نۇر-سۇلتان قالاسىندا بيىكتىگى 6 مەتر بولاتىن قۇراق كورپە تۇرىندە توقىلعان بىرەگەي شىرشا ورناتىلدى.
ەرەكشە شىرشانى بەزەندىرۋگە وتاندىق قولونەر شەبەرلەرى, زەينەتكەرلەر, وقۋشىلار, مۇعالىمدەر, قارتتار ءۇيى, قوعامدىق قورلار, الەۋمەتتىك كاسىپكەرلەر مەن قولونەرشىلەر قاتىستى. بۇل ارت-نىسان بىلتىرعىعا قاراعاندا ەكى ەسە بيىك. جاڭا جىلدىق شىرشاعا ۇزىندىعى 70 000 مەتردەن 70 كەلىدەن اسا يىرىلگەن ءجىپ جۇمسالعان.
حالىقتىق جوبا ەلوردا مەن ەلىمىزدىڭ وزگە دە قالا تۇرعىندارىن ءبىر ىسكە جۇمىلدىردى. ءتىپتى رەسەي مەن وزبەكستان شەبەرلەرى دە اتسالىسقان.
«كىشكەنتاي بالالار توقۋ بىلمەيدى, ال قارتتارىمىز بىلەتىنىن قالاي ۇيرەتۋدى بىلمەيدى. سوندىقتان «بايتەرەك» مونۋمەنتىندە تەگىن شەبەرلىك ساباقتارىن وتكىزدىك. مۇنداعى ماقسات – ەرىكتى رەتىندە ادامداردى ورتاق ىسكە بىرىكتىرۋ. ءبىز قازاقستان تۇرعىندارىنىڭ ايالى الاقاندارىنىڭ جىلۋىن بىرىكتىرگىمىز كەلەدى. ەكوشىرشامىزعا كورىك بەرە وتىرىپ, ەلوردا تۇرعىندارىنا جاڭا جىلدىق كوڭىل-كۇي سىيلاعىمىز كەلەدى» دەدى جوبا اۆتورى, الەۋمەتتىك كاسىپكەر راحيما مۇقىشەۆا.
ونىڭ ايتۋىنشا, بۇل جوباعا التىناي جوراباەۆا, تامارا اسار سىندى بەلگىلى ونەر مايتالماندارى دا قولداۋ كورسەتكەن. سونداي-اق «30 يگى ءىس» اكتسياسى اياسىندا ۆولونتەرلەر, قارتتار ۇيىندەگى اجەلەر توقىعان جىلى شۇلىقتار, ويىنشىقتار, قولعاپتار الەۋمەتتىك جاعىنان از قامتىلعان وتباسىلارعا تاراتىلدى.
«بۇل – ەرىكتىلىك جۇمىس. بىلتىر ەكوشىرشا بيىكتىگى 3 مەتر بولسا, بيىل 6 مەتر بولدى. سول سياقتى وتكەن جىلى وسى شاراعا 50 ادام اتسالىسسا, بيىل 200 ادام قاتىستى. ولاردىڭ ەڭ جاسى كىشىسى 3-تە بولسا, ەڭ ۇلكەنى – 82-دەگى اجەمىز. الداعى ۋاقىتتا ەكوشىرشانى بۇدان دا بيىك جاساۋعا تىرىسامىز. اۋقىمى كەڭەيە تۇسەدى دەپ ويلايمىن. وسىلايشا, ءبىز اتا-بابادان وسيەت بولىپ قالعان ءداستۇرىمىزدى دە الەمگە پاش ەتكىمىز كەلەدى. وسى جوبانىڭ جۇزەگە اسۋىنا قولداۋ كورسەتكەن قالا اكىمدىگىنە العىسىمىزدى بىلدىرەمىز» دەدى جوبا اۆتورى.
ايتا كەتسەك, ەكوشىرشا «استانا بايتەرەك» مونۋمەنتى جانىندا «نۇر جول» (اق مەشىت كوشەسى جاعىنان) جەلەكجولىنىڭ بويىندا ورنالاسقان.
