كەشە «استانا دارىنى» دارىندىلىقتى دامىتۋ جانە پسيحولوگيالىق سۇيەمەلدەۋ ورتالىعىندا «Qabilet» كاسىبي باعدار بەرۋ قىزمەتىنىڭ سالتاناتتى اشىلۋى ءوتتى. اتالمىش جوبا ەلباسىمىز نۇرسۇلتان نازارباەۆ ۇسىنعان «El Umiti» باستاماسى اياسىنداعى تۇڭعىش پرەزيدەنت قورىنىڭ ۇيىمداستىرۋىمەن جۇزەگە استى.
«Qabilet» كاسىبي باعدار بەرۋ قىزمەتى 7-11-سىنىپ وقۋشىلارىنىڭ زياتكەرلىك قابىلەتتەرىن انىقتاۋعا باعىتتالعان. سونداي-اق جاسوسپىرىمدەردىڭ سۇرانىسقا يە ماماندىق تاڭداۋىنا كومەكتەسىپ, جوعارى وقۋ ورىندارى تۋرالى تولىققاندى مالىمەت بەرەدى. تۇلەكتەردىڭ ۇلتتىق بىرىڭعاي تەستىلەۋگە دايىندالۋىنا پسيحولوگيالىق كومەك كورسەتەدى.
ورتالىقتا دياگنوستيكا جۇرگىزۋ بويىنشا ارنايى بىرنەشە مامان جۇمىس ىستەيدى. كليەنتتەرمەن بايلانىستاعى مەنەدجەر تەلەفون ارقىلى وتىنىمدەردى قابىلداپ, باعدارلامالاردىڭ ەلەكتروندىق بازاسىندا تەستىلەۋدەن وتۋگە نيەت بىلدىرۋشىلەردى تىركەيدى. ال پسيحولوگ-كەڭەسشى تەستىلەۋدەن ءوتۋ كەزىندە كونسۋلتاتسيالىق كومەك كورسەتەدى. كاسىپتىك باعدار بەرۋشى (پسيحولوگ) قازاقستاننىڭ ارنايى ورتا جانە جوعارى وقۋ ورىندارىنا ءتۇسۋ مۇمكىندىكتەرى تۋرالى اقپارات بەرسە, ۇيلەستىرۋشى مامان (پسيحولوگ) قاناتقاقتى مەكتەپتەردىڭ قىزمەتىنە ادىستەمەلىك سۇيەمەلدەۋ جۇرگىزىپ, مەكتەپ پسيحولوگتارىنا كەڭەس بەرە وتىرىپ كەرەك بولسا ولاردىڭ جۇمىسىنا كومەك كورسەتەدى.
اشىلۋ راسىمنەن كەيىن قوناقتارعا كاسىبي باعدار بەرۋ قىزمەتىنىڭ بارلىق مۇمكىندىكتەرى تانىستىرىلدى. تەستىلەۋ بارىسى قوناقتاردىڭ دا ۇلكەن قىزىعۋشىلىعىن تۋدىرىپ, ولار دا دياگنوستيكادان ءوتتى. سونداي-اق شارا بارىسىندا قر ارنايى-ورتا جانە جوعارى وقۋ ورىندارىنىڭ بازاسى تانىستىرىلدى.
