قارجى جۇيەسىنىڭ تۇراقتىلىعى قاجەت
وسى اپتادا مەملەكەت باسشىسى نۇرسۇلتان نازارباەۆ پرەمەر-مينيستر كارىم ءماسىموۆ جانە ۇلتتىق بانك توراعاسى قايرات كەلىمبەتوۆتى قابىلدادى.
اتالمىش باسقوسۋدا ك.ءماسىموۆ مەملەكەت باسشىسىنا ەلىمىزدىڭ ءبىرىنشى جارتىجىلدىقتاعى ەكونوميكالىق دامۋىنىڭ نەگىزگى قورىتىندىلارى جونىندە ايتىپ, ۇكىمەتتىڭ ەكىنشى جارتىجىلدىققا ارنالعان جۇمىس جوسپارى تۋرالى باياندادى.
پرەزيدەنت ءوز سوزىندە نەگىزگى ماكروەكونوميكالىق كورسەتكىشتەردىڭ جانە ۆاليۋتا نارىعىنداعى احۋالدىڭ تۇراقتىلىعىن قامتاماسىز ەتۋ قاجەتتىلىگىن اتاپ ءوتتى. سونداي-اق, الەمدىك قارجى نارىقتارىندا قالىپتاسىپ وتىرعان احۋالعا وراي ۇدايى بولاتىن قاتەرلەرگە تالداۋ جۇرگىزۋگە باسا نازار اۋداردى.
ال, ق.كەلىمبەتوۆ باسقوسۋدا ەلدىڭ قارجى سەكتورى مەن بانك جۇيەسىنىڭ جاعدايى, سونداي-اق, ۇلتتىق بانك جۇرگىزىپ وتىرعان اقشا-كرەديت ساياساتى جونىندە مالىمدەدى. ونىڭ ايتۋىنشا, 2014 جىلدىڭ ءبىرىنشى توقسانىندا ءىجو ناقتى ءوسىمى 3,8% بولدى. الدىن الا دەرەكتەر بويىنشا, ۇلتتىق قور ءمولشەرى شامامەن 77 ملرد اقش دوللارىنا جەتكەن.
كەزدەسۋ سوڭىندا مەملەكەت باسشىسى ەلدەگى قارجى جۇيەسىنىڭ تۇراقتىلىعىن قامتاماسىز ەتىپ, ەكونوميكانىڭ دامۋ قارقىنىن ساقتاۋ جونىندە بىرقاتار تاپسىرمالار بەردى.