سەنات شەن-شەكپەندىلەردىڭ الاياقتىقپەن جىمقىرعان قارجىسىن قازىناعا قايتاراتىن زاڭ جوباسىن ماقۇلدادى. «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا تەز بايىعان جوعارى لاۋازىمدى تۇلعالاردىڭ وڭاي جولمەن يەلەنگەن مۇلكى تاركىلەنەتىنى جازىلعان.
«شەنەۋنىكتەر جىلجىمايتىن مۇلىك ساتىپ الاتىن بولسا, ونىڭ قۇنى شەكتىك مولشەردەن اسپاۋى ءتيىس. اسىپ كەتكەن جاعدايدا, دەرەۋ تەكسەرىلەدى. تەكسەرىستى قارجىلىق مونيتورينگ اگەنتتىگى جۇرگىزەدى. جاڭا زاڭ جوباسىنا سايكەس, بۇرىنعى باسشىلار, مەملەكەتتىك قىزمەت وكىلدەرى جۇمىستان كەتسە دە, 12 اي ىشىندە مونيتورينگتىك اگەنتتىكتىڭ باقىلاۋىندا بولادى» دەپ ءتۇسىندىردى زاڭداعى جاڭالىقتى سەنات دەپۋتاتى ولگا پەرەپەچينا.
زاڭ جوباسىندا لاۋازىمدى تۇلعالاردىڭ قارجى وپەراتسيالارىنا زاڭنامالىق تۇرعىدا باقىلاۋ جۇرگىزىلەتىنى جازىلعان. بۇرىن ولار قارجىلىق مونيتورينگ سۋبەكتىلەرىنىڭ قاتارىنا قوسىلماعان ەدى. جاڭا نورما بويىنشا بۇدان بىلاي سالالىق اگەنتتىك ۇلتتىق جاريا لاۋازىمدى تۇلعالاردىڭ ءتىزىمىن جاسايدى. بۇل تىزىمگە دەپۋتاتتار, مينيسترلەر, پارتيا باسشىلارى دا كىرەدى. سوت جانە پروكۋرورلار دا دۇنيە-مۇلىكتەرىنىڭ ماڭداي تەرمەن كەلگەنىن دالەلدەۋى قاجەت. شەندىلەردىڭ تەك ءوزىن عانا ەمەس, جاقىن تۋىستارى, ونىڭ ىشىندە زايىبىن, بالالارىن, باۋىرلارىن دا تۇگەل تەكسەرۋ كوزدەلىپ وتىر. ويتكەنى شەنەۋنىكتەردىڭ بارلىعى ايلاسىن اسىرىپ, جيعان-تەرگەن قارجىسىن جاسىرىپ, بار بايلىعىن تۋعان-تۋىستارىنىڭ اتىنا اۋداراتىنى جاسىرىن ەمەس.
