«نۇرلى جەر» باعدارلاماسىن جۇزەگە اسىرۋ اياسىندا ەلوردا اكىمدىگىنىڭ قاۋلىسىمەن «ەلوردا قۇرىلىس كومپانياسى» جشس وكىلەتتى ۇيىمى قۇرىلىپ, «پروبلەمالى نىساندار قۇرىلىسىن اياقتاۋدى قارجىلاندىرۋ» ءتارتىبى بەكىتىلدى. وتكەن جىلى بۇل ماقساتقا رەسپۋبليكالىق بيۋدجەتتەن 40 ملرد تەڭگە ءبولىندى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىندە وتكەن ءباسپاسوز ءماسليحاتى بارىسىندا ايتىلىپ, ۇلەسكەرلەردىڭ ماسەلەلەرى قالاي شەشىلىپ جاتقاندىعى ءتۇسىندىرىلدى.
اتالمىش مينيسترلىكتىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى ءتوراعاسىنىڭ ورىنباسارى باقىتجان قاشاقوۆتىڭ ايتۋىنشا, ەلوردادا 51 نىسان پروبلەمالى بولىپ تانىلعان. ونىڭ ون ەكىسىنە ۇلەسكەرلەر قونىستانىپ ۇلگەردى. قازىرگى كۇنى اتالمىش نىسانداردىڭ ينفراقۇرىلىمىن ىسكە قوسۋ جۇمىستارى جۇرگىزىلىپ جاتىر. ال 39 نىسان اسا پروبلەمالى بولىپ سانالادى. رەسپۋبليكالىق بيۋدجەتتەن بولىنگەن 40 ملرد تەڭگە وسى نىسانداردىڭ پروبلەماسىن شەشۋگە باعىتتالدى. بۇل قارجى ەكى ترانشپەن ءبولىندى. 20 ملرد تەڭگەنى قۇراعان العاشقى ترانش ءتورت جىل مەرزىمىنە قايتارىمدىلىق نەگىزدە ءبولىنىپ وتىر. ءتيىستى جۇمىستارمەن «ەلوردا قۇرىلىس كومپانياسى» جشس اينالىسىپ جاتىر.
تۇرعىن ءۇي قۇرىلىسىنا كەپىلدىك بەرۋ قورى توراعاسىنىڭ ورىنباسارى قانات يبراەۆتىڭ سوزىنشە, ۇلەستىك قۇرىلىس ەلىمىزدە تۇرعىن ءۇي قۇرىلىسىنىڭ شامامەن العاندا 60 پايىزىن قۇرايدى. اتالمىش قور ءوزىنىڭ قىزمەتىن باستاعان كۇننەن, ياعني 2,5 جىل ىشىندە 25 نىسان قۇرىلىسىنا كەپىلدىك بەرگەن. ولاردىڭ جەتەۋى وسى كۇندەرى پايدالانۋعا بەرىلدى.
– قۇرىلىس سالۋشىنىڭ ءوتىنىشىن قاراۋعا بىزگە 15 جۇمىس كۇنى بەرىلەدى. ءوتىنىشتى قاراپ بولعان سوڭ, رۇقسات بەرۋگە نەمەسە باس تارتۋعا قۇقىلىمىز. ءبىز الدىمەن ءوتىنىش يەسىنىڭ قۇرىلىس سالۋداعى تەحنيكالىق تاجىريبەسىنە, قارجىسىنا جانە زاڭ الدىنداعى تازالىعىنا كوڭىل بولەمىز. وسى كۇنگە دەيىن, نەگىزىنەن, نۇر-سۇلتان جانە الماتى قالالارىنداعى نىساندار قۇرىلىسىنا كەپىلدىك بەردىك. سونداي-اق شىمكەنت, ورال شاھارلارىنداعى نىسانداردى ءساتتى ىسكە قوستىق, – دەدى ق.يبراەۆ.
