«نۇر الەم» پاۆيلونىندا اقش, ەۋروپا, وڭتۇستىك كورەيا جانە جاپونيا سەكىلدى ەلدەردىڭ روبوتوتەحنيكا سالاسىنداعى سوڭعى جەتىستىكتەرى تانىستىرىلدى. ەندى استانالىقتار كۇزدىڭ سوڭىنا دەيىن ءان سالىپ, تاقپاق ايتاتىن, بي بيلەپ, مۋزىكالىق اسپاپتا ويناي الاتىن روبوتتاردىڭ ونەرىن قىزىقتاي الادى.
«روبوتتار بالى» ەڭ العاش 2015 جىلى ماسكەۋدە وتكەنى بەلگىلى. استانا تورىنە اكەلىنگەن روبوتتاردىڭ ەرەكشەلىگى – باسىم بولىگىنىڭ قالدىقتاردان قۇراستىرىلۋى.
«مۇنداي جوبا بۇعان دەيىن بالتىق جاعالاۋى ەلدەرى مەن رەسەيدىڭ بىرقاتار قالالارىندا وتكەن. ءبىز ايتۋلى شاراعا جيىرما روبوت الىپ كەلدىك. وعان قوسا, ءتۇرلى ينتەراكتيۆتى ويىندارىمىز بار. روبوستانتسيا قۇرۋداعى ماقساتىمىز – ينجەنەرلىك يدەيالاردىڭ ناتيجەسىندە جاستاردى قازىرگى زامانعا ساي روبوتوتەحنيكا سالاسىنا باۋلۋ» دەيدى ۇيىمداستىرۋشىلاردىڭ ءبىرى سۋپحون زياباەۆ. اكەلىنگەن ەكسپوناتتاردىڭ اراسىندا روك-مۋزىكانتتار توبىن, بيشىلەردى, ءتىپتى گاملەتتى وقيتىن روبوتتى كورۋگە بولادى.
روبوتتار – ادام ميىنىڭ جەمىسى. ادامنىڭ ءومىرىن الماستىرمايتىنى اقيقات, دەگەنمەن ءومىرىن جەڭىلدەتەدى. ماسەلەن, «نۇر الەم» پاۆيلونىن تانىستىراتىن گيدتەردىڭ قاتارىن روبوتتار تولىقتىرىپ تۇر. ءدال قازىرگى تاڭدا پاۆيلوندا 17 روبوت جۇمىس ىستەيدى. ءار قاباتقا ورنالاسقان گيد-روبوتتار كەلۋشىلەرگە بولاشاقتىڭ ەنەرگياسى تۋرالى اقپاراتتار ۇسىنىپ, قويعان ساۋالدارعا جاۋاپ بەرەدى. IT جانە جاڭا تەحنولوگيالار دەپارتامەنتىنىڭ باس مەنەدجەرى دامير يبراەۆتىڭ ايتۋىنشا, روبوتتارعا ات قويىپ, ايدار تاعىلعان.
جانىنا جاقىنداساڭىز بولعانى, اڭگىمەگە تارتىپ, وزدەرى تۇرعان قاباتتاعى ەكسپوناتتارمەن كەڭىنەن تانىستىرا باستايدى.
ءبىز ءبىرىنشى قاباتتاعى «باتىر» اتتى روبوتپەن تىلدەستىك. بولاشاقتىڭ ەنەرگياسى تۋرالى ورىسشا جانە اعىلشىنشا سايراعان روبوتىمىز قازاقشانى مۇلدەم تۇسىنبەيدى ەكەن.
جوبا جەتەكشىلەرى گيد-روبوتتاردىڭ بارلىعى الداعى ۋاقىتتا مەملەكەتتىك تىلدە دە تانىستىرىلىم جاساي الاتىنىنا سەندىردى.
