Amanat پارتياسىنىڭ بقو-داعى سايلاۋالدى شتابىنىڭ جەتەكشىسى مۇرات مۇقاەۆ پەن كانديداتتار «بايتەرەك» قوعامدىق بىرلەستىگىندەگى مۇگەدەك بالالاردىڭ انالارىمەن كەزدەستى.
پارتيا ءتىزىمى بويىنشا قر پارلامەنتى ءماجىلىسىنىڭ دەپۋتاتتىعىنا ۇمىتكەر سنەجاننا يماشەۆا مەن وبلىستىق ءماسليحات دەپۋتاتتىعىنا ۇمىتكەر ميربولات قۇرمانعاليەۆ الەۋمەتتىك قولداۋ شارالارىنا ەل قازىناسىنان قوماقتى قاراجات ءبولىنىپ جاتقانىن اتاپ ءوتتى. ايتكەنمەن جەرگىلىكتى دەڭگەيدە شەشۋدى تالاپ ەتەتىن بىرقاتار ماسەلە بار.
ورالدا 26 وڭالتۋ ورتالىعى بار. «بايتەرەك» قوعامدىق بىرلەستىگى سال اۋرۋى, اۋتيزم جانە باسقا دا دەرتكە شالدىققان بالالاردىڭ اناسىمەن بىرلەسە جۇمىس اتقارىپ كەلەدى. ۇكىمەتتىك ەمەس ۇيىمنىڭ قۇرىلعانىنا 17 جىل بولعان. بىلتىر جەلتوقسان ايىندا مۇندا 81 بالا وڭالتۋ قىزمەتىن العان. ال بيىلدان باستاپ وڭالتۋ ورتالىعى جۇمىسىن توقتاتىپتى. ويتكەنى بيۋدجەتتەن قارجى ءالى بولىنبەگەن. كۇن سايىن مامانداردىڭ كومەگىنە جۇگىنۋى ءتيىس بالالار قازىر ۇيىندە وتىر.
– ءبىزدىڭ ورتالىقتا 12 مامان بار. اتاپ ايتقاندا, لوگوپەد, دەفەكتولوگ, پسيحولوگ, ەمدەۋ جاتتىعۋى بويىنشا نۇسقاۋشى, ماسساجيست جانە ت. ب. ولار 1,5 جاستان 18 جاسقا دەيىنگى سىرقات بالالارعا كومەك كورسەتەدى. بالالار ءارتۇرلى ۇيىرمەگە قاتىسادى. بيىل جىل باستالعالى بەرى ماماندارىمىز جۇمىسسىز وتىر. ونىڭ ۇستىنە, بالالاردىڭ سانىنا قاراي قارجى كولەمىن دە قىسقارتىپ تاستادى. بىلتىر وڭالتۋ ورتالىعىندا 81 بالاعا كومەك كورسەتىلسە, بيىل تەك 35 بالاعا قاراجات بەرىلمەك, – دەيدى قوعامدىق بىرلەستىكتىڭ توراعاسى مەرۋەت سانكاەۆا.
شتاب شەتەكشىسى مۇرات مۇقاەۆ پارتيانىڭ الەۋمەتتىك سالاعا قولداۋ بىلدىرەتىنىن جەتكىزدى. سايلاۋالدى 5 جىلدىق باعدارلاما اياسىندا وبلىستىق فيليال الەۋمەتتىك وسال توپتارعا كوڭىل بولەدى. قازىر وبلىستا 6 مىڭنان استام مۇگەدەك بالا بار. 4300 بالاعا ينكليۋزيۆتى ءبىلىم بەرىلەدى. ونىڭ ىشىندە 1000-عا جۋىعى – مەملەكەتتىك بالاباقشادا, قالعانى – مەكتەپتە.
