ەڭبەك ميگراتسياسىن رەتتەۋگە نازار اۋداردى
قازاقستان كاسىپوداقتار قاۋىمداستىعىنىڭ اتىنان قازاقستان رەسپۋبليكاسىنىڭ پرەزيدەنتتىگىنە ۇمىتكەر امانگەلدى تاسپيحوۆتىڭ سەنىمدى وكىلدەرى قوستاناي وبلىسىندا حالىقپەن كەزدەستى.
قوستاناي وبلىستىق كاسىپوداقتار قاۋىمداستىعى فيليالىنىڭ توراعاسى ا.دۇيسەكەنوۆ سويلەگەن سوزىندە ا.ءتاسپيحوۆتىڭ ەڭبەك جانە قوعامدىق قىزمەتى جونىندە اڭگىمەلەپ بەردى. سونىمەن قاتار, ۇمىتكەردىڭ سايلاۋ الدىنداعى باعدارلاماسىمەن تانىستىردى. بۇل باعدارلامادا جۇمىسشىلاردىڭ ەڭبەك قۇقىقتارىن قورعاۋعا, ەڭبەك ميگراتسياسىن رەتتەۋگە ەرەكشە نازار اۋدارىلعان.
بالالاردى عالامتوردىڭ كەرى اسەرىنەن قورعايىق
جاقىندا قر پرەزيدەنتتىگىنە ۇمىتكەر جامبىل احمەتبەكوۆتىڭ سەنىمدى وكىلدەرى ج.نۇراليەۆ پەن «حالىق كوممۋنيستەرى» فراكتسياسىنىڭ دەپۋتاتى ي.سميرنوۆا تارازداعى وبلىستىق قازاق دراما تەاترىندا بەلسەندى جاستارمەن جانە قازاقستان كوممۋنيستىك جاستار وداعىنىڭ مۇشەلەرىمەن كەزدەستى.
ج.نۇراليەۆ ۇمىتكەردىڭ سايلاۋالدى باعدارلاماسىن تانىستىرۋ بارىسىندا بۇگىنگى جاستاردىڭ ۇستانىمدارى مەن مورالدىق تاربيەسىن تىلگە تيەك ەتتى. ول ءوز سوزىندە حالىقشىل كوممۋنيستەردىڭ ينتەرناتسيوناليزمنىڭ, ەۋرازياشىلدىق يدەيانىڭ جاقتاۋشىسى ەكەنىن اتاپ ءوتتى. جيىن سوڭىنان ۇمىتكەردىڭ سەنىمدى وكىلدەرى جاستاردى سايلاۋعا قاتىسۋعا شاقىردى.
سايلاۋشىلار ءوز پىكىرلەرىن ورتاعا سالدى
جۋىردا جامبىل وبلىسىندا قر پرەزيدەنتتىگىنە ۇمىتكەر ءامىرجان قوسانوۆتى قولداۋعا باعىتتالعان كەزەكتى ۇگىت-ناسيحات ءىس-شارالارى ءوتتى.
وبلىستىق شتابتا ۇمىتكەردىڭ سەنىمدى وكىلدەرى تاراز قالاسىنىڭ تۇرعىندارىمەن كەزدەستى. باسقوسۋعا جيىرماعا جۋىق ادام قاتىستى. ءسوز تىزگىنىن وبلىستىق سايلاۋالدى شتابىنىڭ باسشىسى باقىتجان ماحاشەۆ ۇستادى. كەزدەسۋ بارىسىندا ءامىرجان قوسانوۆتىڭ سايلاۋ الدىنداعى باعدارلاماسىنىڭ نەگىزگى باعىتتارى تالقىلاندى. سايلاۋشىلار ءوز پىكىرلەرىن ورتاعا سالدى.
كوللەدجدەگى كەزدەسۋ
«اق جول» پارتياسىنىڭ اتىنان پرەزيدەنتتىككە ۇمىتكەر دانيا ەسپاەۆا سايلاۋالدى شتابتىڭ جەتەكشىسى ازات پەرۋاشەۆپەن بىرلەسىپ, ەلورداداعى گۋمانيتارلىق-زاڭ كوللەدجىنىڭ وقىتۋشىلارى جانە ستۋدەنتتەرىمەن كەزدەستى.
ەمەن-جارقىن جۇزدەسۋدە جاستار ءوز ءومىرى تۋرالى اڭگىمەلەپ, ءارتۇرلى سۇراقتار قويدى. اسىرەسە, دانيا ەسپاەۆانىڭ بيزنەستى قولداۋ جونىندەگى باستامالارى ستۋدەنتتەردى دە قىزىقتىردى. ويتكەنى ولاردىڭ كوپشىلىگى وقۋ ورنىن ءتامامداپ, ۇلكەن ومىرگە اتتانعاندا ءوز كاسىبىن اشپاقشى.
كوللەدجدە بولاشاق زاڭگەر, اۋدارماشى جانە پەداگوگتار ءبىلىم الادى. ولاردىڭ اراسىندا باسقا قالالاردان كەلگەندەر كوپ.
توقاەۆقا تايقازان جولدادى
كەشە قازاقستان پرەزيدەنتتىگىنە ۇمىتكەر قاسىم-جومارت توقاەۆتىڭ رەسپۋبليكالىق قوعامدىق شتابىنىڭ مۇشەلەرى تۇركىستان وبلىسىندا جۇرتشىلىقپەن كەزدەستى.
شتاب مۇشەلەرى ساپارىن تۇركىستان قالاسىنىڭ جاڭادان سالىنىپ جاتقان اكىمشىلىك-ىسكەرلىك ورتالىعىنان باستادى. قۇرىلىس نىسانىنا ارنايى كەلگەن ولار قۇرىلىسشىلارمەن كەزدەسىپ, ق.توقاەۆتىڭ cايلاۋالدى باعدارلاماسىنىڭ باعىتتارىن ءتۇسىندىردى. ءىس-شارا بارىسىندا تۇركىستاندىق زيالى قاۋىم وكىلدەرى ق.توقاەۆقا ءوڭىر تۇرعىندارىنىڭ اتىنان حالىقتىڭ 7 اماناتى جازىلعان ارنايى حات سالىنعان تايقازان جولدادى.
«شاراپات» ورتالىعىنا باردى
«ۇلى دالا قىراندارى» رەسپۋبليكالىق قوزعالىسىنان پرەزيدەنتتىككە ۇمىتكەر رەتىندە تىركەلگەن سادىبەك تۇگەل نۇر-سۇلتان قالاسى اكىمدىگىنە قاراستى «شاراپات» الەۋمەتتىك قىزمەت كورسەتۋ ورتالىعىندا بولىپ, ارداگەرلەرمەن سۇحباتتاستى.
بۇل ورتالىق العاشىندا 1989 جىلى «قارتتار مەن مۇگەدەكتەرگە ارنالعان مەديتسينالىق-الەۋمەتتىك مەكەمە» بولىپ قۇرىلعان. 2016 جىلدان بەرى اتاۋى «شاراپات» بولىپ وزگەرگەن ورتالىق بۇگىندە 321 ادامعا قىزمەت كورسەتىپ كەلەدى. ورتالىق ديرەكتورى رىستى بايماعامبەتوۆانىڭ ايتۋىنشا, ولاردىڭ اراسىندا 2 سوعىس ارداگەرى مەن ولارعا تەڭەستىرىلگەن 8 ادام جانە 25 تىل ارداگەرى بار. قاريالار ءوز كوكەيىندەگى ساۋالدارىن قويدى.
ۆەلومارافونعا قاتىستى
پرەزيدەنتتىككە «اۋىل» پارتياسىنىڭ اتىنان ۇمىتكەر تولەۋتاي راحىمبەكوۆ ءوز سايلاۋشىلارىمەن بىرگە نۇر-سۇلتان قالاسىنداعى ۆەلومارافونعا قاتىستى.
بوتانيكالىق باقتاعى اۋقىمدى شاراعا 300 ادام قاتىستى. قاتىسۋشىلار 20 شاقىرىم جول ءجۇردى. تولەۋتاي راحىمبەكوۆتىڭ سايلاۋالدى باعدارلاماسىندا جاستاردى قولداۋعا, ولاردى رۋحاني جاعىنان جەتىلدىرۋگە ەرەكشە ءمان بەرىلگەن. «ارينە, دەنى ساۋ, رۋحى ازات جانە قۋاتتى ۇلتتى تاربيەلەۋ ءۇشىن ەلىمىزدە سپورتتى دامىتۋعا كوڭىل بولگەنىمىز ابزال» دەيدى ۇمىتكەر.
