋبليكاسىنىڭ پرەزيدەنتى شاۆكات ميرزيوەۆپەن جانە تاجىكستان پرەزيدەنتى ەمومالي راحمونمەن تەلەفون ارقىلى سۇحباتتاستى.
پرەزيدەنت ۆلاديمير پۋتينمەن اڭگىمە بارىسىندا تاراپتار قازاقستان مەن رەسەي اراسىنداعى بارلىق باعىتتار بويىنشا ەكىجاقتى قارىم-قاتىناستاردىڭ دامۋى وڭ ديناميكادا, ستراتەگيالىق ارىپتەستىك جانە وداقتاستىق سيپاتىندا ءوربىپ كەلە جاتقانىن اتاپ ءوتتى. قازاقستان مەن رەسەي COVID-19 ىندەتىنىڭ زارداپتارىن ەڭسەرۋ, كوپجاقتى قۇرىلىمدار اياسىنداعى جۇمىستاردى ۇيلەستىرۋ بويىنشا ءوزارا ءتيىمدى ىنتىماقتاستى ودان ءارى نىعايتۋعا بەيىلدى ەكەندەرىن ناقتىلادى. ۆلاديمير پۋتين باۋىرلاس قازاقستان حالقىنا جاڭاجىلدىق قۇتتىقتاۋى مەن ىزگى تىلەگىن جەتكىزۋدى سۇرادى. وزبەكستان پرەزيدەنتى شاۆكات ميرزيوەۆپەن سۇحبات كەزىندە بەرىك باۋىرلاستىققا جانە تاتۋ كورشىلىككە نەگىزدەلگەن قازاق-وزبەك سەرىكتەستىگىن تەرەڭدەتۋ ىسىنە وڭ باعا بەرىلدى. مەملەكەت باسشىلارى بيىلعى جىلدىڭ قورىتىندىلارىن جوعارى باعالاپ, ساياسي, ساۋدا-ەكونوميكالىق جانە مادەني-گۋمانيتارلىق بايلانىستاردى كەڭەيتۋ ءۇشىن كۇش بىرىكتىرۋدىڭ, سونداي-اق, ورتالىق ازياداعى ايماقتىق ۇجىمداسۋدىڭ ماڭىزدىلىعىن ايتتى. قاسىم-جومارت توقاەۆ پەن شاۆكات ميرزيوەۆ ءبىر-ءبىرىن جاڭا جىلمەن قۇتتىقتاپ, جۇرەكجاردى تىلەكتەرىن ايتتى. تاجىكستان پرەزيدەنتى ەمومالي راحمونمەن اڭگىمە بارىسىندا قازاقستان پرەزيدەنتى دامۋدىڭ جوعارى قارقىنىن كورسەتىپ وتىرعان مەملەكەتارالىق ىنتىماقتاستىقتىڭ قازىرگى جاعدايىن وڭ باعالادى. تاجىكستان پرەزيدەنتى ەكى ەلدىڭ حالىقارالىق ارەنادا وداقتاس جانە بارلىق باعىتتار بويىنشا ەكىجاقتى ىنتىماقتاستىقتى نىعايتۋعا مۇددەلى ەكەنىن اتاپ ءوتتى. مەملەكەت باسشىلارى ءبىر-ءبىرىن جاڭا جىلمەن قۇتتىقتادى.
