نۇر-سۇلتان قالاسىنىڭ اكىمى ا.كولگىنوۆ بوزالا تاڭنان شاھاردى ارالاپ ۇلەستىك قۇرىلىس نىساندارىنا ات باسىن تىرەپ, اباي كوشەسىندە سالىنىپ جاتقان ەكى مۇنارادان تۇراتىن «ستوليچنىي-2» تۇرعىن ءۇي كەشەنىندە بولدى. مۇندا ۇلەسكەرلەر قاتارى 206 ادامدى قۇرايدى.
«ءبىز ۋاقىتتى بوس جىبەرىپ الماۋىمىز كەرەك. كۇردەلى ماسەلەلەر قالىپتاسقان, ءبىز ولاردى رەت-رەتىمەن شەشەتىن بولامىز. كۇن سايىن جوسپارعا ساي جۇمىس جاسالۋى كەرەك. ەڭ باستىسى, جۇمىس توقتاپ قالماۋى ءتيىس» دەدى ا.كولگىنوۆ. اكىم تەحنيكانى اۋماقتا جۇمىلدىرۋ جانە قۇرىلىس جۇمىستارىنا كىرىسۋ قاجەتتىگىن اتاپ ءوتتى. ەكىنشى نىسان ش.قوسشىعۇلۇلى 6/2 كوشەسىندە ورنالاسقان «اقەركە-2» تك. ۇلەسكەرلەردىڭ جالپى سانى – 173 ادام. جۇمىستاردىڭ قالدىق كولەمىنە سمەتالىق قۇجاتتاما بويىنشا «مەمساراپتاما» رمك قورىتىندىسى الىندى. ماسەلەن, قۇرىلىس سالۋشىعا سمەتالىق قۇجاتتامامەن جانە سىرتقى ينجەنەرلىك جەلىلەرمەن بىرگە 2-ءشى كەزەكتەگى جۇمىس جوباسىن ازىرلەۋگە كىرىسۋ قاجەت.
ۇلەسكەرلەردىڭ ايتۋىنشا, كوپشىلىگى ءوز جەرلەرىن ساتىپ, نەسيە الىپ, قۇرىلىسى 2015 جىلى اياقتالۋى ءتيىس «اقەركە-2» تۇرعىن ءۇي كەشەنىنە قارجى سالعان. «جۇمىستى ءوز كەزەڭىمەن جۇرگىزۋ قاجەت. ەكىنشى نىساننان بوس ورىنداردى ساتۋ بويىنشا قۇرىلىس سالۋشىنىڭ ۇسىنىسى قاراستىرىلاتىن بولادى. ءبىرىنشى جانە ەكىنشى وبەكتىلەردە جۇمىستى قايتا باستاۋ قاجەت. قۇرىلىس ماۋسىمى جاقىن ارادا اياقتالادى, ناتيجەسىن كورسەتەسىزدەر» دەدى قالا باسشىسى. جالپى ەلوردادا قۇرىلىسى اياقتالماعان 51 نىسان بار.
