نۇر-سۇلتان قالاسى كاسىپكەرلەر پالاتاسى ايماقتىق كەڭەسىنىڭ قۇرىلىس سەكتورىنا ارنالعان وتىرىسى ءوتتى. جيىنعا ەلوردا اكىمىنىڭ ورىنباسارى نۇرلان نۇركەنوۆ, قالالىق ءماسليحات حاتشىسى ەرلان كاناليموۆ, قالالىق باسقارمالار باسشىلارى, «استانا» اەا باسقارما توراعاسى باقىتجان دوسقازيەۆ, «قۇرىلىس» ايماقتىق كەڭەسىنىڭ فيليالدىق توبىنىڭ مۇشەلەرى قاتىستى.
وتىرىس بارىسىندا نۇر-سۇلتانداعى قۇرىلىس نىساندارىنىڭ قۇنىن رەتتەۋ, ماتەريالداردىڭ قىمباتتاۋى, جاڭا ينۆەستيتسيالىق جوبالار ءۇشىن جەر تەلىمدەرىنىڭ جەتىسپەۋشىلىگى, قۇرىلىسشىلاردىڭ شىعىندارىن وتەۋ سياقتى ماڭىزدى تاقىرىپتار تالقىلاندى. قالا باسشىلىعى مەن كاسىپكەرلەردىڭ ەلوردانى دامىتۋ جۇمىسىنداعى بىرلەسىپ اتقاراتىن ىستەرى, ماقسات-مىندەتتەرى تۋرالى ايتىلدى.
– تۇرعىن ءۇي نارىعىنداعى احۋال, ەلوردامىزدىڭ جولدارى مەن باسقا ينفراقۇرىلىمىن سالۋ مەن جوندەۋگە ارنالعان اۋقىمدى جوسپارلاردىڭ ورىندالۋى قۇرىلىس يندۋسترياسىنىڭ ءتيىمدى, ىرعاقتى جۇمىسىنا بايلانىستى, – دەدى ەرلان كاناليموۆ.
ىندەتكە بايلانىستى ءوز سالالارىندا تۋىنداعان ماسەلەلەر تۋرالى ۇيىمدار, جەتكىزۋشىلەر, مەردىگەرلەر ايتتى. قۇرىلىس ماتەريالدارىنىڭ قىمباتتاۋىنا بايلانىستى جوبالاردى تۇزەتۋ, ەلوردادا جازعى ءدامحانالاردى اشۋ پروتسەسىن رەتتەۋ ماسەلەلەرى, سونىمەن قاتار قۇرىلىس سالۋشىلار ءۇشىن وتەماقى ماسەلەسى تالقىلاندى. ينجەنەرلىك جەلىلەر قۇرىلىسى دا ءسوز بولدى.
