قوبىزعا قۇمار كراۋزە
جاقىندا م.وتەمىسوۆ اتىنداعى وقۋشىلار سارايىندا 1 مامىر – حالىق بىرلىگى مەرەكەسىنە وراي №1 بالالار مۋزىكا مەكتەبىنىڭ «اياۋلى استانام» اتتى جىلدىق ەسەپ بەرۋ كونتسەرتى ءوتتى. كەشتىڭ شىمىلدىعىن ۇلت اسپاپتار وركەسترى ك.كۇمىسبەكوۆتىڭ «مۋزىكالىق ەسكيزدەرىمەن» اشتى.
تارتىمدى وتكەن شارا كورەرمەن كوڭىلىنەن شىقتى. اسىرەسە, كۇيشى راۋشان ورازباەۆانىڭ جەتەكشىلىگىمەن ورىندالعان قورقىت كۇيلەرى كونتسەرتتىڭ سالماعىن ارتتىردى. اسىرەسە, سوناۋ گەرمانيادان كەلگەن روزاماري كراۋزە حانىمنىڭ قىلقوبىزدا ويناۋ شەبەرلىگى كوپشىلىكتى تاڭ قالدىردى.
گەرمانيانىڭ ەرلانگەن قالاسىندا تۇراتىن روزاماري كراۋزەنىڭ نەگىزگى ماماندىعى – دارىگەر. ءوزىنىڭ ايتۋىنشا, سەزىم قىلىن شەرتەر مۋزىكا ىزدەپ, عالامتوردى شارلاعان ەكەن العاشىندا. الدىمەن, مىسىرلىقتاردىڭ ءبىر اسپابىنا كەزىگىپ, سونى تاۋىپ ۇيرەنەدى. ىلە-شالا بۇل اسپاپتىڭ دىبىسى وعان ۇناماي قالادى. سودان كەيىن تۇرىك ەلىنىڭ سىرنايىن تاۋىپ, ونى دا ويناپ كورەدى. بىردە ينتەرنەت سايتتارىن اقتارا وتىرىپ, ايرىقشا مۋزىكانى قۇلاعى شالادى. وسى اسپاپتى ىزدەي كەلە, قىتاي ەلىنىڭ ءۇرىمشى قالاسىندا تۇراتىن ۇيعىر شەبەرى جاساعان قىلقوبىز ەكەنىن بىلەدى. كوپ ۇزاتپاي الگى شەبەرگە تاپسىرىس بەرىپ, ءۇش اي دەگەندە قىلقوبىزدى قولىنا تۇسىرەدى. الايدا, ونىڭ ءتىلىن ۇعىنۋ قيىنعا سوعادى.
وسىنداي كۇندەردىڭ بىرىندە قازاق قوبىزشىسى راۋشان ورازباەۆانىڭ اۆستريا ەلىنىڭ گراتس قالاسىندا جەكە كونتسەرتىن بەرەتىنىن ەستىپ, ىزدەپ بارادى.
سودان باستاپ روزاماري راۋشاننىڭ شاكىرتىنە اينالادى. اۆستريادا باستالعان ءدارىس گەرمانيادا جالعاسىپتى. وتكەن جىلى الماتى قالاسىنا ارنايى ىزدەپ كەلىپ, ەكى اپتا بويى قىلقوبىز تارتۋدى تاعى ۇيرەنەدى. مىنە, نەمىس قىزى جۋىردا عانا وتكەن №1 بالالار مۋزىكا مەكتەبىنىڭ ەسەپ بەرۋ كونتسەرتىنە كەلىپ ونەر كورسەتتى.
«ەكى جىل بۇرىن اۆستريانىڭ گراتس قالاسىندا قىزىم توقجان ەكەۋىمىز قوبىز كۇيلەرىنەن كونتسەرت بەردىك. كونتسەرتتەن سوڭ قاسىمىزعا روزاماري كەلىپ, قوبىز اسپابىنا قۇشتارلىعىن, تارتقىسى كەلەتىنىن ايتتى. مەن, ارينە, بەتىن قاققان جوقپىن. سەبەبى, قوبىزدىڭ ءۇنى, راسىندا, ادامنىڭ جۇرەگىن ەمدەيدى, سەزىمىن تەربەيدى.
جىل سايىن گەرمانيا مەن اۆستريا مەملەكەتتەرىندە كونتسەرت بەرەمىن. حالىق مەنى اسىعا كۇتەدى. مىنە, روزاماريگە دە ءدام-تۇز بۇيىرىپ, استاناعا جول ءتۇستى. ول مەنىڭ «اققۋ» اتتى شىعارماشىلىق كونتسەرتىمە ارنايى كەلىپ, ۇلەسىن قوستى. شاكىرتتەرىمنەن تۇراتىن انسامبلگە قاتىسىپ, قورقىتتىڭ كۇيلەرىن ورىندادى» دەيدى №1 بالالار مۋزىكا مەكتەبىنىڭ ۇستازى, قازاق ۇلتتىق ونەر ۋنيۆەرسيتەتىنىڭ اعا وقىتۋشىسى راۋشان ورازباەۆا.
وسپان سۇلەيمەنۇلى,
«مۋزىكا – شەكسىز الەم» قاۋىمداستىعىنىڭ پرەزيدەنتى