تاعى ءبىر ءولىم. تاعى ءبىر ايۋاندىق. ەلىمىزدىڭ ابىرويىن اسقاقتاتقان چەمپيونىمىز, دزيۋدوشى, رەسپۋبليكالىق جانە حالىقارالىق تۋرنيرلەردىڭ جۇلدەگەرى جاسۇلان ابيەۆتى كومىردىڭ كەزەگىندە تۇرعان جىگىت پىشاقتاپ ءولتىردى. قايعىلى وقيعا سەمەيدەگى قاراجىرا كومىر كەن ورنىندا بولعان. كۋاگەرلەردىڭ ايتۋىنشا, كەزەكتە تۇرعان ەكى ادامنىڭ اراسىنداعى جانجال توبەلەسكە ۇلاسىپتى. قارسىلاسىنىڭ اۋىر سوققىلارىنان قاتتى جاراقات العان 33 جاستاعى جاسۇلان كوز جۇمدى.
شىعىس قازاقستان وبلىستىق پوليتسيا دەپارتامەنتى ستەپنوي اۋىلىنىڭ تۇرعىنى ج.ابيەۆتىڭ ءولىمىن راستادى. «اتالعان فاكتىگە قاتىستى قىلمىستىق كودەكستىڭ 106-بابىنىڭ 3-تارماعى بويىنشا (ادام دەنساۋلىعىنا قاساقانا زيان كەلتىرۋ) سوتقا دەيىنگى تەرگەۋ امالدارى جۇرگىزىلۋدە. جەدەل-ىزدەستىرۋ شارالارى بارىسىندا كۇدىكتى ۇستالىپ, ۋاقىتشا تەرگەۋ اباقتىسىنا قامالدى. ول 24 جاستاعى سەمەيدىڭ تۇرعىنى» دەپ حابارلادى پوليتسەيلەر. ەگەر اتالعان باپ بويىنشا كۇدىكتىنىڭ قىلمىسى دالەلدەنەتىن بولسا, ول 12 جىلعا دەيىن باس بوستاندىعىنان ايرىلادى.
ايتىپ كەلمەگەن اجال تاعى ءبىر بوزداعىمىزدىڭ ءومىرىن قيدى. 2010 جىلدان بەرى كاسىبي سپورتتا كوك بايراعىمىزدى بيىكتە جەلبىرەتىپ, قازاق ەلىنە ولجا سالعان وعلانىمىز قىرشىنىنان قيىلدى. كىمدى كىنالايمىز؟ قۋ تىرلىك ءۇشىن تالانتتى ۇلدارىن ءوز قولىمەن ءولتىرىپ جاتقان قوعامدى ما؟ الدە, جان-جۇرەگى تاس بولىپ, ايۋانعا اينالعان ادامدى ما؟ التىن اسىقتاي دەنيس تەننىڭ كولىگىنىڭ ايناسىن ۇرلاعان قاندىقول قىلمىسكەردىڭ پىشاعىنان ءولىم قۇشقانى كەشە عانا ەدى. ەندىگى كەزەك جاسۇلانعا كەلىپتى.
دەنيس پەن جاسۇلاننىڭ ءولىمى وزگە سپورت مايتالماندارىنىڭ قايعىلى وقيعالارىن ەسكە سالدى. 2009 جىلى 11 تامىزدا «قازاق تايسونى» اتانعان جاس بوكسشى ەرمەك سەرىكوۆ جانار-جاعارماي ستانتسياسىنداعى توبەلەستەن اجال قۇشتى. 2016 جىلى 10 قازاندا «جىندى سۋعا» سىلقيىپ تويىپ العاندار پەتروپاۆلدىڭ تۇنگى كلۋبتارىنىڭ بىرىندە باسكەتبولشى يگور ناناەۆتى ۇرىپ ءولتىردى.
مۇنداي ماسقارانىڭ تىيىلۋى ءۇشىن نە زاڭ قاتايۋى قاجەت, نە ادامداردىڭ جۇرەگىنە مەيىرىم ورالۋى كەرەك…
