استانادا ساقالدى قۇرىلىس نىساندارىنىڭ ماسەلەلەرىن شەشۋدە جۇيەلى جۇمىس جۇرگىزىلۋدە. اكىمدىكتە «نۇرلى جەر» تۇرعىن ءۇي باعدارلاماسىنىڭ ۇلەستىك قۇرىلىس جوباسى بويىنشا سالىناتىن نىسانداردىڭ ماسەلەلەرى قارالدى.
وتكەن جىلى قالا اكىمى اسەت يسەكەشەۆ «نۇرلى جەر» باعدارلاماسى بويىنشا ەلورداداعى پروبلەمالى نىسانداردى رەتتەۋ جونىندە باستاما كوتەرگەن بولاتىن. سوعان وراي نەسيەلىك قاراجات ەسەبىنەن كۇردەلى تۇرعىن ءۇي قۇرىلىسى جوبالارىن اياقتاۋدى قارجىلاندىرۋ, قۇرىلىس جۇمىستارىن ۇيلەستىرۋ جانە باقىلاۋ ماقساتىندا استانا قالاسى اكىمدىگىنە قاراستى «ەلوردا قۇرىلىس كومپانياسى» جشس-ءتىڭ ۋاكىلەتتى ۇيىمى قۇرىلعان-دى. جالپى, جۇرگىزىلگەن جۇمىستاردىڭ ناتيجەسىندە زاڭعا سايكەس قۇرىلىستىق كاسىپورىنداردىڭ نەمقۇرايلى قۇرىلتايشىلارى زاڭ بويىنشا جاۋاپقا تارتىلىپ, قۇرىلىس الاڭدارى «ەلوردا قۇرىلىس كومپانياسى» جشس ۋاكىلەتتى ۇيىمىنا بەرىلگەن بولاتىن. مىسالى, «شىعىس» تۇرعىن ءۇي توبى 3ا, «شىعىس» تۇرعىن ءۇي توبى 3ب, «جاعالاۋ-3» بلوگى, «جاعالاۋ-4» بلوگى سىندى پروبلەمالى نىساندار قالپىنا كەلتىرىلدى. مامانداردىڭ مالىمەتىنشە, قازىرگى ۋاقىتتا «نۇرلى جەر» باعدارلاماسى بويىنشا سالىناتىن 36 نىساننىڭ 27-ءى تۇرعىن ءۇي كەشەنى بولىپ وتىر. اكىمدىك تاراپىنان قارجىلاندىرۋ ماسەلەسىن شەشۋ جولدارى قاراستىرىلۋدا.
سونىمەن قاتار, اعىمداعى جىلدىڭ 12 شىلدەسىندە «ەلوردا قۇرىلىس كومپانياسى» جشس تۇرعىن ءۇي-قۇرىلىس كووپەراتيۆىمەن بىرلەسىپ, «باسپانا كوكتال» مەن «ميرنىي دوم» تۇرعىن ۇيلەرىنىڭ قۇرىلىسىن اياقتاۋ جونىندە بىرقاتار مەموراندۋمعا قول قويىلعان بولاتىن. جيىن بارىسىندا ماماندار بۇل جۇمىستىڭ ءالى دە قارقىندى تۇردە جۇرگىزىلەتىنىن جەتكىزدى.
