قالا اكىمدىگىندە قولدانىستاعى زاڭناماعا سايكەس جاقىندا سايلانعان استانا قالاسى قوعامدىق كەڭەسى جاڭا قۇرامىنىڭ العاشقى وتىرىسى ءوتتى. جيىن بارىسىندا كەڭەستىڭ توراعاسى مەن حاتشىسى سايلانىپ, ۇيىمنىڭ الداعى مىندەتتەرى بەلگىلەندى.
وتىرىس تىزگىنىن قولعا العان قالالىق ءماسليحات حاتشىسى جانات نۇرپەيىسوۆ الدىمەن سايلاۋ ناتيجەلەرىمەن تانىستىردى. «بيىلعى 6-19 اقپان ارالىعىندا كوممەرتسيالىق ەمەس ۇيىمدار وكىلدەرى مەن ازاماتتاردان سايلاۋعا قاتىسۋ ءۇشىن قۇجاتتار قابىلداندى. بارلىعى 47 ءوتىنىش كەلىپ ءتۇستى. سونىڭ ىشىندە ەكى كانديدات قالا اۋماعىندا تىركەلمەگەندىكتەن كونكۋرسقا جىبەرىلمەدى. سايلاۋ ناتيجەسىندە قوعامدىق كەڭەسكە 25 ادام ىرىكتەلدى. ونىڭ ۇشەۋى – مەملەكەتتىك ورگانداردىڭ وكىلدەرى جانە جيىرما ەكىسى – كوممەرتسيالىق ەمەس ۇيىمداردىڭ ازاماتتارى. كەڭەس قۇرامى 6 ناۋرىزدا وتكەن قالالىق ءماسليحات سەسسياسىنىڭ شەشىمىمەن بەكىتىلدى» دەدى ج.نۇرپەيىسوۆ.
ودان كەيىن كەڭەس مۇشەسى ۆلاديسلاۆ سەرگەەۆ ءسوز الدى. «مەن ەكىنشى رەت قوعامدىق كەڭەسكە سايلانىپ وتىرمىن. ءبىرىنشى شاقىرىلىمداعى كەڭەس سانسىزباي ەسىلوۆتىڭ توراعالىعىمەن وتە جاقسى جۇمىس ىستەدى دەپ ەسەپتەيمىن. بىرنەشە ماڭىزدى مىندەتتەر, جوبالار جۇزەگە اسىرىلىپ, قوعامدىق تىڭداۋلار وتكىزىلدى. سوندىقتان جاڭا قۇرامداعى كەڭەستىڭ توراعاسى قىزمەتىنە سانسىزباي سەيىتجانۇلىنىڭ كانديداتۋراسىن ۇسىنامىن» دەدى ول. بۇل ۇسىنىس ءبىراۋىزدان ماقۇلداندى.
كەڭەس حاتشىلىعىنا مۇحتار ەركەتاەۆتى ۇسىندى. كەڭەس مۇشەلەرى بۇل كانديداتۋرانى دا قولدادى.
