استانادا ىشكى ساياسات باسقارماسىنىڭ ۇيىمداستىرۋىمەن «ازاماتتاردىڭ قۇقىقتىق ساۋاتتىلىعىن كوتەرۋ ماسەلەلەرى» اتتى دوڭگەلەك ۇستەل ءماجىلىسى ءوتتى. ماقساتى – ازاماتتاردىڭ قۇقىقتىق ساۋاتىن ارتتىرۋ, كەڭەس بەرۋدىڭ ءتيىمدى جولدارىن قاراستىرۋ.
اتالمىش جيىندا تۇرعىن ءۇي, جەر, ەڭبەك داۋى, الەۋمەتتىك جانە باسقا دا ماسەلەلەردى وڭتايلى شەشۋ جولدارى ءتۇسىندىرىلدى. «ەلباسى قازاقستاننىڭ وركەندەۋى ءۇشىن قۇقىقتىق ساۋاتتىلىقتى, تاربيەنى, سانانى جەتىلدىرۋ قاجەتتىلىگىنە نازار اۋدارىپ كەلەدى. ەلىمىزدىڭ زاڭدارىن ساقتاۋ –جاۋاپكەرشىلىكتى, تۇسىنىستىكتى, زاڭداردى ءبىلۋدى جانە سوعان سايكەس مىنەز-قۇلىق پەن ءىس-ارەكەتتەردى ءۇيلەستىرۋدى تالاپ ەتەدى» دەدى جيىندا جاستار ساياساتىن قولداۋ قورىنىڭ ديرەكتورى باقىتجان جۇنىسبەكوۆ.
گۇلميرا شارحانقىزى
