ەلوردادا ەڭ ۇزدىك اۋدانعا بەرىلەتىن «بايتەرەك» سىيلىعى بار. ءسابيلا مۇستافينا باسقارعان كەزدە بۇل ايتۋلى ماراپاتتى سارىارقا اۋدانى ەكى رەت الدى. كەيىن ول ەسىل اۋدانىنا اكىم بولعاندا «بايتەرەك» اينالىپ وسى اۋداندى تاپتى. بۇل كوزدەگەن ماقساتىنا جەتپەي تىنبايتىن, كوپ باسشىلار جۇرەكسىنە بەرمەيتىن كۇردەلى ىستەرگە بىلەك سىبانا كىرىسىپ كەتەتىن تاۋەكەلشىل اكىم ءسابيلا ساپارقىزىنىڭ تىكەلەي ەڭبەگى ءھام جەتىستىگى دەۋگە بولادى.
ءسابيلا مۇستافينانىڭ ءومىربايانىن پاراقتاپ وتىرساق, ونىڭ قاي ىستە دە كوشباسشى بولعانىن بايقايسىز. مەكتەپتە وقۋشىلاردىڭ الدى بولىپ, «التىن مەدالمەن» ءبىتىردى. ال ۋنيۆەرسيتەتتى قىزىل ديپلوممەن اياقتادى. مەملەكەتتىك قىزمەتتە جۇرگەن ۇزاق جىلداردىڭ ىشىندە ەر ازاماتتاردان قالىسپاي ەڭبەك ەتىپ, باسەكەگە قابىلەتتى, ىسكەر باسشى رەتىندە ءوزىن كورسەتە ءبىلدى. بايىرعى استانالىقتار دا, ارىپتەستەرى دە ءسابيلا ساپارقىزىن ەر مىنەزدى, قايسار جان رەتىندە جاقسى بىلەدى.
ونىڭ پىكىرىنشە, اكىم بولۋ – ناعىز ايەلگە ءتان قىزمەت. سەبەبى, وزدىگىنەن شەشىم قابىلداي الاتىن لاۋازىمعا ايەلدىڭ سەزىمتالدىعى, نازىكتىگى كوبىرەك قاجەت. «بريتاندىق ايگىلى ساياساتكەر مارگارەت تەتچەردىڭ «ەگەر ءبىر ءىستى ادەمى جاساعىڭىز كەلسە, ونى ايەلدەرگە تاپسىر» دەگەن قاناتتى ءسوزى بار.ايەل زاتى كەز كەلگەن ءىستى جاۋاپكەرشىلىكپەن اتقارا بىلەدى. ونىڭ تابيعاتى, اسىرەسە, الەۋمەتتىك سالاعا بەيىم. جۇرتشىلىقتى كوبىنە الەۋمەتتىك ماسەلەلەر تولعاندىرادى. سول سەبەپتى اكىم بولۋ – نازىك جاندىلاردىڭ قولىنان كەلەتىن شارۋا» دەيدى ءوزى. ول اكىم رەتىندە الدىمەن وسى سالاعا دەن قويادى. ايتالىق, اۋدان اۋماعىندا قانداي دا ءبىر توتەنشە جاعداي بولسا, ءسابيلا مۇستافينا بىردەن «زارداپ شەككەندەر بار ما؟» دەپ سۇرار ەدى. «ماتەريالدىق شىعىنداردى قالپىنا كەلتىرۋگە نەمەسە قايتارىپ الۋعا بولادى. ال ادام ءومىرىن ەشقاشان قايتارا المايسىڭ. ماعان ەڭ ماڭىزدىسى – تۇرعىنداردىڭ اماندىعى» دەيدى اۋدان اكىمى.
ءسابيلا مۇستافينانىڭ بالالاق شاعى, جاستىق كەزەڭى استانادا ءوتتى. العاشقى قىزمەت باسپالداعى دا وسىندا باستالدى. وزىنە ەتەنە تانىس, ابدەن باۋىر باسىپ كەتكەن سارىارقا اۋدانىن ول 2006 جىلدان باستاپ بەس جىل قاتارىنان باسقارعانىن ەل جاقسى بىلسە كەرەك. 2011 جىلدان باستاپ, ەسىل اۋدانىنا اكىم بولىپ تاعايىندالعان ول ەكى اۋداننىڭ اراسىنداعى جەر مەن كوكتەي ايىرماشىلىقتى سەزىنگەنىن ايتادى. «ەسىل اۋدانى بۇرىن اكىمشىلىك ورتالىق رەتىندە سالىنعان بولاتىن. تۇرعىن ۇيلەر سودان كەيىن بوي كوتەرە باستادى. العاش تىرشىلىگى ساپىرىلىسىپ جاتاتىن سارىارقا اۋدانىنان وسىندا كەلگەندە مۇلگىگەن تىنىشتىققا تاپ بولعانداي كۇي كەشتىم. ادامدار مۇندا كۇندىز تۇرمايتىنداي ەلەستەيتىن. كەيىن اۋلالار سالىپ, تۇرعىن ۇيلەر كوبەيگەن كەزدە تىرشىلىك اۋانى سەزىلە باستادى. «ءبىز – ەسىلدىكتەرمىز» دەگەن اۋراداعى جاعداي ەندى جاندانىپ كەلەدى» دەيدى ول.
ءسابيلا مۇستافينانىڭ مىنەزى دە ەرگە ءتان. بىراق بارلىق نارسەنىڭ رەت-رەتىمەن تۇرعانىن جاقسى كورەدى. جوسپارعا العان جۇمىستارىن قاعازعا قاتتاپ جازىپ وتىرادى. ولاردى مۇمكىندىگىنشە قولما-قول شەشىپ تاستاۋعا تىرىسادى. ال ۋاقىتتى قاجەت ەتەتىن, تىكەلەي ءوزىنىڭ قولىنداعى شارۋاسى ەمەس دۇنيەلەردى قاعازعا ءتۇرتىپ, جۇمىس ۇستەلىنىڭ ۇستىنە قاتتاپ قوياتىن ادەتى. كوز الدىندا تۇرعاننان كەيىن ول ماسەلەلەر بىرجاقتى بولمايىنشا كەيىپكەرىمىزدە تىنىشتىق جوق.
ءسابيلا مۇستافينا ايەل ادام بولىپ, سىلانىپ-بويانۋدى ۇناتپايدى. ەسەسىنە, جاساعان تاعامى ءتىل ۇيىرەدى. اسىرەسە, ءسابيلا ساپارقىزىنىڭ دۋحوۆكادا باپتاپ ازىرلەگەن بالىق ەتىنىڭ ءدامىن تاتقان دا, تاتپاعان دا ارماندا. ول قانشا جۇمىسباستى بولسا دا وتاعاسى باعدات پەن ۇلى ارىستانبەكتى ىستىق تاماقسىز قالدىرعان ەمەس. «كەيدە قۋلىققا باسىپ, ەرتەڭگى تاماقتى كەشكىسىن ازىرلەپ كەتەتىنىم بار, – دەيدى كۇلىپ ءسابيلا ساپارقىزى. – مەنىڭ جەكە اسپازىم جوق. ۇستاعان دا ەمەسپىن. ءارى ءبىزدىڭ ءۇيدىڭ جىگىتتەرى بوتەن قولدان ازىرلەگەن تاعامدى جەگەندى اسا ۇناتا بەرمەيدى».
ءسابيلا مۇستافينانىڭ ۇلى قازىر يسپانيادا وقىپ جاتىر. «ماما, يسپانيادا ادامنىڭ ءومىر سۇرۋىنە قولايلى كوپتەگەن جاعداي بار. بىراق ۋايىمداماڭىز, وقۋىمدى بىتىرگەننەن كەيىن قازاقستانعا ورالامىن. ءوز ەلىمدە جۇمىس ىستەگەنگە نە جەتسىن دەيدى قۇلىنىم. بالامنىڭ بويىنا تۋعان ەلىنە دەگەن پاتريوتتىق سەزىمدى ۇيالاتا العانىما سونداي قۋاندىم» دەيدى كەيىپكەرىمىز. ءسابيلا ساپارقىزىنىڭ ۇلى دا, قىزى دينارا دا اعىلشىن تىلىندە ەركىن سويلەيدى. ال نەمەرەلەرى توميريس پەن تەمىرلان بولسا, قازاق, ورىس تىلدەرىمەن قاتار, تۇرىك, اعىلشىندى دا ەركىن مەڭگەرگەن.
– مەنىڭ پىكىرىمشە, كەز كەلگەن مەرەكەنىڭ – تاربيەلىك سيپاتى بار. ءبىزدىڭ وتباسىلىق داستۇرىمىزدە مەيرامداردىڭ بارىندە الدىمەن ۇلكەندەردى قۇتتىقتاۋدان باستايمىز. جولداسىمنىڭ جانە مەنىڭ جاسى ۇلكەن اعا-اپالارىمىز بار. 8 ناۋرىزدا نەمەرەلەرىمىزدى ەرتىپ الىپ, الدىمەن سولاردى قۋانتىپ, مەرەكەسىمەن قۇتتىقتاپ شىقپاقپىز, – دەيدى ول.
جۇرتشىلىققا اكىمدەردىڭ, لاۋازىمداعى جانداردىڭ پروبلەماسى جوقتاي كورىنەتىنى راس. ءسابيلا ساپارقىزىنىڭ ايتۋىنشا, اكىمدەر دە ەت پەن سۇيەكتەن جارالعان, ولاردىڭ دا ءبىر باسىندا قيىندىقتارى, پروبلەمالارى بولادى. ول شارشاعان كەزدە ءبىر ءسات فيلمدەر كورگەندى ۇناتادى ەكەن. «جولداسىم رەجيسسەر بولعاننان كەيىن كينوتۋىندىنى تالداپ, تاپقىر فرازالارى بولسا, قاعازعا ءتۇرتىپ وتىرعاندى جاقسى كورەمىن» دەيدى اكىم.
ءسابيلا ساپارقىزى – بيليارد ويناۋدىڭ شەبەرى. وسى ويىندا تالاي ەر ازاماتتى جولدا قالدىرعانى بار. «كەيدە جولداسىم ەكەۋمىز بيليارد وينايمىز. ونداي كەزدە: «باكە, سەنى قاتتى سىيلايتىنىمدى ءوزىڭ دە جاقسى بىلەسىڭ. بىراق بۇل ويىندا دوستاستىق جوق. ۇتۋ مەن ۇتىلۋ عانا بار دەيمىن» دەيدى.
ءسابيلا مۇستافينا قول استىنداعى قىزمەتكەرلەرىنە ءوزىنىڭ ۇلى مەن قىزىنداي قارايتىنىن ايتىپ قالدى. ۇجىمدا جىلى اتموسفەرا قالىپتاسىرۋ, قىزمەتكەرلەرىن قولداپ-قورعاپ, ولاردىڭ بىلمەگەنىن ۇيرەتىپ, ءوزى دە ولاردان ۇيرەنىپ وتىرۋ – ونىڭ نەگىزگى ۇستانىمدارىنىڭ ءبىرى.
كەز كەلگەن ادامدى تانۋ ءۇشىن ونىمەن ءبىر ءسات اڭگىمەلەسىپ, ىشكى جان دۇنيەسىنە ەنۋ كەرەك. ءبىز بۇرىن ءسابيلا ساپارقىزىن اۋدان اكىمى رەتىندە تانىعانىمىز بولماسا, ءبىتىم-بولمىسىن بىلە بەرمەيدى ەكەنبىز. اڭگىمەلەسۋ بارىسىندا ول كىسىنىڭ جىگەرلى, رۋحى بيىك جان ەكەنىنە كوز جەتكىزە تۇسكەندەي بولدىق.
astana-akshamy.kz
