قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا ۇمىتكەر جانات ساماتقىزى جانە ماڭعىستاۋ وبلىستىق ءماسليحاتىنىڭ دەپۋتاتتىعىنا ۇمىتكەر سەرىك عۇسمان اقتاۋ قالاسىنان 20 شاقىرىم جەردە ورنالاسقان پوليگوننىڭ باس جوسپارىمەن تانىستى.
اقتاۋ قالاسى مەن مۇنايلى اۋدانىنىڭ بارلىق قاتتى تۇرمىستىق قالدىعى وسىندا تاسىمالدانۋدا. پوليگوندا تەحنيكا مەن قاجەتتى قۇرال-جابدىقتىڭ جەتىسپەۋشىلىگى بايقالادى. جالپى وڭىردە قاتتى تۇرمىستىق قالدىقتى جيناۋمەن جانە شىعارۋمەن اينالىساتىن كاسىپورىندار سانى 20-دان اسادى.
قوقىس پوليگونى 2016 جىلى پايدالانۋعا بەرىلگەن. العاشىندا «كوكتەم» مكك بالانسىندا بولدى. قازىرگى ۋاقىتتا پوليگون ورنالاسقان جەر ۋچاسكەسى «ماڭعىستاۋ جىلۋ» مكك قارايدى. ال تۇرمىستىق قاتتى قالدىقتاردى قابىلداۋ جانە سۇرىپتاۋدى جەكە كاسىپكەرمەن جاساقتالعان كەلىسىمشارت نەگىزىندە جۇرگىزىلەدى. اقتاۋ قالاسى مۇنايلى اۋدانىنا قاراستى باتىر, اتامەكەن, باياندى, تۇپقاراعان اۋدانى اقشۇقىر اۋىلىنان كۇنىنە 1000-1300 كۋب قوقىس جەتكىزىلەدى. قالدىقتاردىڭ 70 پايىزى قايتا وڭدەۋگە جىبەرىلسە, قالعان 30 پايىزى جارامسىز قوقىس كۇيىندە قالىپ وتىر.
ماڭعىستاۋ وڭىرىندە قاتتى تۇرمىستىق قالدىقتاردى جيناۋ, سۇرىپتاۋ جانە قايتا وڭدەۋدىڭ تۇتاس ينفراقۇرىلىمىن قۇرۋ, سونداي-اق پوليگونداردى نورماتيۆتىك تالاپتارعا ساي ەتىپ جاساقتاۋ ازىرگە تەك قاعاز كۇيىندە قالىپ وتىرعانىنا ۇمىتكەرلەر قاتتى الاڭدايدى.
