قازاق حاندىعىنا ارنالدى
«نازارباەۆ ورتالىعى» كوپ فۋنكتسيالى عىلىمي تالدامالىق جانە گۋمانيتارلىق-اعارتۋشىلىق مەملەكەتتىك مەكەمەسىندە – «نۇر وتان» پارتياسىنىڭ قولداۋىمەن قر تۇڭعىش پرەزيدەنتى – ەلباسىنىڭ قورى جانە بعم عك مەملەكەت تاريحى ينستيتۋتى – قازاق حاندىعىنىڭ 550 جىلدىعىنا ارنالعان «قازاق حاندىعىنان تاۋەلسىز قازاقستانعا دەيىن» دەپ اتالاتىن حالىقارالىق عىلىمي-تاجىريبەلىك كونفەرەنتسيا وتكىزدى.
ايتۋلى شارا وسى جىلى اتاپ وتەتىن قازاق حاندىعىنىڭ تورقالى تويىنىڭ قارساڭىندا ءوتىپ وتىرعان ماڭىزدى جيىنداردىڭ ءبىرى دەسەك بولادى. كونفەرەنتسيادا ۇلتىمىزدىڭ ۇلى تاريحىنان ساليقالى ءسوز قوزعايتىن وزەكتى تاقىرىپتار تاڭداپ الىندى. دالىرەك ايتقاندا, قازاق حاندىعى ورتالىق ازياداعى العاشقى ۇلتتىق سيپاتتاعى مەملەكەت رەتىندەگى گەنەزيس ماسەلەلەرى; قازاق حاندىعىنىڭ دەرەكناماسى مەن تاريحناماسى; حاندىق بيلىكتىڭ ءداستۇرلى باسقارۋ ينستيتۋتتارىنىڭ ەۆوليۋتسياسى جانە قازاق حاندىعى تاريحىنداعى مەملەكەتتىك نىشاندار سەكىلدى اۋقىمدى ماسەلەلەر تالقىلانىپ, جان-جاقتى قامتىلعان بايىپتى باياندامالار جاسالدى. شارا اياسىندا «قازاق حاندىعى ورتالىق ازياداعى العاشقى ۇلتتىق سيپاتتاعى مەملەكەت» جانە «قازاق حاندىعىنان تاۋەلسىز قازاقستانعا دەيىن» دەپ اتالاتىن ەكى سەكتسيا جۇمىسى ۇيىمداستىرىلعان. عىلىمي جيىندى جيناقى جۇرگىزگەن تاريح عىلىمدارىنىڭ دوكتورى بۇركىتباي اياعان, شاراعا الىس-جاقىن ەلدەردەن كەلگەن تاريحشى عالىمدارعا ورنىمەن ءسوز بەرىپ, ەل تاريحىنىڭ وتكەنى مەن بۇگىنىنە تىڭ تۇجىرىمدار جاساپ, تاريحي تانىمىمىزدى تەرەڭ تۇيسىنۋگە مۇمكىندىك بەردى.
سونداي-اق, عىلىمي جيىن بارىسىندا «قازاق حاندىعىنا ارنالعان» كىتاپ كورمەسى مەن گرافيكا-سۋرەت شەبەرى راحىمجان قاسىمجاننىڭ «ەۋرازيا كوشپەلىلەرى» اتتى گرافيكالىق كورمەسى ءوتتى.
ازامات ەسەنجول