ەلوردانىڭ ىرگەسىندەگى جىبەك جولى اۋىلىنداعى ءيمانجۇسىپ قۇتپانۇلى اتىنداعى ورتا مەكتەپتە حالقىمىزدىڭ ارداقتى تۇلعاسىنا ارنالعان شاعىن مۇراجاي جۇمىس ىستەيدى. بۇعان ءيمانجۇسىپ اتامىزدىڭ نەمەرەسى, فيلوسوفيا عىلىمدارىنىڭ دوكتورى راۋشان كوشەنوۆا باس-كوز بولىپ وتىر. وسىندا ارقانىڭ اسقاق جىرشىسىنا قاتىستى ءبىراز جادىگەرلەر بار. سولاردىڭ ىشىنەن ءيمانجۇسىپتىڭ بالاسى نۇرقانعا سىيلاعان ەرتوقىمعا توقتالساق دەيمىز.
بۇل قۇندى مۇرا جايىندا نۇرقان قاريانىڭ قىزى راۋشان اپاي اڭگىمەلەپ بەردى.
– اكەم ماعان كوزى تىرىسىندە ەكى امانات جۇكتەدى, – دەپ باستادى ءسوزىن ول كىسى. ءبىرىنشىسى – اكەسىنىڭ سۇيەگى جاتقان جەردى انىقتاۋ, ەكىنشىسى – سۋرەتىن تابۋ. بۇگىندە اكەمنىڭ وسى ەكى اماناتىن ورىندادىم. ءيمانجۇسىپ اتامنىڭ ءۇش ۇلى, جەتى قىزى بولعان. ءوزى اتىلىپ كەتكەننەن كەيىن ۇرپاقتارى دا كوپ قۋعىن كوردى. اكەم ءوز اكەسىنەن ون جاسىندا جەتىم قالدى. سودان باس ساۋعالاپ وزبەكستانعا بارادى. سول جاقتان مايدانعا الىنىپ, سوعىس بىتكەننەن كەيىن, ياعني 1946 جىلى عانا ەلگە ورالىپ, تۋىستارىن ىزدەپ, تاۋىپ الادى.
مەنىڭ اكەم – ءيمانجۇسىپ اتام الپىس جاستان اسقاندا ومىرگە كەلگەن. سوندىقتان ول كىسى كەنجە ۇلى دۇنيە ەسىگىن اشقاندا ۇلكەن توي جاسايدى. بالاما دەپ ءبىر شەبەرگە بار جابدىعىمەن ەرتوقىم جاساتقىزادى. بۇل ەرتوقىم – سول. كەيىن الاي-دۇلەي ۋاقىت تۋادى. بىراق ەرتوقىمدى اكەمنىڭ تۋعان اعاسى سەيىتقان كوكەم ساقتاپ قالىپ ىنىسىنە بەرەدى. سودان بەرى بۇل جادىگەر ءبىزدىڭ ۇيدەگى قيماس قازىنامىزعا اينالدى. اكەم 1996 جىلى ومىردەن وزدى. كەيىن باۋىرىم سەيىتبەك ەرتوقىمدى, جۇگەنى, جابۋىمەن بىرگە اتام مەكتەبىنىڭ تورىندە تۇرسىن دەپ مۇراجايعا سىيلادى, – دەدى راۋشان نۇرقانقىزى.
