«ASI» ينۆەستيتسيالىق قۇرىلىس كومپانياسىنىڭ سايتىنا قاراساڭىز, قاراماعىنداعى قۇرىلىس قارقىندى ءجۇرىپ, تۇرعىن ءۇي كەشەندەرى كۇن ساناپ بوي كوتەرىپ جاتقانداي اسەر قالدىرادى.
ۇيدەي ۋادە بەرىپ, قۇرىلىس قومپانياسىنىڭ ەسەبىنە قالاي قاراجات قۇيۋدىڭ دا امالىن تاپتىشتەپ ءتۇسىندىرىپ قويعان.
ال, شىنداپ كەلگەندە, وسىنداي اسەرلى مەنەدجمەنتتىڭ ىقپالىنا ءتۇسىپ, ۋادەلى پاتەرىنە قولى جەتپەي قينالىپ جۇرگەندەردىڭ سانى دا از ەمەس. بۇگىندە ولاردىڭ قاتارى بەس مىڭنان اسىپ وتىر.
«كومپانيامەن كەلىسىمشارت بويىنشا «شىعىس» تۇرعىن ءۇي كەشەنىندەگى پاتەرىمىزدىڭ كىلتىن وتكەن جىلى الۋىمىز كەرەك ەدى. قاراجاتى تۇگەل اۋدارىلىپ قويىلعان, الايدا ىرگەتاسى عانا قالانعان كۇيىندە قۇرىلىس قوزعالىسسىز قالىپ وتىر» دەيدى امالى تاۋسىلعان باقىت ساعىمباەۆا.
«حان شاتىر» ساۋدا-ويىن-ساۋىق ورتالىعى ماڭىنان جەر ساتىپ الىپ, ۇلەسكەرلەردىڭ قاراجاتىنا ءۇي سالماق بولعان ءۇي كەشەنىنىڭ ديرەكتورى سەرگەي كوتلياروۆتىڭ بۇل ارەكەتىن باقىت بىلايشا تۇسىندىرەدى. «مەنشىگىنە العان جەردى مەملەكەت قايتارىپ الماس ءۇشىن تەك قانا العاشقى بلوكتارىن تۇرعىزىپ, قالعانىنىڭ ىرگەتاسىن عانا قالاپ قويعان سياقتى. جاقىندا ءبىر بارعانىمدا, بىزگە تيەسىلى بلوكتىڭ قۇرىلىسى جازدا باستالۋى مۇمكىن دەگەندەي بولدى. قالاي بولعاندا دا, اقىسى تولەنىپ قويىلعان پاتەرىمىزگە قول جەتسە بولار ەدى» دەگەن كۇدىگىن دە جاسىرمادى. قالاداعى قۇرىلىس كومپانيالارىنىڭ جۇمىسى جايىندا استانا قالاسى مەملەكەتتىك ساۋلەت-قۇرىلىس باقىلاۋ باسقارماسىنىڭ باس مامانى شىڭعىس امانجولوۆپەن حابارلاسقانىمىزدا, «شىعىس» تۇرعىن ءۇي كەشەنىنىڭ ماسەلەسىن جاقسى بىلەتىنىن ايتتى. ونىڭ سوزىنە قاراعاندا, ۇلەسكەرلەردى «شىعىسقا» قاراتىپ قويعان سەرگەي كوتلياروۆ تۇرعىن ءۇي كەشەنىنىڭ قۇرىلىسى ءتۇبى ءبىر بىتەتىنە تاعى دا ۋادە بەرىپتى.
– جالپى, «تۇرعىن ءۇي قۇرىلىسىنا ۇلەستىك قاتىسۋ» تۋرالى زاڭعا سايكەس, قۇرىلىس كومپانيالارىمەن كەلىسىمشارتقا وتىرماس بۇرىن ولاردىڭ ۇلەسكەرلەردىڭ اقشاسىن تارتۋ ەسەبىنەن تۇرعىن ءۇي قۇرىلىسىن ۇيىمداستىرۋ جونىندەگى قىزمەتتى جۇرگىزۋگە جەرگىلىكتى اتقارۋشى ورگانداردان رۇقساتىنىڭ بار-جوعىن تەكسەرۋى ءتيىس. كەلىسىمشارتتى ەكى جاقتىڭ زاڭگەرلەرىمەن كەلىسە وتىرىپ, ۇلەسكەردىڭ قۇقىعىن, قۇرىلىس نىسانىنىڭ كەستە بويىنشا سالىنۋ كەزەڭىن قاداعالاۋعا قاتىستى جولدارىن قاراستىرۋ كەرەك. كۇماندى كەلىسىمشارتقا وتىرعاندار قۇرىلىس بارىسىندا پروبلەمالار تۋىنداعاندا, ءوز قۇقىعىن قورعاي المايدى, – دەيدى شىڭعىس امانجولوۆ.
راسىندا دا, الدانىپ قالعان ۇلەسكەرلەردىڭ كوبى قۇجاتتى راسىمدەۋگە ءمان بەرمەگەن. وزدەرىنىڭ قۇقىعىن قورعايتىن تۇستارىن اتتاپ وتكەن قۇرىلىس كومپانيانىڭ باسشىلارى حالىقتىڭ وسىنداي بەيقامدىعىن پايدالانىپ كەتىپ وتىر. شىعاسىعا يەسى باسشى بولاتىن اۋەلدەن انىق. ارينە, ىزدەنەم دەگەنگە سوتقا جۇگىنىپ, پروكۋراتۋرا سياقتى باقىلاۋشى ورگاندار جوق ەمەس. الايدا جىلداپ كۇتسە دە, باسپانالى بولۋدان ۇمىتتەنگەن «شىعىستىڭ» ۇلەسكەرلەرى ءالى دە ءۇمىتىن ۇزگىسى كەلمەيدى.
ايگۇل ۋايسوۆا,
«استانا اقشامى»
