قازىر كىمنەن سۇراماڭىز, ءوزىنىڭ ساياساتقا جانە ەل پرەزيدەنتىنە قاتىستى جەكە پىكىرىن بىلدىرە الادى. ولار ويىنداعىسىن تۋرا ايتا ما, جوق پا, ءوز ەركىندە. ال, قاشاندا اعىنان جارىلىپ, ويىن بۇكپەسىز بىلدىرەتىندەر – بالالار.
بۇلدىرشىندەر ەلباسى نۇرسۇلتان نازارباەۆتىڭ ساياسي ارەناداعى ورنى مەن كۇن سايىن قول قوياتىن قۇجاتتارىن ونشا تۇسىنە بەرمەيدى. ولار ءۇشىن پرەزيدەنتتىڭ ءبىر عانا اتى بار, ول – نۇرسۇلتان اتا. بارلىعى پرەزيدەنتتى مەكتەپتەر مەن بالاباقشالاردا ءىلىنىپ تۇراتىن پورترەتىنەن جاقسى تانيدى. ونىڭ استانا دەگەن قالادا, «بايتەرەككە» جاقىن جەردە تۇراتىنىن بىلەدى. سوندىقتان كوپشىلىگى سالعان سۋرەتتەرىندە «بايتەرەكتى» ءجيى بەينەلەيدى جانە «وسكەندە ەل باسقارام» دەپ شىعارما جازادى.
ءبىر جولى تەاترعا بارماق بولىپ, تاكسيگە وتىرعانمىن. جۇرگىزۋشى تىم اڭگىمەشىل ءارى اسەرشىل جان ەكەن. «ومىرىمدەگى ەڭ ءبىر قىزىق ۋاقيعانى ايتىپ بەرەيىن بە؟» دەدى. ەرىكسىز باس شۇلعىدىم. «ۇلكەن بالامدى شەتقاقپايلاپ تاربيەلەگەندىكتەن بە, ول تىم ۇياڭ بولىپ ءوستى. ال, كەيىنگى ۇلىم ەشكىمگە بوي بەرمەيدى. ءوزى – اقىلدى تەنتەك.
وسىدان ءبىراز جىل بۇرىن وتباسىممەن بىرگە ەلوردادا وتكەن ۇلكەن مەرەكەگە باردىم. ادام ىعى-جىعى, ۇلىمدى قولىنان تاس قىپ ۇستاپ العانمىن. ءبىر كەزدە ادامداردىڭ ءبارى ارتقا قاراي شەگىنىپ جاتقانىن بايقادىم. ءدال سول ساتتە بالام قولىن جۇلىپ الىپ, العا قاراي جۇگىرىپ كەتتى. ەشتەڭە تۇسىنبەگەن كۇيى ارتىنان قاراسام, اناداي جەردە پرەزيدەنت كەلە جاتىر ەكەن. وققاعارلاردان ءسوز ەستىمەس ءۇشىن بالاما قاراي ۇمتىلىپ ەدىم, ولار مەنىڭ ءبىر ورىندا تۇرۋىمدى ءوتىندى. باقسام, ۇلىم ەش قىمسىنباستان, ەلباسىنا قاراي الشاڭ باسىپ بارادى. نۇرسۇلتان ءابىشۇلى بالامدى بىردەن بايقاپ, ءسال ەڭكەيىڭكىرەپ, ونى قۇشاعىنا باستى. قاتتى قۋانعانىم سونشا, سول ءبىر ەرەكشە ءساتتى سۋرەتكە ءتۇسىرۋ دە ويىما كەلمەپتى. ۇلىم ءالى كۇنگە دەيىن «مەن نۇرسۇلتان اتامەن كەزدەسكەنمىن» دەپ ءجيى ايتادى».
نۇرسۇلتان اتاسىمەن كەزدەسكەن تاعى ءبىر بالاقايدىڭ اتى-ءجونى – ەرجان يساباەۆ. ەلباسىن 2 جاسىندا قاسكەلەڭدەگى ناۋرىزباي باتىر ەسكەرتكىشىنىڭ اشىلۋ سالتاناتىندا كورگەن ەرجان بىلتىر وعان حات جازدى. ول حاتىندا پرەزيدەنتتى ءوزىنىڭ تۋعان كۇنىنە قوناققا شاقىرعان. سونداي-اق, «ەگەر, سىزگە قانداي دا ءبىر كومەك قاجەت بولسا, ايتىڭىز. ءبىز, اعام نۇرجان ەكەۋمىز ارقاشان سىزگە كومەكتەسۋگە دايىنبىز» دەۋدى دە ۇمىتپاعان. ارادا كوپ ۋاقىت وتپەي, ەلباسىنىڭ جاۋابىن العاندا ەرجاننىڭ قۋانىشىندا شەك بولماپتى. حاتتا «ەرجان, وتاندى ءسۇيىپ, وعان قىزمەت ەتۋ زور باقىت ەكەندىگىن ەسىڭدە ساقتا!» دەلىنگەن. سونىمەن قاتار, ەلباسى ەرجانعا «ەندىگى جولى حاتتى قازاقشا جازاتىن بول!» دەپ ەسكەرتۋ جاساعان ەكەن.
2005 جىلدىڭ ءساۋىر ايىندا نۇرسۇلتان ءابىشۇلىنىڭ قىزىلوردا وبلىسى, ارال اۋدانىنا جاساعان ساپارىندا مىناداي قىزىق ۋاقيعا بولعان-دى. الدەبىر اقساقال جاقىندا عانا دۇنيە ەسىگىن اشقان نەمەرەسىنە پرەزيدەنتتىڭ اتىن قويعىسى كەلەتىنىن ايتتى. سوندا نۇرسۇلتان ءابىشۇلى «ەلىمىزدە نۇرسۇلتاندار كوپ قوي. نەمەرەڭىزدىڭ اتىن مەن قويايىن, ايسۇلتان بولسىن!» دەگەن ەدى. ايسۇلتان قازىر وزىنە ەلباسى قويعان ەسىممەن ماقتانادى.
بيىل جازدا ەلورداعا ورالدان قۇربىمنىڭ نۇرداۋلەت ەسىمدى ءىنىسى كەلدى. «نەگە كەلدىڭ؟» دەپ سۇراساق, «نۇرسۇلتان اتانى ىزدەپ كەلدىم» دەيدى. استانانىڭ تۋعان كۇنىندە اناسىمەن بىرگە «حان شاتىرعا» باردى. كەش باتقاندا, «پرەزيدەنتتى تابا المادىم» دەپ مۇڭايىپ كەلدى. ەرتەسىنە «بايتەرەككە» باردى. نۇرسۇلتان اتاسى ول جەردە دە جوق بولىپ شىقتى. سوسىن نۇرداۋلەت ءوزىن «اتام وزىنە ادەمى كوستيۋم الۋ ءۇشىن دۇكەنگە كەتكەن بولار» دەپ جۇباتتى. ەڭ قىزىعى, ول اقوردانى ەلباسىنىڭ تۇراتىن ءۇيى دەپ ويلايدى. كەلەسى جولى اقورداعا قوناققا بارام دەپ وتىر…
كوردىڭىز بە, بالا كوڭىل ءوزىنىڭ ارماندارىنا قالتقىسىز سەنەدى. بالاباقشاداعى بۇلدىرشىندەردىڭ ءبىرى عارىشكەر, ەندى ءبىرى پرەزيدەنت بولعىسى كەلەدى. ولار «الىپپەنىڭ» العاشقى بەتىنە تىلەك جازعان نۇرسۇلتان اتالارىنا ەلىكتەيدى. كەيبىرەۋى «ەگەر, مەن پرەزيدەنت بولسام, بارشا جانعا كامپيتتى تەگىن تاراتاتىن ەدىم» دەپ قازىردەن شىعارما جازىپ ءجۇر.
اقوردانىڭ «ينستاگرامداعى» اككاۋنتىندا ەلباسى نۇرسۇلتان نازارباەۆتىڭ بالاباقشا, مەكتەپ, لاگەر, ساياباقتارعا بارعاندا بالالارمەن تۇسكەن سۋرەتى ءجيى جاريالانادى. سۋرەتتەردە بارعان جەرىندە كۇلىمدەي قول بۇلعاپ جۇرەتىن پرەزيدەنتىمىزدىڭ ءوزىنىڭ ەرەكشە اۋراسىمەن بالدىرعانداردى بىردەن باۋراپ الاتىنى بايقالادى. ەندەشە, بالاقايلاردىڭ قاي-قايداعى ويدان قۇراستىرىلعان كەيىپكەرلەردى ەمەس, كوز الدىندا جۇرگەن كوركەم كىسىنى ۇلگى ەتكەنى دە قيسىندى سياقتى.
