قالا يگىلىگىنە قاجەتتى نىساندار

جۋىردا قوعامدىق كەڭەس مۇشەلەرى قالاداعى نىسانداردىڭ كوممۋنالدىق مەنشىككە بەرىلۋىن تالقىلادى. باسقوسۋدا بىرنەشە جىل بويى كوممۋنالدىق مەنشىككە وتپەگەن جوبالاردىڭ ماسەلەسىن شەشۋ جونىندە وي-پىكىرلەر ورتاعا سالىندى. وسى جيىننىڭ الدىندا قوعامدىق كەڭەس مۇشەلەرى ءارتۇرلى سەبەپتەرمەن پايدالانۋعا بەرىلمەگەن تۇرعىن ءۇي-كوممۋنالدىق شارۋاشىلىعى نىساندارىن ارالاعان ەدى. قالىپتاسقان احۋالدى كوزىمەن كورگەن سوڭ, قالاداعى بارلىق باسقارمالار جانە قۇزىرلى مەكەمەلەردىڭ وكىلدەرىن ءبىر ۇستەلدىڭ باسىنا شاقىرىپ, ماسەلەنى تۇپكىلىكتى شەشۋ جولدارىن قاراستىردى.كوممۋنالدىق مەنشىك ساناتىنا ەنبەي قالعانداردىڭ ىشىندە مەكتەپكە دەيىنگى جانە جالپى ءبىلىم بەرەتىن نىساندار, مەديتسينالىق مەكەمەلەر, تۇرعىن ۇيلەرگە تارتىلعان ينجەنەرلىك توراپتار, جىلۋمەن-سۋمەن جابدىقتاۋ جۇيە­لەرى, كىشى ترانسفورماتور ستانسالارى, ت.ب. ماڭىزدى نىساندار بار. «ماسەلەن, №2 جىلۋ-ەلەكتر ورتالىعىنىڭ سالىنىپ, قالانى جىلۋمەن-سۋمەن قامتاماسىز ەتىپ تۇرعانىنا 15 جىلدان استى. ونىڭ قۇرىلىسىنا جۇزدەگەن ميلليارد قارجى جۇمسالدى. بىراق ءالى كۇنگە دەيىن جابدىقتار «استاناەنەرگيا­نىڭ» باسقارۋىنا بەرىلمەگەن. بۇدان قالا بيۋدجەتى جىل سايىن 2,4 ملرد شىعىنعا باتادى. بىزدە ءالى كۇنگە كۇتىمسىز قالعان قوسالقى ستانسالار, جىلۋ جەلىلەرى, جولدار, كوشەلەر بار» دەدى قوعامدىق كەڭەس توراعاسى سانسىزباي ەسىلوۆ.
سونداي-اق پايدالانۋعا بەرىلگەنىنە 4 جىل بولعان م-3 اۆتوموبيل كوپىرى ءالى كۇنگە يەسىز. ال كوپىردىڭ ۇستىنەن وسى ۋاقىت ىشىندە ميلليونداعان كولىك ءوتتى, اۋا رايىنىڭ كەرى ىقپالى بار, مۇنىڭ ءبارى ينفراقۇرىلىمنىڭ توزۋىنا اسەر ەتەتىنى ءسوزسىز. ەسكى قالانىڭ كۇرەتامىرى سانالاتىن جەڭىس داڭعىلىنىڭ جايى دا وسى: كەيبىر بولىكتەرى قالا بالانسىنا وتپەي قالعان. كولىك جانە جول-كولىك ينفراقۇرىلىمىن دامىتۋ باسقارماسىنىڭ وكىلدەرى پروبلەمالىق نىسانداردىڭ تولىق قارجىلاندىرىلماۋى سالدارىنان كوممۋنالدىق مەنشىككە وتپەگەنىن ءمالىم ەتتى. سونىمەن قاتار جەر تەلىمدەرىنىڭ قاتە راسىمدەلۋى سالدارىنان بۇگىندە 60 جوبا رۇقسات قۇجاتسىز جۇرگىزىلىپ جاتىر. ونىڭ شەشىمى دە اكىمدىكتىڭ ارالاسۋىن كۇتىپ وتىر. جيىندا قالاداعى يەسىز نىساندار بويىنشا بىرقاتار مەملەكەتتىك قۇرىلىم وكىلدەرىنىڭ ەسەبى تىڭدالىپ, تالقىلاندى. قوعامدىق كەڭەس مۇشەلەرى ءبىر ايدان كەيىن وسى ماسەلەلەر بويىنشا قۇزىرلى ورگانداردىڭ قايتادان ەسەپ بەرۋىن تاپسىردى.