پارلامەنت ءماجىلىسىنىڭ دەپۋتاتتارى ەلدوس اباقانوۆ پەن باۋىرجان سارتباەۆ ەلورداداعى قالدىق وڭدەۋ كەشەنىنىڭ جۇمىسىمەن تانىستى. كەشەن 2008 جىلى ىسكە كىرىسكەن. ال 2011 جىلدان بەرى تۇراقتى تۇردە جۇمىس ىستەپ كەلەدى. كاسىپورىننىڭ ىسكە قوسىلعانىنا 10 جىلدان استام ۋاقىت ءوتتى.
«قازىر كەشەن 310 مىڭ توننانى قابىلدايدى. نۇر-سۇلتان قالاسى تۇرعىندارىنىڭ سانى جىل سايىن 7 پايىزعا ارتىپ كەلە جاتقانمەن, بۇگىنگى تاڭدا كەشەن قالاعا تولىققاندى قىزمەت كورسەتە الماي وتىر» دەدى ەلدوس اباقانوۆ.
قازىرگى تاڭدا كەشەندە قايتا وڭدەۋ جەلىسى ءجيى ىستەن شىعادى. سونىڭ اسەرىنەن اپتاسىنا ءارتۇرلى جابدىقتاردىڭ 70-كە جۋىق بۇزىلۋى ورىن الادى. بۇل ماسەلەنى شەشۋگە كوپ ۋاقىت قاجەت. قايتا وڭدەۋ جەلىسىن جاڭارتقاندا ونىمدىلىك جىلىنا 450-570 مىڭ تونناعا جەتەدى. سونداي-اق سۇرىپتاۋ تيىمدىلىگىنىڭ دەڭگەيى 80-نەن 95 پايىزعا دەيىن ارتادى.
دەپۋتاتتار كەشەن جۇمىسشىلارىمەن دە سويلەسىپ, جاعدايلارىنا ءۇڭىلدى. كەشەن جۇمىسشىلارىنىڭ ايتۋىنشا, ولارعا جاعداي جاسالعان ءارى ارنايى كولىك بار. جۇمىسشىلار ماسەلە رەتىندە قوقىس وڭدەۋ كەشەنىنىڭ جانىندا ايالدامالار جوعىن اتاپ ءوتتى. ەلوردا اكىمدىگى بۇل ماسەلەنى نازارعا الدى.
