سوچيدە قازاقستان پرەزيدەنتى قاسىم-جومارت توقاەۆ رەسەي پرەزيدەنتى ۆلاديمير پۋتينمەن كەزدەستى. قاسىم-جومارت توقاەۆ ەلباسى نەگىزىن قالاعان قازاقستان مەن رەسەي اراسىنداعى ارىپتەستىكتىڭ جوعارى دەڭگەيى مەن دارەجەسىنىڭ ساقتالعانىن اتاپ ءوتتى. مەملەكەت باسشىسى «ۆالداي» پىكىرتالاس كلۋبىنىڭ وتىرىسىنا قاتىسىپ, ءسوز سويلەدى. بيىلعى فورۋم عالامدىق گەوساياساتتاعى شىعىستىڭ ءرولى تاقىرىبىنا ارنالدى.
مەملەكەت باسشىسى ەۋرازيالىق ەكونوميكالىق وداق شەڭبەرىندە ينتەگراتسيالىق پروتسەستەر بويىنشا جوعارى دەڭگەيدەگى تۇسىنىستىك بارىن اتادى. ونىڭ ايتۋىنشا, ەرەۆاندا وتكەن جەەك وتىرىسىنداعىداي تۋىنداعان ماسەلەلەر بويىنشا ۋاقىتىلى شەشىمدەر قابىلدانۋى قاجەت. قازاقستان تاريحي جانە گەوگرافيالىق ورنالاسۋ جاعىنان شىعىسپەن دە, باتىسپەن دە بايلانىس ورناتقانىن اتاپ وتكەن قاسىم-جومارت توقاەۆ قازاقستان 2020-2022 جىلدارى ازياداعى ءوزارا ىقپالداستىق جانە سەنىم شارالارى جونىندەگى كەڭەسكە توراعالىق ەتۋ بارىسىندا وزگە دە كوپجاقتى ينستيتۋتتارمەن بايلانىستى كۇشەيتۋدى جوسپارلاپ وتىرعانىن مالىمدەدى.
«ۆالداي» حالىقارالىق پىكىرتالاس كلۋبىنىڭ XVI پلەنارلىق سەسسياسىنا الەمنىڭ ونداعان ەلىنەن بەدەلدى ساياساتكەرلەر مەن بەلگىلى ساراپشىلار, قوعام قايراتكەرلەرى قاتىستى, بيىلعى فورۋم عالامدىق گەوساياساتتاعى شىعىستىڭ ءرولى تاقىرىبىنا ارنالدى.
– التىن وردا – قازاقتىڭ مادەني كودىنىڭ ماڭىزدى بولشەگى. ول شىن مانىندە جانە گەوگرافيالىق تۇرعىدا دا ەۋرازيالىق ەل سانالادى. ارينە, ەل اۋماعىنىڭ باسىم بولىگى ازيادا ورنالاسقان. دەگەنمەن, قازاقستان تەرريتورياسىنىڭ 4 پايىزى ەۋروپالىق كونتينەنتتە جاتقانىن ۇمىتپاۋ كەرەك. ول دەگەنىمىز – 120 مىڭ شارشى كيلومەتر جەر, – دەپ اتاپ ءوتتى قازاقستان پرەزيدەنتى.
قازاقستاننىڭ ايماقتىق قاقتىعىستاردى رەتتەۋدە ءادىل اراعايىندىقتى جاقتايتىنىن ايتقان مەملەكەت باسشىسى تاياۋ شىعىس ءۇشىن, ونىڭ ىشىندە, سيريا بويىنشا استانا پروتسەسىندە ومىرشەڭ شەشىمدەر ىزدەستىرۋگە دايىن ءارى قولداۋعا ءازىر ەكەنىن مالىمدەدى.
