شەتەلدە تۇراتىن قانداستاردىڭ جوعارى ىسكەرلىك بەلسەندىلىگى قازاقستان ءۇشىن وتاندىق ءونىمنىڭ ەكسپورتتىق الەۋەتىن دامىتۋ, وزىق تەحنولوگيالار ء(بىلىم) ترانسفەرتى مەن ينۆەستيتسيالار تارتۋ ءۇشىن ۇلكەن مۇمكىندىكتەر اشادى. ولاردىڭ كاسىبي قۇزىرەتتىلىگى, جەرگىلىكتى ءتىلدى, قۇقىقتىق بازانى جانە نارىق كونيۋنكتۋراسىن ءبىلۋ, سونداي-اق ىسكەرلىك تاجىريبەسىنىڭ بولۋىن ەكونوميكانىڭ ءتۇرلى سەكتورلارىندا پايدالانۋعا بولادى.
وسىعان بايلانىستى, 2019 جىلى 8 مەملەكەتتە (گفر, تۇركيا, اقش, وزبەكستان, ۇلىبريتانيا, شۆەتسيا, رف, موڭعوليا) «وتانداستار قورىنىڭ» ۇيىمداستىرۋىمەن 500-گە جۋىق ىسكەر قانداستاردى قامتىعان جوعارى دەڭگەيدەگى بيزنەس-فورۋمدار وتكىزىلدى.
وكىنىشكە قاراي, 2020 جىلى الەمدە COVID-19 ىندەتىنىڭ ورشۋىنە بايلانىستى ىسكەرلىك كەزدەسۋ ۇيىمداستىرۋ مۇمكىن بولمادى. دەگەنمەن, «وتانداستار قورى» شەتەلدەگى ىسكەر قانداستارمەن بايلانىستى ۇزبەۋ ماقساتىندا ءىس-شارالاردى ونلاين فورماتتا ۇيىمداستىرۋدى ۇسىنىپ, Zoom پلاتفورماسىندا «قانداستار فورۋمى» اتتى 7 ونلاين-كەزدەسۋ (تۇركيا, وزبەكستان, رف, يران, موڭعوليا, اقش جانە ەۋروپا قازاقتارىمەن) وتكىزۋدى جوسپارلاعان بولاتىن.
«قانداستار فورۋمىن» وتكىزۋدەگى باستى ماقسات – الەمدە ورشىگەن پاندەميادان كەيىنگى شەتەلدە تۇراتىن قازاقتاردىڭ الەۋمەتتىك-ەكونوميكالىق جاعدايلارىن انىقتاي وتىرىپ, ولاردى قر-داعى قولايلى ينۆەستيتسيالىق كليماتپەن تانىستىرۋ بولدى. ءىس-شارالارعا سپيكەرلەر رەتىندە سىرتقى ىستەر مينيسترلىگى, ساۋدا جانە ينتەگراتسيا مينيسترلىگى جانە «KazakhInvest» ۇك» اق وكىلدەرى شاقىرىلدى.
العاشقى ءىس-شارا 16 قىركۇيەكتە تۇركيادا تۇراتىن قانداستاردىڭ قاتىسۋىمەن ۇيىمداستىرىلدى. ونلاين-كەزدەسۋ ناتيجەسىندە «KazakhInvest» ۇك» اق-تىڭ تۇركياداعى وكىلى نۇرلان احمەتوۆ پەن قازاقستان رەسپۋبليكاسىنا ينۆەستيتسيا تارتۋ سۇراقتارى بويىنشا ستامبۋل قالاسىنان ەرول يولچى, ەرتولقىن گايراتۋللا جانە انتاليا قالاسىنان اقمارال گابديەۆا تۇركيادا تۇراتىن ءىرى كاسىپكەرلەردى بايلانىستىرۋ جۇمىستارىن ىسكە اسىراتىن بولادى. سونىمەن قاتار, قانداسىمىز ەرتولقىن گايراتۋللا مىرزا ستامبۋل جانە انكارا قالالارىندا «قازاقتاردىڭ مادەني-ىسكەرلىك ورتالىعىن» اشۋ تۋرالى ۇسىنىس جاسادى.
2020 جىلى 5 قازان كۇنى ونلاين-كەزدەسۋ وزبەكستاندا تۇراتىن قازاقتاردىڭ قاتىسۋىمەن جالعاستى. ءىس-شارا بارىسىندا وزبەكستانداعى قازاق ورتالىعىنىڭ باسشىسى سەرىكباي نازارۇلى 2 قازان «وتانداستار قورىنىڭ» قولداۋىمەن تاشكەنت قالاسىندا اشىلعان «Abai ءۇيى» قازاق مادەني-ىسكەرلىك ءۇيىنىڭ جۇمىس كەستەسىنە قازاقستان رەسپۋبليكاسىنا ينۆەستورلاردى تارتۋ ماسەلەسىن ەنگىزەتىنىن جەتكىزدى.
رەسەي قازاقتارىمەن 12 قازاندا ۇيىمداستىرىلعان ىسكەرلىك كەزدەسۋگە رف-نىڭ 10-نان استام ايماعىنان وتانداستارىمىز قاتىستى. ءوز كەزەگىندە, رەسەيدە تۇراتىن قانداستارىمىز الەمدىك پاندەميانىڭ الەۋمەتتىك-ەكونوميكالىق جاعدايلارىنا تيگىزگەن كەرى اسەرى تۇرعىسىندا ءسوز قوزعاپ, جاقىندا عانا ومبى قالاسىندا اشىلعان «اباي ءۇيى» مادەني-ىسكەرلىك ءۇيىنىڭ رەسەيدىڭ باسقا قالالارىندا دا اشىلۋىنا تىلەك ءبىلدىردى. سونىمەن قاتار, كاسىپكەر قانداستارىمىز جىل سايىنعى «رەسەي مەن قازاقستان ءوڭىرارالىق ىنتىماقتاستىق فورۋمىنا» قاتىسۋدى اسىعا كۇتەتىنىن اتاپ ءوتتى.
بيىلعى جىلى 16 قازان ەۋروپا قازاقتارىنىڭ قاتىسۋىمەن وتكەن ونلاين-كەزدەسۋگە 40-قا جۋىق قانداسىمىز قاتىستى. گەرمانيانىڭ ميۋنحەن قالاسىنان ءومىرحان التىن, ۋكراينانىڭ كيەۆ قالاسىنان باتىر نيازبەكوۆ, يسپانيانىڭ مادريد قالاسىنان جانات نۇرباەۆا, شۆەتسيانىڭ ستوكگولم قالاسىنان مۇرات ەرميش جانە باسقا دا بىرقاتار وتانداستارىمىز ەۋروپاداعى قازاقتاردىڭ الەمدىك پاندەميادان كەيىنگى ەكونوميكالىق جاعدايلارى تۋرالى باياندادى. سونىمەن قاتار ءوز قالالارىنداعى ىسكەر قانداستار مەن كاسىپكەرلەرگە قر-داعى بيزنەس-كليمات بويىنشا اقپاراتپەن ءبولىسىپ, ولاردى وتانىمىزعا ينۆەستيتسيا قۇيۋعا شاقىراتىندىعىن جەتكىزدى.
Zoom پلاتفورماسىندا وتكەن ءىس-شاراعا ەۋروپادا وقىپ جۇرگەن قازاق ستۋدەنتتەرى دە قاتىستى. سونىڭ ءبىرى, «بولاشاق» باعدارلاماسىمەن شۆەيتساريادا ءبىلىم الىپ جۇرگەن الىشەر تۇرسىن, قانداستارمەن قاتار, شەتەلدە وقىپ جۇرگەن قازاق جاستارىن ەلىمىزدەگى قولايلى ينۆەستيتسيالىق جاعدايدى وزگە ەلدىڭ ازاماتتارىنا تانىستىرا ءجۇرۋدى ۇسىندى.
كەزەكتى ءىس-شارا يراندا تۇراتىن قانداستارىمىزدىڭ قاتىسۋىمەن 23 قازاندا ۇيىمداستىرىلدى. ونلاين كەزدەسۋ بارىسىندا يرانداعى قانداستارىمىز الەۋمەتتىك-ەكونوميكالىق جاعدايلارى تۇراقتى ەكەنىن بايانداپ, نەگىزگى اينالىساتىن كاسىپ تۇرلەرى: اگروونەركاسىپ, لوگيستيكا جانە جەڭىل ونەركاسىپ سالالارى ەكەنىن ايتىپ ءوتتى.
ءىس-شارا ناتيجەسىندە يراندا تۇراتىن مۇحاممەد قازاق ەسىمدى كاسىپكەر قانداسىمىزعا قىمىز, ءسۇت ونىمدەرىن ءوندىرۋ بويىنشا قازاقستاندىق كەڭەس بەرەتىن مامانداردى تانىستىرۋ ۇسىنىلدى. 5 قاراشا قىرعىزستان قازاقتارىمەن كەزەكتى ونلاين-كەزدەسۋ ءوتتى. قىرعىز رەسپۋبليكاسىنداعى كۇردەلى ساياسي جاعدايعا قاراماستان, ونداعى قازاقتاردىڭ احۋالى تۇراقتى ەكەنىن جەتكىزىپ, الداعى ۋاقىتتا ەكى ەل اراسىنداعى شەكارانىڭ اشىلىپ, بايلانىستاردىڭ تەزىرەك قايتا قالپىنا كەلۋىنە تىلەك ءبىلدىردى.
جوسپارلانعان ونلاين-
كەزدەسۋلەردىڭ سوڭعىسى 2020 جىلى 17 قاراشا اقش-تا تۇراتىن وتانداستارىمىزدىڭ قاتىسۋىمەن ۇيىمداستىرىلدى. ءىس-شارانى «وتانداستار قورى» كەاق ۆيتسە-پرەزيدەنتى سارباسوۆ ماعاۋيا قاناپياۇلى رەسمي اشىپ, قوعامنىڭ شەتەلدە تۇراتىن قانداستاردى قولداۋ باعىتىنداعى جوبالار جايلى ايتىپ ءوتتى.
ونلاين-كەزدەسۋ بارىسىندا, بەلگىلى اقىن قالقامان سارين بۇگىنگى قازاقتىڭ ءتىلى مەن مادەنيەتىنىڭ شەتەلدە تۇراتىن قازاقتار اراسىندا ساقتالۋى مەن دارىپتەلۋ ماسەلەسىن كوتەردى.
قانداستار فورۋمىنا ارنايى شاقىرىلعان BTS Education باس ديرەكتورى ساياسات نۇربەك, اقش-تا جۇمىس ىستەپ جۇرگەن قازاق جاستارىنا «قازاقستانداعى جاڭا ماماندىقتار مەن داعدىلار اتلاسى» ۇلتتىق جوباسىن تانىستىردى. سونىمەن قاتار, قازاقستاندا العاش رەت فرانتسۋزدىق «Ecole 42» يننوۆاتسيالىق ادىستەمە جۇيەسى نەگىزىندە, جاستارعا يننوۆاتسيا مەن IT-تەحنولوگيالاردى تەگىن وقىتاتىن «Alem» مەكتەبى قۇرىلعانىن جانە قازىرگى ۋاقىتتا, سۇرانىسقا يە, الەمدىك دەڭگەيدەگى IT مامانداردى دايارلاپ جاتقاندىعىن ايتىپ ءوتتى.
اقش-تا جۇرگەن قازاق جاستارىنا «بولاشاق» حالىقارالىق ستيپەندياسى بويىنشا تۇبەگەيلى اقپاراتتى «حالىقارالىق باعدارلامالار ورتالىعى» اق پرەزيدەنتى كاربوزوۆا اينۇر باعداتقىزى جەتكىزدى.
وزدەرىڭىزگە بەلگىلى, شەتەلدە ءبىلىم الىپ جاڭا تەحنولوگيالاردى مەڭگەرىپ, شەتەلدەگى ءىرى كومپانيالاردا جۇمىس ىستەپ تاجىريبە جيناعان ءبىرشاما وتانداستارىمىز قازاقستانعا كەلىپ جارقىن بولاشاق قۇرۋ ءۇشىن ايانباي ەڭبەك ەتۋدە. وسى سىندى قانداستارىمىزدىڭ ءبىرى, 90-جىلدارى ەلىمىزگە قونىس اۋدارىپ, ۇلىبريتانيا, يسپانيا, تۇركيا, اقش ەلدەرىندە ءبىلىم الىپ, قازىرگى ۋاقىتتا ۇلت ءۇشىن قىزمەت ەتىپ جاتقان نازگۇل جاردانبەك, اقش-تاعى وتانداستارىمىزدىڭ قازاقستان ءۇشىن ماڭىزدى ادامي كاپيتال ەكەندىگىن العا تارتتى.
جالپى, 300-دەن استام قانداستاردى قامتىعان «قانداستار فورۋمى» ونلاين-كەزدەسۋلەرىن ۇيىمداستىرۋ ارقىلى جاڭا سەرىكتەستەردى ىزدەۋ, ىسكەرلىك جانە گۋمانيتارلىق بايلانىستار ورناتۋ, شەتەلدىك قوعامداستىققا قازاقستان رەسپۋبليكاسىنىڭ ءتۇرلى سالالارداعى مۇمكىندىكتەرىن كورسەتۋ ءۇشىن ءتيىمدى الاڭدى قامتاماسىز ەتتى.
جاندوس قونىسبەك,
«وتانداستار قورى» كەاق
قانداستاردى قولداۋ
دەپارتامەنتىنىڭ كەڭەسشىسى
