قازاقستان پرەزيدەنتى ۇلتتىق بانك توراعاسى دانيار اقىشەۆتى قابىلدادى

كەزدەسۋ بارىسىندا د.اقىشەۆ مەملەكەت باسشىسىنا ۇلتتىق بانكتىڭ قازىرگى قىزمەتى, اقشا-نەسيە ساياساتىنىڭ باستى باعىتتارى تۋرالى, سونىمەن قاتار ەلدىڭ قارجى نارىعىنداعى احۋال تۋرالى باياندادى.

ەلباسى ىشكى ۆاليۋتا نارىعىنداعى جاعدايدى تۇراقتاندىرۋدى قامتاماسىز ەتۋ, رەسپۋبليكانىڭ بانك جۇيەسىن دامىتۋ جانە ەكىنشى دەڭگەيلى بانكتەر ارقىلى ەكونوميكانى نەسيەلەندىرۋ كولەمىن ارتتىرۋ جونىندە ءتيىستى شارالار قابىلداۋ قاجەتتىگىنە نازار اۋداردى.

نۇرسۇلتان نازارباەۆ سونداي-اق, تەڭگە باعامىنا بايلانىستى جاعدايعا قاتىستى ءتيىمدى اقپاراتتىق-ءتۇسىندىرۋ جۇمىسىن جالعاستىرۋدىڭ ماڭىزدىلىعىن اتاپ ءوتتى.

– ەركىن ايىرباس باعامىن ەنگىزۋ تۋرالى شەشىم دۇرىس بولدى. الايدا, قازىر كەيبىر كەلەڭسىز جاعدايلار ورىن الۋدا جانە ونىڭ سەبەپتەرىن جۇرتقا ءتۇسىندىرۋ قاجەت, – دەدى ەلباسى.

ۇلتتىق بانكتىڭ توراعاسى ۇلتتىق ۆاليۋتانىڭ دوللارعا قاتىستى باعامىنىڭ السىرەۋىنە اسەر ەتكەن فاكتورلار جونىندە ايتتى.

– بيىلعى العاشقى التى ايدا مۇناي باعاسى باررەلىنە 27-دەن 52 دوللارعا قىمباتتادى, الايدا شىلدەدە 52-دەن 42 دوللارعا –15%-عا ارزاندادى. بارلىق شيكىزات ەكسپورتتايتىن دامۋشى ەلدەردە وسىنداي جاعداي ورىن الدى. ولاردىڭ ۇلتتىق ۆاليۋتالارى قازاقستانداعى سياقتى بەكىپ, كەيىننەن 2-3%-عا تومەندەدى. شىلدەدە تەڭگە شارتتى تۇردە 4,2%-عا السىرەدى, بۇل قالىپتى وزگەرىس دەپ سانايمىز. قازىرگى ۋاقىتتا جاعداي تۇراقتادى. الداعى ۋاقىتتا باعام قانداي دا ءبىر جاعدايلارعا بايلانىستى وزگەرە قويمايدى. 2016 جىلعى شىلدەدەگى تەڭگەنىڭ ەركىن ايىرباس باعامى جاعدايىنداعى اۋىتقۋى ىشكى ەكونوميكالىق تۇراقتىلىق ءۇشىن ەشقانداي قاۋىپ توندىرمەيدى, – دەدى د.اقىشەۆ.

بۇدان بولەك, ۇلتتىق بانكتىڭ توراعاسى ەلدەگى ينفلياتسيا ۇدەرىستەرىن ۇستاپ تۇرۋ ءۇشىن جۇرگىزىپ جاتقان جۇمىستار تۋرالى مالىمدەدى.

– جىل باسىنان باستاپ ينفلياتسيا ءوسىمى 5,2%-دى قۇرادى. وسى كورسەتكىشتە 2015 جىلعى قىركۇيەك-قاراشا ايلارىندا باعا تەز وسكەن كەزەڭدەگى باعامدى تۇزەۋدىڭ اسەرى قامتىلعان. بۇل ەندى ارتتا قالدى. جىلدىڭ قورىتىندىسى بويىنشا ءبىز ۇكىمەت كوزدەگەن 6-8% ينفلياتسيالىق ءدالىزدى قامتاماسىز ەتەمىز دەگەن سەنىم بار, – دەدى د.اقىشەۆ.

مەملەكەت باسشىسى كەزدەسۋ قورىتىندىسى بويىنشا بىرقاتار تاپسىرما بەردى.

akorda.kz