كەشە ءىىم توتەنشە جاعدايلار كوميتەتىنىڭ توراعاسى ۆلاديمير بەككەر «ءورت قاۋىپتى جانە سۋعا شومىلۋ ماۋسىمى كەزەڭدەرىندەگى قاۋىپسىزدىك شارالارى تۋرالى» ءباسپاسوز كونفەرەنتسياسىن وتكىزدى.
سۋعا شومىلۋ ماۋسىمى باستالعاننان بەرى ەلىمىزدىڭ سۋ ايدىندارىندا 154 ادام (2018 جىلى – 141), ونىڭ ىشىندە 58 بالا سۋعا باتىپ كەتتى.
قايعىلى وقيعانىڭ نەگىزگى سەبەپتەرى – سۋعا شومىلۋ كەزىندە ادامداردىڭ ءوز كۇشتەرىن جەتە باعالاماۋى, بالالاردى قاراۋسىز قالدىرۋ. سونداي-اق 17 ادام ماس كۇيىندە جانە 2 بالا جۇزە الماۋ سالدارىنان قايتىس بولعان.
وتكەن جىلمەن سالىستىرعاندا اقمولا (+12), الماتى (+9), باتىس قازاقستان (+9), تۇركىستان (+7), قوستاناي (+6) وبلىستارىندا سۋعا كەتكەن ادامدار سانىنىڭ ءوسۋى بايقالادى.
قازىرگى كەزدە كۇننىڭ قاتتى ىسىپ كەتۋىنە بايلانىستى سۋداعى وقىس وقيعالار كوپ تىركەلۋدە.
وتكەن دەمالىس كۇندەرى (13-14 شىلدە) ەلىمىزدىڭ سۋ ايدىندارىندا 22 ادام (ونىڭ ىشىندە 7 بالا) قازا بولدى.
رەسپۋبليكا اۋماعىندا ءورت قاۋپى دە ارتىپ تۇر. 2019 جىلدىڭ 5-12 شىلدە ارالىعىندا ەلىمىزدە 265 ورمان-دالا ءورتى تىركەلدى. جالپى, ءورت قاۋپى 5 دارەجەگە بەلگىلەنسە, سونىڭ ەڭ جوعارى ساناتى رەسپۋبليكانىڭ بارلىق وڭىرلەرىندە قالىپتاستى.
تابيعي ورتتەردىڭ تۋىنداۋ قاتەرىن بولدىرماۋ جانە ازايتۋ ماقساتىندا ورتالىق جانە جەرگىلىكتى اتقارۋشى ورگاندار الدىن الۋ شارالارىنىڭ كەشەنىن جۇرگىزەدى. سونداي-اق ورمان-دالا القاپتارى مەن دەمالىس ورىندارىندا 3 300-دەن استام بىرلەسكەن رەيد جۇرگىزىلدى.
ناتيجەسىندە, قولدانىستاعى ءورت قاۋىپسىزدىگى ەرەجەلەرىن بۇزعانى ءۇشىن 558 ادام اكىمشىلىك جاۋاپكەرشىلىككە تارتىلدى. ولارعا 2,8 ملن تەڭگەدەن استام سوماعا ايىپپۇل سالىندى.
