جۋىردا ەلوردادا سارىارقا اۋدانىنىڭ اكىمى ەرعالي ەگەمبەردىنىڭ قولداۋىمەن ۇلتتىق قۇندىلىقتاردى دارىپتەۋ, ءپاتريوتيزمدى دامىتىپ, باسەكەگە قابىلەتتى ۇلتجاندى تۇلعا تاربيەلەۋ ماقساتىندا «قارا شاڭىراق» جوباسى جۇمىسىن باستادى. ۇلتجاندى ازاماتتار دوڭگەلەك ۇستەل باسىندا جينالىپ, جوبانىڭ قالاي ءوربيتىنىن تالقىلادى.
«قازىرگى قوعامدا بولىپ جاتقان جاستارىمىزدىڭ ءتۇرلى بەيباستاق ارەكەتتەرى, ۇياتسىز قىلىقتارى, ۇلكەنگە قۇرمەتتىڭ ازايۋى, اجىراسۋ, بالالاردىڭ جەتىم قالۋى, جەمقورلىق جانە تاعى سونداي ماسەلەلەر كوبەيىپ كەتتى. بۇل ءبىر رۋحاني كەسەل بولدى. وسى دەرت دەندەپ, ۇرپاعىمىزعا كەسىرى تيمەسىن دەسەك, قوعامدى رۋحاني ساۋىقتىرۋ كەرەك. جاس ۇرپاقتىڭ بويىنا ار, ۇيات, نامىس, كىسىلىك سىندى قاسيەتتەردى بالا كەزىنەن ءسىڭدىرۋ كەرەك. قازاقتا ار, ۇيات ءاردايىم قۇندى بولعان. جاستاردى اردى جاسىنان ساقتاۋ, ۇياتتى, نامىستى بارىنەن بيىك قويۋعا تاربيەلەۋىمىز كەرەك. قازاقتىڭ بويىنداعى, قانىنداعى ۇيىقتاپ جاتقان نارسەنى وياتۋ قاجەت. ونىڭ ءبىر-اق جولى بار. ول – ۇلتتىق قۇندىلىقتارعا نەگىزدەلگەن ءتالىم-تاربيە. «ەل بولامىن دەسەڭ, بەسىگىڭدى تۇزە» دەپ تەكتەن-تەككە ايتىلماعان. وسى ماقساتتا رۋحى ءبىر, يدەياسى, ويى ءبىر جەرگە تۇيىسكەن ۇلت جاناشىرلارى, قوعام بەلسەندىلەرى بولىپ, «قارا شاڭىراق» جوباسىن قولعا الدىق» دەدى جوبانىڭ باستاماشىسى, تاريحشى تۇرار شاكەن.
بۇعان قوسا, بەلگىلى عالىمدار مىرزاگەلدى كەمەل مەن جامبىل ارتىقباەۆ, وزگە دە ۇلت جاناشىرلارى جوبا جايلى پىكىرلەرىن ءبىلدىردى.
