ەكسپو مامانداندىرىلعان حالىقارالىق كورمەسىن وتكىزۋ قارساڭىندا قۇقىق بۇزۋشىلىقتاردىڭ الدىن الۋ ماسەلەلەرى استانا اكىمدىگىنىڭ ەرەكشە باقىلاۋىنا الىنعان. قوعامدىق ءتارتىپتى ءتيىمدى قامتاماسىز ەتۋ ءۇشىن قالا بيلىگى ىشكى ىستەر دەپارتامەنتىمەن بىرلەسە وتىرىپ, ەلورداداعى كريمينوگەندىك احۋالدى ساۋىقتىرۋ بويىنشا بىرلەسكەن شارالار كەشەنىن ازىرلەدى, ونى ىسكە اسىرۋعا اكىمدىكتىڭ قۇرىلىمدىق بولىمشەلەرى جانە پوليتسيا ورگاندارى تارتىلدى.
جوسپاردىڭ ماڭىزدى تارماقتارىنىڭ ءبىرى جاساق قۇرۋ بولىپ تابىلادى. قوعامدىق جاساقتىڭ قۇرامىنا 2000-عا تارتا جاساقشى جانە ىشكى ىستەر, توتەنشە جاعدايلار, قىلمىستىق اتقارۋ جۇيەسى دەپارتامەنتتەرىنىڭ جانە استانا قالاسىنىڭ مامانداندىرىلعان كۇزەت قىزمەتى باسقارماسىنىڭ ماماندارى كىرەدى. جاساقتاردى پاترۋلدىك توپتار باسقاراتىن بولادى, ولار زاڭعا قايشى ارەكەتتەردىڭ الدىن الۋ ماقساتىندا اپتا سايىن بەيسەنبىدەن سەنبىگە دەيىن 3-4 ادامنان تۇراتىن توپتارمەن جاياۋ پاترۋلدەۋ جۇرگىزەتىن بولادى.
قازىرگى ۋاقىتتا قوعامدىق ءتارتىپتى قامتاماسىز ەتۋ بويىنشا بەكىتىلگەن جوسپاردى ىسكە اسىرۋ ءۇشىن بىرنەشە ماڭىزدى سەكتور بويىنشا جوسپارلى جۇمىس جۇرگىزىلۋدە.
اتاپ ايتقاندا, ءبىرىنشى كەزەكتەگى مىندەتتەردىڭ ءبىرى ازاماتتاردى قوعامدىق ءتارتىپتى قامتاماسىز ەتۋگە تارتۋ بولىپ تابىلادى. بۇل ءۇشىن ەلوردالىق ءىىد باستاماسىمەن جاساقتار قۇرۋ, پيك-تەرمەن جانە تۇرعىندارمەن ءوزارا ءىس-قيمىلدى ۇيىمداستىرۋ, پاتەرلەردى زاڭسىز جالعا تاپسىرۋعا مونيتورينگ جۇرگىزۋ جوسپارلانىپ وتىر.
سونىمەن بىرگە, جاساقشىلار ءۇشىن ايرىقشا بەلگىلەر ازىرلەندى, بۇل – قولعا تاڭىلاتىن شۇبەرەك, توسبەلگى جانە كۋالىك.
سونداي-اق, بيلىك مەنشىككە قارسى, قالتا ۇرلىعى مەن پاتەر توناۋدىڭ جولىن كەسۋگە, ءتۇستى مەتالل ۇرلاۋ, اۆتوكولىك ايداپ اكەتۋ سياقتى قىلمىستاردىڭ الدىن الۋعا ەرەكشە نازار اۋدارادى.
بالالار اراسىنداعى قىلمىستاردىڭ الدىن الۋ دا ارنايى قىزمەتتەردىڭ ەرەكشە باقىلاۋىندا. جۇرگىزىلەتىن جۇمىستاردىڭ شەڭبەرىندە تۇنگى ۋاقىتتا اتا-اناسىز جۇرگەن, كومپيۋتەرلىك كلۋبتاردا جۇرگەن بالالاردى انىقتاۋ بويىنشا رەيدتەر وتكىزۋ, مەكتەپ وقۋشىلارىنىڭ بوس ۋاقىتىن ۇيىمداستىرۋ جوسپارلانعان.
سونىمەن بىرگە, الكوگولگە ماس كۇيى جاسالعان قىلمىستاردىڭ جانە ناشاقورلىقتىڭ الدىن الۋ بويىنشا ءتيىستى شارالار قابىلداندى. بۇگىنگى كۇنى ناشاقورلىققا قارسى ءىس-قيمىل جونىندەگى ۆەدومستۆوارالىق شتابتىڭ شەڭبەرىندە ەلوردالىق ءىىد وسى قىلمىستاردىڭ جولىن كەسۋ بويىنشا بەلسەندى تۇردە جۇمىس جۇرگىزىلۋدە.
سونداي-اق, قالا بيلىگى الەۋمەتتىك ماسەلەلەردى دە نازاردان تىس قالدىرعان جوق, ولارعا ازاماتتاردىڭ جۇمىسقا ورنالاسۋىنا كومەك كورسەتۋ, تۇرمىسى تومەن وتباسىلارمەن پروفيلاكتيكالىق اڭگىمەلەسۋلەر جۇرگىزۋ كىرەدى. قالادا جول-پاترۋلدىك پوليتسيانىڭ پاترۋلدەۋ اۋماعى كەڭەيتىلدى, قالا شەتتەرىندەگى كوشەلەردى جانە اۋدانداردى جارىقتاندىرۋ ۇيىمداستىرىلدى.
استانا قالاسىنىڭ ءىىد مالىمەتتەرىنە سايكەس, قازىرگى ۋاقىتتا ەلوردادا 280 ۋچاسكەلىك ينسپەكتور جۇمىس ىستەيدى. ەكسپو وتەتىن كەزەڭدە حالىقتىڭ قاۋىپسىزدىگىن قامتاماسىز ەتۋ ءۇشىن كۇشەيتىلگەن شارالار قاجەت. سول سەبەپتى قوعامدىق ءتارتىپتى قامتاماسىز ەتۋشى جاساقتار – قالاداعى كريمينوگەندىك احۋالدى جاقسارتۋعا جانە ساۋىقتىرۋ ءۇشىن قاجەت قادام دەيدى قالا باسشىلىعى.
