استانادا ساۋدا جانە ويىن-ساۋىق ورتالىقتارى مەن ادامدار كوپ شوعىرلاناتىن ورىنداردا ءورت قاۋىپسىزدىگى شارالارىن قامتاماسىز ەتۋ ماقساتىندا جوسپاردان تىس قوسىمشا تەكسەرىستەر جۇرگىزىلەدى. بۇل تۋرالى قالا اكىمدىگىندە بريفينگ وتكىزگەن استانا اكىمىنىڭ ءباسپاسوز حاتشىسى ەلۆيرا جۇرگەنباەۆا مالىمدەدى, دەپ حابارلادى قالالىق اكىمدىكتىڭ رەسمي سايتى.
استانادا 60-تان استام دەنساۋلىق ساقتاۋ ورىندارى, 300 مەكتەپكە دەيىنگى ءبىلىم بەرۋ ورتالىعى, 100 مەكتەپ جانە 10 ارنايى ءبىلىم بەرۋ مەكەمەسى, 50 جوعارى وقۋ ورىندارى مەن كوللەدجدەر بار. سونىمەن قاتار, 117 ساۋدا نىسانى جۇمىس ىستەيدى, سونىڭ ىشىندە 83-ءى – ساۋدا ءۇيى, 9-ى – ءىرى ساۋدا-ويىن-ساۋىق ورتالىعى, 25-ءى – بازار جانە 200-دەن استام قوناق ءۇي, 60 حوستەل جانە 600-دەن استام ادامدار تاماقتاناتىن قوعامدىق ورىندار بار.
«استانا قالاسى بويىنشا ءورتتىڭ, توتەنشە جاعدايدىڭ الدىن الۋ ءاردايىم جاۋاپتى مەكەمەلەردىڭ باقىلاۋىندا. جىل سايىن جوسپارلى تۇردە تەكسەرۋ شارالارى جۇرگىزىلىپ وتىرادى. ونىڭ ىشىندە ءبىلىم بەرۋ, دەنساۋلىق ساقتاۋ سالاسىنا تيەسىلى نىسانداردا ءورت قاۋىپسىزدىگىن ساقتاۋ ەرەكشە باقىلاۋدا» دەدى ەلۆيرا جۇرگەنباەۆا.
ناۋرىز ايىنان باستاپ استانا قالاسىنداعى 70 ءبىلىم بەرۋ مەكەمەسىنىڭ ءورت قاۋىپسىزدىگى تەكسەرىلگەن. اعىمداعى جىلدىڭ مامىر ايىنا دەيىن بارلىق ءبىلىم بەرۋ مەكەمەلەرى تەكسەرىلەدى. تەكسەرۋ كوميسسياسىنىڭ قۇرامىندا تجد-ءنىڭ, ءبىلىم باسقارماسىنىڭ وكىلدەرىمەن قاتار اتا-انالار دا بار.
«قازىرگى كۇنى قالامىزداعى 9 ساۋدا جانە ويىن-ساۋىق ورتالىعىنىڭ 6-ۋى تەكسەرىلدى. ءۇش ورتالىقتان 32 ەرەجە بۇزۋشىلىق انىقتالعان. ءۇش ادام اكىمشىلىك جاۋاپكەرشىلىككە تارتىلىپ, ولارعا ايىپپۇل سالىندى. ەكى ورتالىققا اۋديت جۇرگىزىلدى, ال ءبىر نىسانعا (Mega Silk Way Astana) تەكسەرۋ وسى جىلى جاسالادى. بيىل ەرەكشە تارتىپپەن استاناداعى 50 ساۋدا نىسانىنا تەكسەرۋ جۇرگىزىلەدى. تەكسەرۋ كەزىندە قاۋىپسىزدىك تەحنيكالارى ەرەجەسىنىڭ ساقتالۋى, ءورت ءسوندىرۋ جۇيەسى مەن حابارلاندىرۋ, دابىلدى ەسكەرتۋ, ەۆاكۋاتسيا سىزباسى مەن اپاتتىق شىعۋ جولدارىنا باسا ءمان بەرىلەدى» دەدى ەلۆيرا جۇرگەنباەۆا.
تەكسەرۋ بارىسىندا سىرتقا شىعۋ جولدارىنىڭ جاعدايى, جارىق بەرۋشى ەلەكتر جەلىلەرى مەن قۋات كوزدەرىنىڭ جاي-كۇيىنىڭ ءتيىستى دەڭگەيدە بولۋى, ءورت جايىندا دابىل بەرەتىن اۆتوماتتى جۇيەنىڭ دۇرىستىعى, ىشكى جانە سىرتقى ورتكە قارسى سۋ جابدىعى مەن ءورت ءسوندىرۋ قۇرالدارىنىڭ ساقاداي ساي تۇرۋىنا باسا ءمان بەرىلەدى.
تولەن تىلەۋباي
