ساداقا, زەكەت جيناۋدى اۆتوماتتاندىرۋ مەن باقىلاۋ ورناتۋ يدەياسىنا قالاي قارايسىز؟
مارس سماعۇلوۆ,
قمدب جانىنداعى «زەكەت قورىنىڭ» رەفەرەنتى:
– ءدىن ىستەرى اگەنتتىگىنىڭ بۇل ۇسىنىسى دۇرىس شىعار, بىراق مەشىتتەردەگى تيىن-تەبەن تاستايتىن ءجاشىكتەردى جويىپ, تۇگەلدەي اۆتوماتتاندىرۋ كوپشىلىكتەن قولداۋ تابا قويۋى ەكىتالاي. ويتكەنى, ساداقا اللاھ رازىلىعى ءۇشىن بەرىلەدى. ەكىنشى جاعىنان, قولايسىزدىق تۋعىزۋى ءمۇمكىن. مىسالى, ءسىز ءولىم-ءجىتىمگە, اس بەرگەندە, ءدىني مەيرامدارعا جايىلعان داستارقانعا مولدا شاقىرساڭىز, وعان رازىلىق رەتىندە بەرىلەتىن ازىن-اۋلاق اقشاڭىزدى اياقتاي بارىپ اۆتومات ارقىلى ءتولەۋگە دايىنسىز با؟ ال مال-مۇلكىنىڭ, ءداۋلەتىنىڭ قىرىقتان ءبىر بولىگىن بەرۋدى ءمىندەتتەيتىن زەكەتكە ونداي جۇيە ەنگىزىپ جاتسا, ءجون بولەك. ول قىزمەتتى وسىدان ءبىر-ەكى جىل بۇرىن قمدب جانىنان قۇرىلعان «زەكەت» قورى جۇزەگە اسىرا باستادى. Qiwi پوست-تەرمينالدارىنا تولەپ نەمەسە بايلانىس وپەراتورلارىنداعى قىسقا نومىرلەرگە سمس جىبەرۋ, «تسەنتركرەديت» بانكىنەن اشىلعان ارنايى ەسەپشوتقا اۋدارۋ ارقىلى زەكەت بەرۋگە بولادى. وسى كۇنگە دەيىن زەكەت قورىنا ەلۋ ەكى ميلليون التى ءجۇز سەكسەن ەكى مىڭ ءبىر ءجۇز قىرىق ءۇش تەڭگە جيناقتالدى. بۇل – حالىقتىڭ ءدىني ساۋاتىن اشۋعا, يسلام ناسيحاتىن كوركەيتۋگە, يمام-مولدالاردىڭ الەۋمەتتىك ماسەلەسىن شەشۋگە, ت.ب. ساۋاپتى ىستەر مەن قايىرىمدىلىق شارالارعا جۇمسالادى. مىسالى, جيناقتالعان قوردىڭ ەسەبىنەن ءوزىن-ءوزى قاراجاتپەن قامتاماسىز ەتە المايتىن 144 اۋىل يمامىنا بيىل 1 قاڭتاردان باستاپ 20 مىڭ تەڭگە ءمولشەرىندە جالاقى بەرە باستادىق.
ءسۇلتانالى بالعاباەۆ,
دۇنيەجۇزى قازاقتارى قاۋىمداستىعى توراعاسىنىڭ ورىنباسارى:
– ءدىندى بەتىمەن جىبەرمەي, بەلگىلى ءبىر باقىلاۋ, ءتارتىپ بولۋى كەرەك دەگەندى مەن باياعىدان قولدايمىن. ءويتكەنى, ەڭ كۇشتى يدەولوگيا – وسى ءدىن. قايرات لاما شاريف ءدىن ىستەرى اگەنتتىگىنە كەلگەلى بەرى وسىنداي يگى شارالار قولعا الىنا باستادى. سوندىقتان ساداقا, زەكەتتى بانكومات ارقىلى جيناي ما, باقىلاۋ ورناتا ما – ول جاعى مۇسىلمان قاۋىمى ءۇشىن اسا ماڭىزدى بولماۋى كەرەك. ءدىن ءتوڭىرەگىندە ءجۇز ماسەلە بولسا, بۇل – سونىڭ 98-ءىنشى نەمەسە 99-ىنشى ءماسەلەلەرىنىڭ ءبىرى.
جانگەلدى سارسەنوۆ,
«ايالا» قايىرىمدىلىق قورىنىڭ ۆيتسە-پرەزيدەنتى:
– ەگەر ءدىن ىستەرى اگەنتتىگى ونداي شارانى قولعا الىپ جاتسا, مەشىتكە جينالاتىن قايىر-ساداقانىڭ ەسەبىنە بەلگىلى ءبىر دەڭگەيدە جاريالىلىق جەتىسپەيدى دەگەن ءسوز. حالىق تۇرمىسى مۇشكىلدەرگە, مۇگەدەك-ءمىسكەندەرگە, اۋىر ناۋقاستارعا كومەك بولسىن دەپ اقشا بەرگەسىن, ونىڭ قايدا, قالاي جۇمسالىپ جاتقانىن ءبىلۋى كەرەك دەپ ەسەپتەيمىن. مىسالى, ءبىزدىڭ قايىرىمدىلىق قوردىڭ جەر-جەردەگى جاشىكتەرىنە تۇسكەن قارجىنى ساناعاندا, اكتىگە ەكى تاراپتىڭ قولى قويىلادى. ءبىرى – بىزدىكى, ەكىنشىسى – سول جاشىك ورناتىلعان جەردىڭ يەسىنىڭ قولى. ال جينالعان قارجىنىڭ قانداي ماقساتقا جۇمسالعانىن سايتىمىزدا كورسەتىپ وتىرامىز.
ساپار مۇستافين,
«قازاقستان قاجىلارى قاۋىمداستىعى» استانا قالالىق فيليالىنىڭ توراعاسى:
– بىرەۋ تاق سان دەپ ىرىمداپ بەرەدى, بىرەۋ قالتاسىنداعى بارىن سالادى. جاعدايى جەتكەندەر كوبىرەك قايىر-ساداقا جاسايدى. ونىڭ ءبارىن قالايشا اۆتوماتتاندىرۋعا بولادى؟ «جاسىرىن بەرىلگەن ساداقا اللاھتىڭ اشۋىن ءسوندىرەدى» دەيدى. اللاھ رازىلىعى ءۇشىن جاسالعان ءاربىر جاقسىلىق – ساداقا. ەندەشە, قالاي جاقسى امالدى اۆتوماتتاندىرۋىمىز كەرەك. كەيىن مەن مىنانشا ساداقا بەرىپ ەدىم دەپ تۇبىرتەگىن ساناپ ءجۇرۋ ءۇشىن بە؟ مەنىڭشە, بۇل اسا دۇرىس قارەكەت ەمەس.
ادىلبەك جاپاق
