نۇر-سۇلتان قالاسىندا 2022 جىلدان باستاپ قوقىستى قايتا وڭدەيتىن زاۋىت سالۋ جوباسى ىسكە اسىرىلادى. بۇل تۋرالى ۇكىمەت وتىرىسىندا ءمالىم بولدى. پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەكولوگيا جانە قورشاعان ورتانى قورعاۋ ماسەلەلەرى قارالدى.
2022 جىلدان باستاپ نۇر-سۇلتان, الماتى, شىمكەنت, وسكەمەن, اقتوبە جانە قاراعاندى قالالارىندا قوقىستى قايتا وڭدەۋ زاۋىتتارىن سالۋ جوبالارى ىسكە اسىرىلا باستايدى. اتموسفەرالىق اۋا ساپاسىن جاقسارتۋ, قالدىقتاردى باسقارۋ جۇيەسىن جەتىلدىرۋ, ەلدىڭ سۋ وبەكتىلەرىنىڭ ەكوجۇيەلەرىن, بيوالۋانتۇرلىلىكتى ساقتاۋ جانە ەرەكشە قورعالاتىن تابيعي اۋماقتاردى دامىتۋ جونىندەگى شارالار «جاسىل قازاقستان» ۇلتتىق جوباسىندا كوزدەلگەن.
ۇكىمەت باسشىسى ۇلتتىق ەكونوميكا مينيسترلىگىنە 2022 جىلدىڭ 1 ساۋىرىنە دەيىن كومىرتەكتىك بەيتاراپتىققا قول جەتكىزۋ جونىندەگى ستراتەگيانىڭ پىسىقتالعان جوباسىن ەنگىزۋدى تاپسىردى. ەكولوگيا مينيسترلىگىنە اكىمدىكتەرمەن بىرلەسىپ, قولدانىستاعى زاڭنامانىڭ جاڭا تالاپتارىنا سايكەس قۇرىلىس پوليگوندارىن قۇرۋ ماسەلەسىن پىسىقتاۋ, سونداي-اق ەلىمىزدىڭ 10 قالاسىندا ءىرى كاسىپورىنداردىڭ لاستاۋشى زاتتار شىعارىندىلارىن ازايتۋ كورسەتكىشتەرىنە قول جەتكىزۋ جانە جول كارتالارىن ازىرلەۋ بويىنشا شارالار قابىلداۋ تاپسىرىلدى. ەنەرگەتيكا مينيسترلىگىنە اكىمدىكتەرمەن بىرلەسىپ, جەكە سەكتور مەن شارۋاشىلىق جۇرگىزۋشى سۋبەكتىلەردى گازداندىرۋ ماسەلەلەرىن جانداندىرۋ تاپسىرىلدى.
Nur Otan پارتياسىنىڭ سايلاۋالدى باعدارلاماسىنا سايكەس 2025 جىلعا قاراي حالىقتى گازداندىرۋ ۇلەسى 60 پايىزعا جەتەدى, 11,7 ملن ادام گازعا قول جەتكىزەدى. بارلىق وڭىرلەردىڭ اكىمدىكتەرىنە ەكولوگيالىق جاعدايدى جاقسارتۋ جونىندەگى جول كارتالارى شەڭبەرىندە 2021 جىلعا جوسپارلانعان بارلىق ءىس-شارالاردىڭ ورىندالۋىن قامتاماسىز ەتۋ تاپسىرىلدى.
