ۇلىبريتانيا ەۋرووداقتان شىعا ما؟
ۇلىبريتانيا ۇكىمەتى ەۋروپا وداعىنان شىعۋ تۋرالى كەلىسىمدى قابىلدادى. BBC باسىلىمىنىڭ حابارلاۋىنشا, مۇنداي شەشىمدى ەل پرەمەرى تەرەزا مەي مينيسترلەر كابينەتىندە وتكەن پىكىرتالاستان كەيىن ءمالىم ەتتى.
«مينيسترلەر كابينەتى ەۋرووداقتان شىعۋ تۋرالى كەلىسىمدى قولدايدى» دەدى ۇلىبريتانيانىڭ پرەمەر-ءمينيسترى. ال تەرەزا مەيدىڭ بۇل مالىمەتىمەن كەلىسپەگەن بىرنەشە مينيستر ءوز ەركىمەن وتستاۆكاعا كەتتى.
«بۇل – مەملەكەتتىڭ العا قادام باسۋىنا سەپتىگىن تيگىزەر نىق قادامداردىڭ ءبىرى. مۇنداي لاۋازىمدى قىزمەتتىڭ وزىندىك جاۋاپكەرشىلىگى دە جوعارى. مەنىڭ كوزقاراسىم مەن شارتتارىم ەڭ ءبىرىنشى كەزەكتە ۇلت ماسەلەسىنە باعىتتالادى» دەدى تەرەزا مەي.
ساۋد ارابياسىنا سانكتسيا سالىندى
جۋرناليست دجامال حاشۋكدجيدىڭ جۇمباق ولىمىنەن كەيىن اقش ساۋد ارابياسىنا سانكتسيا سالۋدى قولعا الدى. Reuters باسىلىمىنىڭ مالىمەتىنشە, ول قارۋ-جاراق سالاسىنا قاتىستى بولماق.
ەندى امەريكا تاراپى قارۋ ساتۋ ءىسىن ۋاقىتشا توقتاتا تۇرماق. سول سياقتى قاندى ىسكە قاتىسى بار 17 ادامعا دا ارنايى جازا قولدانىلادى. ولاردىڭ قاتارىندا مۇراگەر حانزادانىڭ كەڭەسشىسى ساۋد ال-كاحتاني, ونىڭ كومەكشىسى ماحەر مۋترەب, سونداي-اق ساۋد ارابياسىنىڭ تۇركياداعى باس كونسۋلى بار.
وسىعان دەيىن ساۋديالىق باس پروكۋراتۋرا حاشۋكدجيدىڭ ءىسى بويىنشا 21 كۇدىكتى بارىن, ونىڭ 11-ىنە ايىپ تاعىلعانىن, ال 5 ادامعا ءولىم جازاسى كەسىلۋى مۇمكىن ەكەنىن حابارلاعان.
تۋريستەر ءۇشىن قاۋىپسىز ەل
تەررورلىق شابۋىل, تابيعي اپاتتار سەكىلدى ادام دەنساۋلىعىنا قاۋىپتى ماسەلەلەر بويىنشا تۋريستەر ءۇشىن قاۋىپسىز ەلدەردىڭ ءتىزىمى جاسالدى.
ساياحاتشىلار ءۇشىن ەڭ قاۋىپسىز ەلدەردىڭ اراسىندا يسلانديا كوش باستاپ تۇر. International SOS ۇيىمىنىڭ مالىمەتىنشە, بۇل مەملەكەتتە قىلمىستىڭ دەڭگەيى وتە تومەن, سوڭعى 18 جىلدا 36 ادام, ياعني جىلىنا ورتا ەسەپپەن ەكى ادام عانا قىلمىسكەرلەردىڭ قولىنان قازا بولعان. سول سياقتى بۇل تىزىمگە ءباا, سينگاپۋر, يسپانيا, اۆستراليا, كانادا جانە جاپونيا ەلدەرى ەندى.
ال تۋريستەر ءۇشىن ەڭ قاۋىپتى ەلدەردىڭ اراسىنا وڭتۇستىك افريكا, تۇركيا, تايلاند, ءۇندىستان جانە مەكسيكا الدا تۇر.
