قالالىق ءماسليحاتتىڭ زاڭدىلىق, قۇقىق ءتارتىبى جانە جۇرتشىلىقپەن جۇمىس ماسەلەلەرى جونىندەگى تۇراقتى كوميسسيانىڭ وتىرىسىندا جايسىز وتباسىلار جايىندا ايتىلدى.
وتكەن جىلى نۇر-سۇلتان قالاسىندا 15 اتا-انا قۇقىعى شەكتەلىپ, 16-سى بۇل قۇقىقتان ايىرىلعان. 10 بالا قولايسىز جاعدايعا بايلانىستى وتباسىلارىنان الىنىپ, بالالار ۇيىنە تاپسىرىلعان. 400-دەن اسا ءجاسوسپىرىم «پراۆو» قوعامدىق قورىنىڭ پسيحولوگيالىق كومەگىنە جۇگىنگەن. ال يۋۆەنالدى پوليتسيا 213 وتباسىنى جايسىز دەپ تانىپ, ارنايى تىركەۋگە العان. 313 شاڭىراق بالا تاربيەسىنە قىرىن قاراپ, ءتيىستى تۇردە تاربيە بەرە الماعانى ءۇشىن جاۋاپكەرشىلىككە تارتىلعان.
«نۇر-سۇلتان قالاسى اكىمدىگىنىڭ جانىنداعى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيانىڭ كامەلەتكە تولماعانداردىڭ قۇقىقتارى مەن زاڭدى مۇددەلەرىن قورعاۋ جانە قالپىنا كەلتىرۋ شارالارىن جۇزەگە اسىرۋ جونىندەگى جۇمىسى تۋرالى» ماسەلە تالقىعا سالىنعان وتىرىستا شاھار اكىمدىگى حاتشىلىعىنىڭ ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسياسىنىڭ باس ينسپەكتور-حاتشىسى انار مۇقاشەۆا, ءبىلىم باسقارماسىنىڭ باسشىسى قاسىمحان سەنعازىەۆ بايانداما جاساپ, اتقارىلعان جۇمىستاردى اتاپ ءوتتى.
يۋۆەنالدى پوليتسيا قىزمەتكەرلەرى قالاداعى ءبىلىم وشاقتارىندا 400-دەن اسا كەزدەسۋ مەن ءدارىس وتكىزىپ, 10 مىڭ وقۋشىنى قامتىعانىنا قاراماستان, سۇمدىق ساندار سانانى تىتىركەندىرەرى ءسوزسىز. 49 رەت وتكەن اتا-انالار جينالىسىنا 2000-عا تارتا ادام قاتىسقان.
قاسىمحان سەنعازىەۆتىڭ سوزىنشە, باس قالادا قاڭتار ايىنىڭ وزىندە 46 بالانى تاربيەمەن, ماتەريالدىق مۇمكىندىكپەن قامداي الماعان 26 وتباسى ارنايى ەسەپكە الىنعان. باسقارما باسشىسى اتالعان ماسەلەنى وڭتايلى شەشۋ ءۇشىن ءبىرشاما ۇسىنىستارىمەن ءبولىسىپ, جوسپارىمەن تانىستىردى.
ءماسليحات دەپۋتاتى باقداۋلەت جاندىلداەۆ قيىن جاعدايعا تۇسكەن وتباسىلارمەن كەزدەسۋ بارىسىندا بالالاردى تەگىن سپورتتىق جانە شىعارماشىلىق ۇيىرمەلەرگە بەرۋگە بولاتىنىنان بەيحابار جانۇيالار بار ەكەنىن ايتىپ, وسى باعىتتاعى جۇمىستاردى شيراتىپ, جاڭادان «وتباسى ماسەلەلەرى بويىنشا قالالىق باسقارما» قۇرۋدى ۇسىندى. تاعى ءبىر حالىق قالاۋلىسى ەرلان داكەنوۆ ءوز تاراپىنان كامەلەتكە تولماعان وقۋشىلار اراسىندا الىمجەتتىك كورسەتۋ ماسەلەسىن قاراستىرۋدى ايتىپ, الداعى ۋاقىتتا تاقىرىپ بويىنشا جاسالعان جوسپارلاردى قاراپ, بەكىتەتىنىن ايتتى.
ال سالتانات جەنالاەۆا ءبىر عانا كوميسسيا الىپ شاھارداعى ماسەلەنى يگەرە المايتىنىن ايتىپ, وسىنداي كوميسسيانىڭ قالانىڭ ءتورت اۋدانىندا قۇرۋ قاجەت دەدى.
بايجان ەمبەردى
