پرەزيدەنتتىككە ۇمىتكەر مەيرام قاجىكەننىڭ وڭىرلەردەگى سايلاۋالدى ۇگىت-ناسيحات باعدارلاماسى قوستانايدا جالعاستى. مۇندا ۇمىتكەردى وڭىرلىك سايلاۋالدى شتابتىڭ وكىلدەرى مەن ەرىكتىلەر قارسى الدى.
ۇمىتكەر الدىمەن ا.بايتۇرسىنۇلى اتىنداعى قوستاناي ۋنيۆەرسيتەتىنە بارىپ, ستۋدەنتتەرمەن جانە وقىتۋشىلارمەن كەزدەستى. كەزدەسۋ بارىسىندا جاس مامانداردى جۇمىسقا ورنالاستىرۋ, جالاقى جانە ونى يندەكستەۋ ماسەلەلەرى كوتەرىلدى.
– ءبىز ارقاشان جاستاردا جۇمىس پەن جاقسى جالاقى بولعانىن قالايمىز. الايدا مۇنداي ماسەلە تەك ءبىر جىل ىشىندە تەز شەشىلە قويمايدى. سەبەبى ول بۇگىنگى تاڭدا جىلدار بويى قوردالانىپ قالعان وزەكتى ماسەلەنىڭ بىرىنە اينالعان. بارلىعى ەڭ تومەنگى جالاقى مولشەرىنەن باستالادى. بيىل بۇل كورسەتكىش 60 مىڭ تەڭگەنى قۇرادى. 2023 جىلدىڭ 1 قاڭتارىنان باستاپ ول 70 مىڭ تەڭگەگە كوتەرىلەدى. ءبىزدىڭ ويىمىزشا, ونىڭ مولشەرى 150 مىڭ تەڭگەدەن استام بولۋى كەرەك. دامىعان ەلدەردە جالاقىنىڭ ەڭ تومەنگى مولشەرى 717 مىڭ تەڭگەنى قۇراپ وتىر, ياعني بىزدەن 10 ەسە ايىرماشىلىق بار, – دەدى ۇمىتكەر.
سونىمەن قاتار م.قاجىكەن جاقسى ءومىر لايىقتى جالاقىدان باستالاتىنىن اتاپ ءوتتى. كەزدەسۋ سوڭىندا ۇمىتكەر احمەت بايتۇرسىنوۆ ەسكەرتكىشىنە گۇل شوقتارىن قويدى.
بۇدان كەيىن مەيرام قاجىكەن وبلىستىق سايلاۋالدى شتابتارمەن Zoom-كونفەرەنتسياسىن وتكىزدى. ۇمىتكەر ءۇش وبلىستا وتكەن ساپار ناتيجەلەرى, رەسپۋبليكانىڭ ءىرى كاسىپورىندارىنىڭ قىزمەتكەرلەرى, ستۋدەنتتەر, جاس كاسىپكەرلەر جانە كاسىپوداق مۇشەلەرىمەن وتكەن كەزدەسۋلەر جايلى ايتتى. ونلاين-كەزدەسۋ بارىسىندا سايلاۋ ناۋقانىنىڭ بارىسى مەن كانديداتتىڭ جوسپارلانعان ساپارلارىنا قاتىستى بىرقاتار ماسەلە كوتەرىلدى. ودان سوڭ م.قاجىكەن كاسىپوداقتار مەن بيزنەس-قوعامداستىق وكىلدەرىمەن كەزدەستى. دوڭگەلەك ۇستەل بارىسىندا قاتىسۋشىلار الەۋمەتتىك ارىپتەستىك, ەڭبەك جانە الەۋمەتتىك قاتىناستاردى رەتتەۋ تاقىرىپتارىن تالقىلادى.
