ەلورداداعى ۇلتتىق اكادەميالىق كىتاپحانا مەن قازاقستان جازۋشىلار وداعىنىڭ استانا فيليالى بىرلەسىپ, قازاقستاننىڭ حالىق جازۋشىسى, كورنەكتى اقىن ءابدىلدا تاجىباەۆتىڭ 110 جىلدىق مەرەيتويىنا ارناپ «سەمسەر جىردىڭ قورعانى» اتتى پوەزيا كەشىن وتكىزدى.
بيىل «ءبىر ەل – ءبىر كىتاپ» رەسپۋبليكالىق اكتسياسى اياسىندا ايتۋلى اقىننىڭ جىر كىتاپتارىنىڭ تاڭداپ الىنعانى بەكەر ەمەس.
سىر بويىندا تۋعان سىرشىل شايىر وتكەن عاسىردىڭ 20-شى جىلدارى قازاق پوەزياسىنا جاڭاشا لەپ, وزگەشە ورنەگىمەن كەلدى. وتىزىنشى جىلداردان باستاپ, اقىن شابىتى شاپقان اتتاي ۇدەي ءتۇستى. «ارالدار» اتتى ولەڭدەر توپتاماسى ونى جۇرتشىلىققا تانىتىپ, «ابىل» جانە «تولاعاي» سەكىلدى رومانتيكالىق پوەمالارى بيىككە كوتەردى. مۇحتار اۋەزوۆ ول تۋرالى: «قازاق پوەزياسىنا اسەرلى, ساپالى ءبىر كوركەم اعىم كىرگىزىپ كەلە جاتقان اقىن» دەپ باعالادى.
ءابدىلدا تاجىباەۆ – وزىنەن كەيىن كەلگەن قانشاما جاس بۋىنعا اعا بولا بىلگەن ابىز.ونى كەيىنگى جاس اقىنداردىڭ ءبارى ەرەكشە قادىرلەگەن. مۇقاعاليدىڭ العاشقى تالانتىن شىنايى باعالاعان – وسى كىسى. ارداقتى تۇلعا ادەبيەتتىڭ ءار جانرىندا قالام تەربەدى. دراماتۋرگياسى دا – ءبىر توبە. ادەبيەتتانۋ عىلىمىندا ايشىقتى قولتاڭباسى قالدى. قىسقاسى, اقىن ءومىرىنىڭ سوڭعى جىلدارىنا دەيىن قولىنان قالامىن تاستاماي, جەمىستى ەڭبەك ەتتى.
كەش بارىسىندا تالانتتى تۇلعا تۋرالى تاعىلىمدى ەستەلىكتەر ايتىلدى. كورنەكتى قالامگەر ساكەن ءجۇنىسوۆتىڭ قارىنداسى روزا ءجۇنىسوۆا اقىننىڭ كوزىن كورىپ, سىرلاس بولعانىن ايتسا, باقىتجان توباياقوۆ ونى بالا كەزىنەن تانىپ, اقىل-كەڭەسىن تىڭداعانىن ءسوز ەتتى. قازاقستان جازۋشىلار وداعى استانا فيليالىنىڭ ديرەكتورى داۋلەتكەرەي كاپۇلى پوەزيا ابىزىنىڭ ءومىرى مەن ونەرىنەن سىر تارتىپ, ۇلاعاتتى اڭگىمە ءوربىتتى. مەكتەپ وقۋشىلارى اقىن ولەڭدەرىن وقىپ, كەلگەن قوناقتارعا اسەرلى كۇي سىيلادى.
