پرەزيدەنتتىككە جالپىۇلتتىق سوتسيال-دەموكراتيالىق پارتياسى اتىنان ۇمىتكەر نۇرلان اۋەسباەۆ اقتوبەدە بولىپ, «جاڭاقونىس-4» جانە «باتىس-2» پروبلەمالىق تۇرعىن ءۇي الاپتارى بويىنشا جسدپ رەيدىنە قاتىستى.
اقتوبەنىڭ اتالمىش اۋداندارىنىڭ تۇرعىندارى ينفراقۇرىلىم جوقتىعى ەسەبىنەن ۇزاق ۋاقىت بويى قيىندىقتارعا تاپ بولۋدا. ماسەلەن, قالا شەگىندە ورنالاسقان «جاڭاقونىس-4» تۇرعىن ءۇي الابىنىڭ تۇرعىندارى 2018 جىلدان بەرى گازدىڭ بەرىلۋىن كۇتۋدە. جەرگىلىكتى بيلىك قىركۇيەك ايىنىڭ سوڭىنا دەيىن گاز تارتۋعا ۋادە بەرگەن. بۇگىندە, قازان ايىندا, گاز ءالى دە پايدالانۋعا بەرىلمەگەن. ودان بولەك, تۇرعىندار جولدىڭ ناشارلىعىنا ارىزدانۋدا. «اۋدان اكىمدىگى بىزگە جولداردى تولتىرۋ ءۇشىن قيىرشىق تاس جۇكتەلگەن 56 كاماز بولۋگە ۋادە بەردى. ولاردىڭ تەك ەكەۋى عانا كەلدى» دەيدى «جاڭاقونىس-4» تۇرعىن ءۇي الابىنداعى كەزدەسۋگە قاتىسۋشىلاردىڭ ءبىرى.
نۇرلان اۋەسباەۆ قالا شەگىندە ورنالاسقان «باتىس-2» شاعىن اۋدانىندا دا جاعدايدىڭ ءماز ەمەستىگىنە كوز جەتكىزدى. جەرگىلىكتى تۇرعىندارمەن اڭگىمەلەسۋ بارىسىندا جسدپ ۇمىتكەرى ءوز باعدارلاماسىندا قازاقستاندىقتاردىڭ ءومىر ساپاسىنىڭ ستاندارتىن ەنگىزۋدى كوزدەيتىنىن اتاپ ءوتتى. وندا ادامنىڭ دۇرىس تاماقتانۋى, كيىم, ءدارى-دارمەك, كوممۋنالدىق قىزمەتتەر, اقپارات, دەمالىسقا قاتىستى قاجەتتىلىكتەر ەسكەرىلەدى. زەرتتەۋ بارىسىندا انىقتالعان ازاماتتاردىڭ ءاربىر جەكە توبى ءۇشىن نەگىزگى كورسەتكىشتەرگە قول جەتكىزۋ بويىنشا ارنايى باعدارلامالار ازىرلەنەتىن بولادى. سونداي-اق نۇرلان اۋەسباەۆ ءوزىنىڭ سايلاۋالدى باعدارلاماسىندا ءتۇرلى دەڭگەيدەگى الەۋمەتتىك قولداۋدىڭ جەلىسىن قۇرۋعا نيەتتى ەكەنىن ءبىلدىردى. الەۋمەتتىك ساياسات, ۇمىتكەردىڭ پىكىرىنشە, ادامداردىڭ تابىسىن ارتتىرىپ, داۋلەتتى تاپتارعا كوتەرىلۋىنە كومەكتەسىپ, كۇتپەگەن جاعدايلار تۋىنداعان كەزدە كەدەيلىككە تۇسىرمەۋمەن ايقىندالادى. نۇرلان اۋەسباەۆ تۇرعىن ءۇي الاپتارىنىڭ تۇرعىندارىن وعان جانە ونىڭ الەۋمەتتىك تەڭدىك باعدارلاماسىنا داۋىس بەرۋگە شاقىردى.
