ەلوردانىڭ تۋعان كۇنىنە وراي ءبىرتالاي سالتاناتتى ءىس-شارالار ۇيىمداستىرىپ جاتىر. سونىڭ ءبىرى – «نۇر-سۇلتان قالاسىنىڭ قۇرمەتتى ازاماتى» اتاعىن بەرۋ سالتاناتى. كەشە وسىنداي شارا باس قالا اكىمدىگىندە ءوتتى.
– ەلوردانىڭ تۋعان كۇنىنە وراي وسى قالانىڭ الەۋمەتتىك-ەكونوميكالىق دامۋىنا قوماقتى ۇلەس قوسقان, بەلسەندى مەملەكەتتىك جانە قوعامدىق قىزمەت اتقارعان جاندارعا «نۇر-سۇلتان قالاسىنىڭ قۇرمەتتى ازاماتى» اتاعىن بەرۋ – ورىندى شارا. بۇل اتاق ءماسليحات دەپۋتاتتارىمەن, قوعامدىق كەڭەس مۇشەلەرىمەن تالقىلانىپ, ولاردىڭ شەشىمى بويىنشا وسى ماراپاتقا قوس ازاماتتارىمىز ءبىراۋىزدان لايىق دەپ تانىلدى, – دەدى قالا اكىمى التاي كولگىنوۆ.
جانقيارلى جاڭبىرشى
قۇرمەتتى اتاققا يە بولعان ازاماتتىڭ ءبىرى – تەحنيكا عىلىمدارىنىڭ كانديداتى, قر كاسىپوداقتارى قۇرمەتتى بەلگىسىنىڭ يەگەرى جاڭبىرشى نۇركەنوۆ. ول كىسى 1946 جىلى 6 شىلدە كۇنى تسەلينوگراد وبلىسى كراسنوزنامەنسك اۋدانىنىڭ قوسكول اۋىلىندا دۇنيەگە كەلگەن. مەكتەپتى بىتىرگەننەن كەيىن تراكتورشى بولىپ جۇمىس ىستەدى, تسەلينوگراد وبلىسى تەڭىز اۋدانىنىڭ «بارشىن» سوۆحوزىندا قوي باقتى, كومسومول-جاستار بريگاداسىن باسقاردى. 1965-1970 جىلدارى تسەلينوگراد اۋىلشارۋاشىلىعى ينستيتۋتىندا وقىدى, ونى بىتىرگەن سوڭ 1970-1986 جىلدارى كومسومول, پارتيا ۇيىمدارىندا
قىزمەت ەتتى. تسەلينوگراد وبلىستىق كومسومول كوميتەتىنىڭ حاتشىسى, استراحان پارتيا اۋاتكومىنىڭ ەكىنشى حاتشىسى, اۋاتكوم توراعاسى بولىپ سايلاندى, تسەلينوگراد وبلىستىق پارتيا كوميتەتى مەن وبلاتكوم اپپاراتىندا جۇمىس ىستەدى.
1986-1997 جىلدارى وندىرىستە – تسەلينوگراد وبلىسىنىڭ اۋىل شارۋاشىلىق سۋمەن جابدىقتاۋ توپتىق جۇيەسىنىڭ قۇرىلىسى جانە پايدالانۋى بويىنشا وندىرىستىك بىرلەستىكتە. 1997-1999 جىلدارى – قازاقستان رەسپۋبليكاسى سۋ رەسۋرستارى جونىندەگى كوميتەتتىڭ ەسىل سۋ شارۋاشىلىعى بىرلەستىگىنىڭ باستىعى. 1999 جىلدىڭ 25 اقپانىنان باستاپ «قالالىق سۋ ارناسى» ترەستىنىڭ باستىعى بولدى. 2000 جىلدىڭ 14 قىركۇيەگىنەن باستاپ «استانا سۋ ارناسى» مەملەكەتتىك كوممۋنالدىق كاسىپورنىنىڭ باس ديرەكتورى بولىپ جۇمىس ىستەدى. ونىڭ باسشىلىعىمەن ەلوردانىڭ سۋمەن جابدىقتاۋ جانە كارىز جۇيەسىن قايتا قۇرۋ, وسى كاسىپورىننىڭ ماتەريالدىق-تەحنيكالىق بازاسىن نىعايتۋ, الەۋمەتتىك ماسەلەلەردى شەشۋ بويىنشا جۇمىستار جۇرگىزىلدى.
جاڭبىرشى نۇركەنوۆ بىرنەشە رەت اۋداندىق جانە وبلىستىق حالىق دەپۋتاتتارى كەڭەسىنىڭ دەپۋتاتى بولىپ سايلاندى. 2000 جىلدان بەرى استانا قالاسى ءماسليحاتىنىڭ ءۇش شاقىرىلىمىنىڭ دەپۋتاتى بولدى. «س.سەيفۋللين اتىنداعى قازاق مەملەكەتتىك اگروتەحنيكالىق ۋنيۆەرسيتەتىنىڭ قۇرمەتتى پروفەسسورى» اتاعىن يەلەنگەن. حالىقتار دوستىعى وردەنىمەن, «ەڭبەك ۇزدىگى», «استانا», «قازاقستان رەسپۋبليكاسىنىڭ تاۋەلسىزدىگىنە 10 جىل», «ەرەن ەڭبەگى ءۇشىن» جانە باسقا مەدالدارمەن ماراپاتتالعان.
پاراساتتى پەتۋحوۆا
«نۇر-سۇلتان قالاسىنىڭ قۇرمەتتى ازاماتى» اتاعىمەن ماراپاتتالعان ەكىنشى ادام – نۇر-سۇلتان قالاسىنىڭ وركەندەۋى مەن دامۋىنا قوسقان قوماقتى ۇلەسى, بەلسەندى مەملەكەتتىك جانە قوعامدىق قىزمەتى ءۇشىن ەۋرازيالىق مەديتسينالىق قاۋىمداستىقتىڭ ۆيتسە-پرەزيدەنتى – پەتۋحوۆا
نادەجدا ميحايلوۆنا.
ن.م.پەتۋحوۆا 1953 جىلى 24 قىركۇيەكتە لۋگانسك وبلىسىنىڭ پوپاسنايا قالاسىندا (ۋكراينا) تۋعان. تسەلينوگراد مەملەكەتتىك مەديتسينا ينستيتۋتىن 1977 جىلى بىتىرگەن.
ەڭبەك جولىن 1977 جىلى تسەلينوگراد قالاسىنىڭ № 1 قالالىق بالالار اۋرۋحاناسىندا ۋچاسكەلىك پەدياتر بولىپ باستاعان. دارىگەر-ينسپەكتور, ەمدەۋ-پروفيلاكتيكالىق سەكتورىنىڭ باستىعى, ال 1988-1994 جىلدارى وبلىستىق دەنساۋلىق ساقتاۋ ءبولىمىنىڭ تۋ كەزىندە كومەك كورسەتۋ جانە بالالىق شاق مەڭگەرۋشىسىنىڭ ورىنباسارى; 1994-2012 جىلدارى
№ 1 قالالىق بالالار اۋرۋحاناسىنىڭ باس دارىگەرى بولىپ قىزمەت اتقارعان.
استانا قالاسى ءماسليحاتىنىڭ ءۇش شاقىرىلىمىنىڭ دەپۋتاتى بولىپ سايلاندى (1999-2012 ج.ج.). 2012-2016 جىلدارى – Nur Otan پارتياسى اتىنان قازاقستان رەسپۋبليكاسى پارلامەنتى ءماجىلىسىنىڭ 5-شاقىرىلىمنىڭ دەپۋتاتى.
2016 جىلدان باستاپ ەۋرازيالىق مەديتسينالىق قاۋىمداستىقتىڭ ۆيتسە-پرەزيدەنتى بولىپ تابىلادى. قازاقستان رەسپۋبليكاسى دەنساۋلىق ساقتاۋ ءىسىنىڭ ۇزدىگى. دەنساۋلىق ساقتاۋدى ۇيىمداستىرۋدىڭ الەۋمەتتىك گيگيەنا بويىنشا جوعارى ساناتتى دارىگەرى. مەديتسينانىڭ وزەكتى ماسەلەلەرى بويىنشا حالىقارالىق سەرتيفيكاتتاردىڭ يەسى.
ن.م.پەتۋحوۆا «قۇرمەت» وردەنىمەن, قازاقستان رەسپۋبليكاسىنىڭ مەرەيتويلىق مەدالدارىمەن, «التىن دارىگەر» جانە
«نۇر وتان» پارتياسىنىڭ «بەلسەندى قىزمەتى ءۇشىن» ءتوس بەلگىلەرىمەن ماراپاتتالعان.
