كەشە «استانا تاڭداۋى» بايقاۋىندا باق سىناپ, قاراپايىم قالا تۇرعىندارىنىڭ كوڭىلىنەن شىققان ۇزدىك ۇستاز, دارىگەر, ينجەنەر, ەنەرگەتيك, قۇرىلىسشى جانە ۋچاسكەلىك ينسپەكتور مەن جول جوندەۋشىنى استانا قالاسىنىڭ اكىمى يمانعالي تاسماعامبەتوۆ قابىلداپ, ارنايى كۋبوك پەن العىسحاتتى تابىس ەتتى.
– بيىل ءۇشىنشى جىل قاتارىنان وتكىزىلىپ كەلە جاتقان «استانا تاڭداۋى» بايقاۋى – حالىق ءوزى تىكەلەي قاتىسىپ, جەڭىمپازدارىن وزدەرى تاڭدايتىن جوبا. بيىل سايىسقا قاتىسۋعا نيەت ەتكەن ازاماتتاردىڭ سانى 200-گە جۋىقتاپ, داۋىس بەرۋ كورسەتكىشى بۇرىن-سوڭدى بولماعان 164 مىڭعا جۋىقتاۋىنىڭ ءوزى كونكۋرستىڭ حالىقتىق سيپات العانىن اڭعارتسا كەرەك. ەندەشە, وسىنداي ايتۋلى بايقاۋدا سىزدەر قالا تۇرعىندارىنىڭ ىستىق ىقىلاسىنا, جوعارى باعاسىنا يە بولىپ وتىرسىزدار. سىزدەردى ءبىز ەمەس, حالىقتىڭ ءوزى تاڭدادى. وزدەرىڭىزدى تانىپ-بىلمەسە دە ەڭبەكتەرىڭىزدى كورىپ, لايىقتى باعاسىن بەرۋگە ءۇن قوسىپ وتىر. قاراپايىم حالىقتىڭ قۇرمەتىنە بولەنۋ, العىسىن الۋ – ەڭ ۇلكەن قۋانىش. وسىنداي بيىك مارتەبەگە قول جەتكىزىپ وتىرعان سىزدەردەي كاسىبي ماماندار – قالامىزدىڭ ماقتانىشى. جاستار سىزدەرگە قاراپ وي تۇزەپ, ىستەرىڭىزدەن ۇلگى الاتىنى انىق. قالانىڭ كوركەيۋى ءۇشىن جاساپ جاتقان ىستەرىڭىز العا باسا بەرسىن, – دەدى قالا اكىمى قۇتتىقتاۋ سوزىندە.
«استانا تاڭداۋى» بيىل ەكى كەزەڭ بويىنشا وتكىزىلگەن. وسى مەرزىم ىشىندە بايقاۋدىڭ ۇيىمداستىرۋ كوميتەتىنە 195 ۇمىتكەردەن 250 ءوتىنىم كەلىپ تۇسكەن. كونكۋرسقا قاتىسۋعا ىقىلاس تانىتقانداردىڭ كوپشىلىگى ۇستازدار قاۋىمى ەكەن.
بۇل بايقاۋدىڭ ەرەكشەلىگى سول, جەڭىمپازداردى حالىقتىڭ ءوزى داۋىس بەرۋ ارقىلى تاڭدايدى. داۋىس بەرۋ ءادىل ءوتۋ ءۇشىن تەك ءبىر ەلەكتروندى مەكەنجايدان ءبىر عانا داۋىس قابىلدانعان. ونلاين رەجيمىندە جۇرگىزىلگەن داۋىس بەرۋ جۇيەسى استانا قالاسى اكىمدىگىنىڭ سايت پاراقشاسىندا اۆتوماتتى تۇردە بىردەن كورىنىپ قانا قويماي, قانداي قاتىسۋشىعا قانشا داۋىس بەرىلگەنىن تۇرعىندار دا باقىلاپ وتىرعان.
سونىمەن, جەتى اتالىم بويىنشا وتكەن بايقاۋدىڭ «ۇزدىك مۇعالىم»اتالىمىندا 28 مىڭ داۋىس جيناعان «استانا دارىنى» عىلىمي-ءتاجىريبەلىك ورتالىعىنىڭ ديرەكتورى مايرا قۇرمانباەۆا جەڭىمپاز بولدى. ماراپاتتاۋ ءراسىمىندە ول: «حالىق 20 كۇن بويى ۇزدىكتەردى انىقتاپ, داۋىس بەرسە, بۇل مەن ءۇشىن 20 رەت قوبالجۋ, 20 رەت قۋانۋ ءارى 20 جىلعى ەڭبەگىمە قايتادان شولۋ جاساپ, تاجىريبەمدى شىڭداۋ بولدى» دەدى اعىنان جارىلىپ.
ال, قالا تۇرعىندارىنىڭ قالاۋى بويىنشا, «ەڭ ۇزدىك دارىگەر» رەتىندە №1 قالالىق اۋرۋحانانىڭ جوعارى ساناتتى ۋرولوگ-دارىگەرى كيريلل چيچەروۆ تانىلدى. «ۇزدىك جول جوندەۋشى» – «پروگرەسس KZ» جشس ينجەنەرى بەكزات مۋسەەۆ بولسا, «ۇزدىك ۋچاسكەلىك پوليتسيا ينسپەكتورى» اتاعىن الماتى اۋداندىق ىشكى ىستەر باسقارماسىنىڭ ۋچاسكەلىك ينسپەكتورى باۋىرجان تاۋماحانوۆ ەنشىلەسە, قالالىق ەنەرگەتيكا باسقارماسىنىڭ ەنەرگيامەن قامتاماسىز ەتۋ ءبولىمىنىڭ باسشىسى ولجاس يششانوۆ – ۇزدىك ەنەرگەتيك, «باي-تان كومپانياسى» جشس ديرەكتورى ەركىن وماروۆ – ۇزدىك قۇرىلىسشى, «№1 اۆتوبۋس پاركى» اق-نىڭ اۆتوبۋس جۇرگىزۋشىسى سەرىك اداەۆ – ۇزدىك قوعامدىق كولىك جۇرگىزۋشىسى اتاندى.
وسىنىڭ الدىندا عانا ءبىر اي بويى «استانا تاڭداۋى» بايقاۋىنا قاتىسۋشىلار تۋرالى كتك تەلەارناسىنان ارنايى كۇندەلىك ازىرلەنىپ, جۇرتشىلىققا جول تارتقان بولاتىن. ەندى ۇزدىك شىققان جەڭىمپازداردىڭ فوتوسۋرەتتەرى قالانىڭ كورنەكتى جەرىندەگى بيلبوردتاردا ىلىنەتىن بولادى.
ماراپاتتاۋ راسىمىندە ەلوردا اكىمى تاعى ءبىر جاعىمدى جاڭالىقتى جەتكىزدى. «استانا تاڭداۋىنىڭ» جەڭىمپازدارى بۇدان بىلاي مەملەكەتتىك ماراپاتقا دا ۇسىنىلماقشى. «جۇرتشىلىقتىڭ وزدەرى سىزدەردى تاڭداپ وتىر. دەمەك, مەملەكەتتىك سىيلىق يەگەرلەرىن انىقتايتىن كوميسسيا مۇشەلەرى حالىقتىڭ بۇل قالاۋىنا قارسى كەلە قويماس دەپ ويلايمىن» دەدى قالا اكىمى.
قىمبات توقتامۇرات
