كەشە نۇر-سۇلتان قالاسى اكىمىنىڭ ورىنباسارى باقتيار ماكەننىڭ توراعالىعىمەن قالاداعى ءبىلىم بەرۋ ۇيىمدارىندا قاۋىپسىزدىكتى قامتاماسىز ەتۋ ماسەلەسى تالقىلاندى. جيىن بارىسىندا وقۋ ورىندارى باسشىلارى تاراپىنان بىرقاتار تۇيتكىلدەر كوتەرىلىپ, ءتيىستى تاپسىرمالار بەرىلدى.
– ەلباسىنىڭ تاپسىرماسىمەن 2020 جىلعا دەيىنگى قالانى دامىتۋ باعدارلاماسى قابىلداندى. ونىڭ باستى ماقساتتارىنىڭ ءبىرى – ازاماتتاردىڭ قاۋىپسىزدىگىن قامتاماسىز ەتۋ. ەلوردادا «سەرگەك» بەينە-فوتوتىركەۋى جۇيەسى ەنگىزىلىپ, تابىستى جۇمىس ىستەپ جاتىر. اسىرەسە, ءبىلىم بەرۋ ۇيىمدارىنىڭ قاۋىپسىزدىگى ەرەكشە باقىلاۋعا الىندى. بارلىق بەينە-فوتوجازبالار iKomek-109 قالالىق مونيتورينگ جانە جەدەل ارەكەت ەتۋ ورتالىعىنا كەلىپ تۇسەدى. سونىڭ ىشىندە اشىق قۇدىقتار ماسەلەسى وتە ماڭىزدى بولىپ وتىر. قالانىڭ كوممۋنالدىق قىزمەتتەرى 42 مىڭداي قۇدىققا قىزمەت كورسەتەدى. بۇعان قوسا, «قازاقتەلەكوم», باسقا دا وسى سياقتى رەسپۋبليكالىق ۇيىمدارعا قارايتىن قۇدىقتار دا بار. سوندىقتان قاۋىپسىزدىك ماسەلەسىن ءاردايىم قاتاڭ باقىلاۋدا ۇستاپ وتىرمىز. كەلەسى جىلعا بۇل ماسەلە بويىنشا بەلگىلى ءبىر جوسپاردى ازىرلەپ قويدىق, – دەگەن ب.ماكەن مەكتەپتەردىڭ ءورت قاۋىپسىزدىگىن قامتاماسىز ەتۋ ماقساتىندا «انتيپانيكا» جۇيەسى ورناتىلعانىن جەتكىزدى.
تاراز قالاسىنداعى رەزونانس تۋدىرعان وقيعاعا بايلانىستى كامەلەتكە تولماعاندارعا قارسى جاسالاتىن قىلمىستاردىڭ الدىن الۋ جۇمىسىن كۇشەيتۋ كەرەكتىگىن ايتقان قالا باسشىسىنىڭ ورىنباسارى بۇل جۇمىسقا اتا-انالاردى دا تارتۋ قاجەتتىگىن اتاپ ءوتتى.
– مەملەكەتتىك ورگاندار ارەكەتىنىڭ ناقتى الگوريتمىن ازىرلەۋ كەرەك. مەكتەپتەردەگى ءتيىستى جۇمىستاردىڭ جوسپارىن قايتا قاراپ, جەدەل شەشۋدى قاجەت ەتەتىن ماسەلەلەردى تىكەلەي شەشەتىن تارتىپكە كوشىرۋ كەرەك, – دەدى قالا اكىمىنىڭ ورىنباسارى.
نۇر-سۇلتان قالاسى جەرگىلىكتى پوليتسيا قىزمەتى باسقارماسىنىڭ باستىعى عوسمان جاكين ءبىلىم بەرۋ
ۇيىمدارىندا قىلمىستاردىڭ الدىن الۋ جانە قاۋىپسىزدىكتى قامتاماسىز ەتۋ جۇمىسىنا توقتالدى. ودان كەيىن ءسوز العان iKomek-109 قالالىق مونيتورينگ جانە جەدەل ارەكەت ەتۋ ورتالىعى باسشىسىنىڭ ورىنباسارى اسىلبەك بۇرباەۆ وقۋ ورىندارىن بەينەباقىلاۋ كامەرالارمەن قامتۋ جۇمىسىنا توقتالدى. قالالىق ءبىلىم باسقارماسى باسشىسىنىڭ مىندەتىن اتقارۋشى باعلان سماتاەۆا ءبىلىم بەرۋ ۇيىمدارى قاۋىپسىزدىگى بويىنشا ەسەپ بەردى.
جيىن بارىسىندا مەكتەپ ينسپەكتورلارىنىڭ جەتىسپەۋشىلىگى ماسەلەسى كوتەرىلدى. «بۇل ماسەلەنى جاقىندا مەكتەپ ديرەكتورلارىمەن بىرگە تالقىلادىق. قورىتىندىسىندا ءتيىستى ماسەلە بويىنشا بىرقاتار تۇيتكىلدەردى انىقتادىق. وعان كەشەندى تۇردە كەلۋ كەرەك. ينسپەكتورلار قىزمەتىن كوبىنەسە ايەلدەر اتقارادى. ولار دەكرەتتىك دەمالىسقا شىققان سوڭ, بوساعان ورىنعا ادام كەلە قويمايدى. بىزدە كادر تاپشىلىعى بار» دەگەن ب.ماكەن وتىرىس قورىتىندىسىندا بىرقاتار تاپسىرمالار بەردى.
