بيىل ەلوردا تۇرعىندارى مەن قوناقتارىنا بوس ۋاقىتىن ءتيىمدى وتكىزۋگە ارنالعان ورىندار كوپتەپ پايدا بولىپ, اۋلالار مەن قوعامدىق كەڭىستىكتەردى اباتتاندىرۋ بويىنشا اۋقىمدى جۇمىستار جۇرگىزىلدى. بۇل جايىندا نۇر-سۇلتان قالاسىنىڭ اكىمى التاي كولگىنوۆ ينستاگرام پاراقشاسىندا جازدى.
بيىل باس شاھاردا 760 مىڭ شارشى مەتر (76 گەكتار) جەر اباتتاندىرىلىپ, قالا تۇرعىندارى سەرۋەندەپ, سپورتپەن اينالىسۋعا ارنالعان بىرقاتار جايلى ورىندار پايدالانۋعا بەرىلدى.
«اباتتاندىرۋ كەزىندە قالانىڭ ەسكى بولىگى مەن تۇرعىن الاپتارعا ەرەكشە نازار اۋدارىلدى. مىسالى, حالىق تىعىز ورنالاسقان اۋدانداردىڭ ءبىرى – بايقوڭىر اۋدانىندا 53 اۋلا مەن 13 ءىرى قوعامدىق كەڭىستىك سالىندى. «جاستار» ىقشام اۋدانىندا 50 كوپپاتەرلى تۇرعىن ءۇي كەشەنى ورنالاسقان. وندا 23 اۋلا اباتتاندىرىلدى. كوپشىلىكتىڭ كوڭىلى اۋعان جۇمىستىڭ ءبىرى – كوپىر استى كەڭىستىكتەر بولدى. ولاردىڭ ءبىرى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى ماڭىندا ورنالاسقان. ونداعى 3 مىڭ شارشى مەترلىك ورىنعا باسكەتبول, ۆوركاۋت جانە سكەيت-الاڭدار, تەننيس ۇستەلدەرى ورنالاستىرىلعان» دەپ جازادى قالا باسشىسى.
سونداي-اق شاھاردىڭ شەت ايماقتارىنا دا ەرەكشە نازار اۋدارىلدى. ماسەلەن, «ءوندىرىس» تۇرعىن الابىنداعى وتكەن عاسىردىڭ ەلۋىنشى جىلدارىندا سالىنعان ۇيلەر ءسۇرىلىپ, ونىڭ ورنىنا فۋتبول, باسكەتبول الاڭدارى بار شاعىن ساياباقتار سالىندى.
«قازىر سارىارقا اۋدانىندا 40 اۋلا مەن 20 قوعامدىق كەڭىستىك بار. «كوكتال-1» تۇرعىن الابىنداعى جاڭا ساياباقتىڭ كولەمى 16 گەكتاردى قۇرايدى. وندا سپورت پەن ويىن-ساۋىققا ارنالعان ۇلكەن اۋماقتان بولەك, امفي-تەاتر مەن جاس جۇبايلاردىڭ نەكە قيۋ ءراسىمىن وتكىزۋگە ارنالعان روتۋندا ورناتىلدى, يتپەن سەرۋەندەۋگە ارنالعان ارنايى الاڭ جابدىقتالدى. سونداي-اق جەلتوقسان, ءى.ەسەنبەرلين, ءا.جانگەلدين, س.سەيفۋللين كوشەلەرى, بەيبىتشىلىك داڭعىلى بويىندا ورنالاسقان اۋلالاردىڭ ءبىر بولىگى اباتتاندىرىلدى» دەيدى ەلوردا اكىمى.
سونىمەن قاتار الماتى اۋدانىندا دا 50-دەن استام اۋلا مەن قوعامدىق كەڭىستىك بار. قالاداعى العاشقى كوپىر كەڭىستىگىنىڭ اۋماعى 8 مىڭ شارشى مەتردەن اسادى جانە ترياتلون مەن پرەزيدەنتتىك ساياباقتار اراسىن بايلانىستىرىپ تۇرعان ارتەريا بولىپ سانالادى. اۋماق سپورت تۇرلەرىنە بولىنگەن. قالا تۇرعىندارىنا تەپلوحودپەن ءجۇرۋى ءۇشىن پيرستەر ورناتىلعان.
