نازىك جانداردىڭ مەرەيلى مەرەكەسىنىڭ قارساڭىندا San Belle ءسان ءۇيىنىڭ نەگىزىن قالاۋشى بەللا ءسات-مىرزا كومەككە مۇقتاج ايەلدەرگە قۋانىش سىيلاۋدى ۇيعاردى.
ول قيىن جاعدايعا تاپ بولعان ايەلدەرگە, سونىڭ ىشىندە كوپبالالى انالارعا, جالعىزباستى انالارعا, اۋىر دەرتكە شالدىققان ايەلدەرگە, مۇمكىندىگى شەكتەۋلى جاندارعا ءوز ءسان ءۇيىنىڭ توپتاماسىنان 50 كويلەكتى سىيعا تارتپاقشى.
«بۇل شارانىڭ ماقساتى – كۇن سايىن جاردەماقىمەن كۇنەلتەتىن, كوپ بالاسىمەن كىشكەنتاي بولمەلەردى جالداپ تۇراتىن, بالالاردى جالعىز ءوزى تاربيەلەپ وتىرعان جانە ءوز ءومىرىن ۇزارتۋ ءۇشىن تاپقان قاراجاتىن ءدارى-دارمەككە جۇمسايتىن ايەلدەردى قولداۋ. 8 ناۋرىز مەرەكەسى قارساڭىندا وسىنداي جاندارعا ەرەكشە قۋانىش, كوتەرىڭكى كوڭىل-كۇي سىيلاعىم كەلەدى» دەپ جازىپتى ب.ءسات-مىرزا الەۋمەتتىك جەلىدەگى پاراقشاسىندا. قايىرىمدىلىق اكتسياسى تۋرالى اقپارات جاريالانعان ساتتەن باستاپ 100-گە جۋىق ءوتىنىش تۇسكەن. الايدا ديزاينەر ۇمىتكەرلەردى مۇقيات تاڭدايتىنىن ايتادى. ول ءوزىنىڭ جازباسىندا لايىقتى دەگەن ايەلدەردى ءبىر جەرگە جيناپ, قۇتتىقتاپ, گۇل شوقتارىن تابىس ەتكىسى كەلەتىنىن دە ايتىپتى. «ماعان ەشقانداي جارنامانىڭ كەرەگى جوق. تەك باستامامدى ءدامحانا, گۇل دۇكەندەرىنىڭ يەلەرى, ۆيزاجيستەر جانە وزگەلەر قولداسا ەكەن دەيمىن» دەيدى بەللا ءسات-مىرزا.
