كەشە قالالىق ءماسليحاتتا قوعامدىق كەڭەستىڭ كەزەكتى وتىرىسى ءوتتى. وندا بىرقاتار قۇقىقتىق اكتىلەردىڭ جوبالارى تالقىلاندى.
ءبىرىنشى ماسەلە بويىنشا قالالىق مەملەكەتتىك ءساۋلەت-قۇرىلىسىن باقىلاۋ باسقارماسىنىڭ جەتەكشىسى ت.قۇلىشەۆتىڭ ۇسىنىسى تىڭدالدى. ال قالا شەكاراسىن كەڭەيتۋ تۋرالى استانا قالاسىنىڭ جەر قاتىناستارى باسقارماسىنىڭ باسشىسى ت.نۇركەنوۆ وزگەرىستەردىڭ استانا حالىقارالىق اۋەجايىنداعى جاڭا تەرمينال قۇرىلىسى ءۇشىن ۇلتتىق پانتەون مەن قالالىق زيراتقا ورىن ءبولۋ ءۇشىن تۋىنداعان قاجەتتىلىك ەكەنىن ايتتى. «جوسپارلانىپ وتىرعان كەشەندى شارالاردى جۇزەگە اسىرۋ ءۇشىن اقمولا وبلىسى تسەلينوگراد اۋدانىنداعى مايبالىق كولىنىڭ جانىندا قالاعا ىرگەلەس جاتقان جالپى اۋدانى 7300 گەكتار جەر قالا اۋماعىنا قوسىلىپ الىنباسا, ونى ىسكە اسىرۋ مۇمكىن ەمەس» دەدى باسقارما باسشىسى.
استانا قالاسى اكىمى اپپاراتى جەتەكشىسىنىڭ ورىنباسارى ءالنۇر سەيدۋمانوۆ باق, بيزنەس وكىلدەرىنە جانە ازاماتتارعا مەملەكەتتىك مالىمەتتەر بازاسىن كەڭىنەن پايدالانۋعا مۇمكىندىك بەرەتىن اشىق مالىمەتتەر ينتەرنەت-پورتالىندا جاريالاناتىن اقپاراتتار ءتىزىمىن تالقىعا سالدى. «بارلىق اقپارات ءبىر جەرگە جانە ىڭعايلى بولاتىنداي جينالادى. الداعى ۋاقىتتا اشىق مالىمەتتەردىڭ ىشىندە وزەكتەندىرۋ كەزەڭى, مەرزىمدەرى, دەرەككوزدەر, جاۋاپتى تۇلعالاردىڭ دەرەگى بەرىلەدى. الداعى ۋاقىتتا ءتىزىم كەڭەيە تۇسپەك, – دەدى ءا.سەيدۋمانوۆ.
اتالعان جوبا قوعامدىق كەڭەس مۇشەلەرىمەن ءبىراۋىزدان بەكىتىلدى.
ايگۇل ۋايسوۆا
