استانالىق پوليتسەيلەر زاڭسىز جولاۋشىلار تاسىمالىمەن اينالىسىپ جۇرگەن كولىك جۇرگىزۋشىلەرىن انىقتاۋعا كىرىستى.
«قاۋىپسىز جول» جەدەل پروفيلاكتيكالىق ءىس-شاراسى 29 اقپانعا دەيىن جالعاسادى. ونىڭ اياسىندا تاكسي كولىكتەرىنىڭ جولاۋشىلار مەن جۇكتەردى تاسىمالداۋ ەرەجەلەرىن ساقتاۋ ءتارتىبى دە تەكسەرىلەدى.
رەسمي مالىمەتكە سايكەس, 5 اقپاننان بەرى جولاۋشىلاردى زاڭسىز تاسىمالداعان 9 تاكسي جۇرگىزۋشى انىقتالدى. بۇدان بولەك, 46 جۇرگىزۋشى ءنومىرسىز جۇرگەن. 380 تاكسيشى مىندەتتى تەحنيكالىق بايقاۋدان وتپەگەن. ال 500 ادام جولاۋشىلار مەن جۇكتەردى تاسىمالداۋ ەرەجەلەرىن بۇزعان.
«ماسەلەن, Hyundai كولىگىن باسقارعان 35 جاستاعى وزبەكستان رەسپۋبليكاسىنىڭ ازاماتى ۇستالدى. ول «ياندەكس» ءموبيلدى قوسىمشاسىمەن ادام تاسىعان. بىراق قاجەتتى تىركەۋ قۇجاتتارى بولمادى» دەيدى پوليتسەيلەر.
وزبەكستان ازاماتى كوشى-قون زاڭناماسىن بۇزعانى ءۇشىن اكىمشىلىك جاۋاپكەرشىلىككە تارتىلدى. ال كولىك ايىپ تۇراعىنا قويىلدى.
