ەلوردالىق ءورت سوندىرۋشىلەر 3 ادامدى قۇتقاردى. ولاردىڭ بىرەۋى – بالا. سونىمەن قاتار, ءورت ءسوندىرۋ قىزمەتكەرلەرىنىڭ كومەگىمەن باسقا پاتەرلەردەن تاعى 6 ادام سىرتقا شىعارىلعان.
كەزەكتى قۇتقارۋ وپەراتسياسى جەكسەنبى كۇنى بولعان. ساعات 13:49-دا «101» نومىرىنە ەسەنبەرلين كوشەسىندە وت تۇتانعانى جايلى حابار تۇسكەن. قوڭىراۋ شالىنعان سوڭ 6 مينۋت ىشىندە ءورت سوندىرۋشىلەر وقيعا ورنىنا جەتكەن. وسى ۋاقىتتا كوپ قاباتتى تۇرعىن ءۇيدىڭ 3-قاباتىندا 17 شارشى مەتردى قۇرايتىن اس بولمەدەگى جيھاز بەن تۇرمىستىق تەحنيكا جانىپ جاتقان. تۇرعىن ءۇيدىڭ كىرەبەرىس ءدالىزى كوك تۇتىنگە ورانىپ, ىشتەگى ادامداردىڭ ومىرىنە قاۋىپ تونگەن. توتەنشە جاعدايلار دەپارتامەنتىنىڭ ءورت ءسوندىرۋ قىزمەتى ماماندارىنىڭ جىلدام ارەكەت ەتۋىنىڭ ارقاسىندا 15 مينۋت ىشىندە ءتىلسىز جاۋ اۋىزدىقتالىپ, 3 ادام قۇتقارىلىپ, 6 ادام ەۆاكۋاتسيالانعان. بۇل وپەراتسياعا قاتىسقان ب.بەكشەنوۆ, م.مۇراتوۆ, د.الداشەۆ سىندى ءورت سوندىرۋشىلەر قايسارلىق تانىتتى. سونداي-اق, 6 تەحنيكا جۇمىلدىرىلعان.
